آزاد لچہ ندر پہ باسکے سنگتانی نام ءَ۔۔،،
ماہ نہ لوٹان تی
پکاہین بان ءُ ماڑیان
پمن ھشکین گلزمین
چو جنت انت
کوہ ءُ تلار ءُ سنگ
گِل ءُ پُلک ءُ ریک
مۓ مال ءُ مڈی انت
ماہ نہ لوٹان تی
پکاہین بان ءُ ماڑیان
نیلین ءُزر ءُ تیاب لمب
مچکدگ ءُ آمین ءُ جوپاگ
مۓ مال ءُ مڈی انت
ماہ نہ لوٹان تی
پکاہین بان ءُ ماڑیان
کیل ءُ نہنگ ، شادی کور
بولان ءُ حب ءِ کور
لُوردین آپ
مۓ مال ءُ مڈی انت
ماہ نہ لوتان تی
پکاہین بان ءُ ماڑیان
چگرد ءُ کھور ءُ گز
کوھی پیش ءُ تگرد
مۓ مال ءُ مڈی انت
ماہ نہ لوٹان تی
پکاہین بان ءُ ماڑیان
کرگین ءُ گدام
گلی ھاکی بان ءُ کاپر
مۓ مال ءُ مڈی انت
ماہ نہ لوٹان تی
پکاہین بان ءُ ماڑیان
مارا مہ ریپین چو
پہ چند ءِ کلدار
ماہ رد نہ کپان
اے مہکین وتن بلوچستان
مۓ مال ءُ مڈی انت
ماہ لوٹان تی
پکاہین بان ءُ ماڑیان
اے بی بلوچ