صادق مری ءِ شئر ءُ پربند

[Zahida Raees Raji]

صادق مری

رستغ انت ڈکاں بیا انت پہ جان ء ول گرنت
اے زھیر پرما راھگوزاں ایریں ڈھنگر انت

کانھلیں رکاں مستغ انت تن آفیں وھی
کدھیں چماں گلگلیں انڑزی سر رشنت

گل زمیں بچانی وثی پول ء تہ مخن
پہ وثی قول ء سیالی ء کوھیں پنگھر انت

سنگت انت نوخیں زیندھ ء نیمون ء پہ مرگ
منتغیں پندھاں یہ دمے دگ ء تاھر انت

نی ثغنت شوا پہ رلغاں در ملکاں بلوچ
راست گوشاں جند ء ڈیھ ء درشکانی ساء بزانت

کیے وثی ساھ ء باور انت صادق دانسری
مڑد چو پوڑاں چمبواں دستانی بھر انت

[Zahida Raees Raji]

بلوچی شیرے پہ شوے بلوچی دیوان ء
؎
صادق مری

آس گوارن ٰ ء آزماں گوستہ
روژگریں پہرے ساء سراں گوستہ

دو دلی جڈوٰییں حیالان انت
پندھ گوں مرگی بانزلاں گوستہ

چم پہ گندیم درشم ء ھیل انت
سال گوں ڈکالیں دلاں گوستہ

رستہ جو انجیراں پتن تاخیں
اژ وثی ڈیلء رہنغاں گوستہ

گو بریں وھد ء راھگوزاں گرانیں
زیندھ ژہ بازیں مڑدغاں گوستہ

نیں ھواں سیالی دگ انت سہراییں
کار ژا بازیں لیکواں گوستہ

روش ماں ساء بنداں کیا دیثہ
ساھگ ء آتک ء ساھگاں گوستہ

سہب چو آس لمبیں لواران ات
شف تھاریں گوں رستران گوستہ

پاک انت پہ آس آف ء رواجانی
سیوتی ء دل ہنگراں گوستہ

دار وثی بازیں لیکواں صادق
گند کہ سیث ء ژا زیاں گوستہ

[Zahida Raees Raji]

Sadiq Marri
(صادق مری)

مناں تٰی ڈیل درکار انت نشانی
ترا سوغند بات وھش دروشمانی

تہ حالے دے ترا تاں رنگ وھشیں
مناں پل گون انت بازیں موسمانی

مناں پہ رلغاں نیمون باز انت
کیا تی نیت انت سوزیں پرانی

دل ء بژناں کجا مرشی بریشاں
دل ء دیوال برز انت امسرانی

مواث پہ عاشقی کسے ملامت
دل ء کار انت کہ کار انت دلبرانی

دل ء ڈکال چو ڈیھ ء بلوچ ء
رواں روشے گوں نوذاں سر رشانی

تہ صادق ہچ برے مونجھا مواثیے
مہ رنجاثیے پہ ٹوکاں مڑ دمانی

[Zahida Raees Raji]

(صادق مری)

من تٰی مہر ء غماں شیوار باثاں
کہ زندغ باں پذا پڑ تو مراثاں

ھشاثاں بے ترا آھاڑیں روشاں
زمستان ء چو پلاں گیمراثاں

مرلاثاں من سنگیں بانڈوے ء
من تیٰ دستاں ٹلنگانا بھراثاں

ترا ء تٰی گہیں دنیا ء نیما
نہ زاناں من کیا گیوارغاثاں

من گاراں وپتغیں وھاوانی ڈیھ ء
پہ نوخیں بانگھوے ء سمبراثاں

نہ زانتوں کوڑوء لیوانی لنگھاں
من یہ زورآوریں کورے رخاثاں

اے دل راہ درپر انت بے اٹکلانی
گنوخاں کہ وتا پازیرغا ثاں

مناں سمبھالیں گوں دستاں دعاء
من شوے نیخیں دلاں آمین باثاں

مناں آدینغ ء بھورینتہ صادق
من جندء ٹکراں نزآرغاثاں

[Zahida Raees Raji]

(صادق مری)

شف روخ نوی استار بھرنت
تٰی یاری دستء یار بھرنت

اے سنگ بھرنت آفانی رخء
چو ساہ ء تندیں تار بھرنت

چے تی دیمء بستار منی
چو دستاں ھشکیں دار بھرنت

کٰیے عشقء داں سر سینگھاری
سر حامی بنت گیوار بھرنت

تی ڈیل ء سیل ء سوادھاں پہ
مییں شیرانی شنزار بھرنت

مییں ڈیھ ء ڈکے مان رشیت
تہ با لی مرگاں جھار بھرنت

مناں صادق لوزان بار مخن
تی رکانی گفتار بھرنت

[Zahida Raees Raji]

(صادق مری)


کٰیے ایکوی گار انت دلء
دل گوں شریدار انت دلء


چماں را گوں نا سوھوی
بے لیکوی کارانت دلء


نام ء گنوخ انت اقل اے
پہ سیوتی سار انت دلء


چم ء نغاھاں پدھر انت
مڑد کہ گنہگار انت دلء


پندھاں مناں بھورینتغہ
گام زیرغابار انت دلء


چماں گوں دل نز آرغی
رنگانی بازارانت دلء


نیں مرگ ء نیں زیندھ انت مناں
تی مہر کاٹارانت دلء


رک ھشک ء چم بے انڑزی انت
کندغ پہ آزار انت دل ء


گیرآر انت شیراں صادقء
ٹوکاں منی دارانت دلء

[Zahida Raees Raji]

(صادق مری)
 
کار کنیتغیں ٹہی دستاں
گون انت دنیا ترا وثی دستاں
 
شہر دل پولے ء نہ ٹاہنتہ
نیتے بی کہ گون بی دستاں
 
قول کارے نہ انت کہ شموشغ بیت
ٹوک دارے نہ انت بھری دستاں
 
تو نہ زانیے کہ تھارماہ چی اے
چم جنداے گوں پولغی دستاں
 
دروشمء پل تی رخا بیثہ
ما کہ روذینتہ امبری دستاں
 
خواری آں گوں دل اے نوی اشتاف
مارا اے عمر کیلغی دستاں
 
چم و دل تی دعاییں منزل بنت
ما ترا زڑتغہ سری دستاں
 
کار ھواں انت کہ پہ کنغ جوان انت
دل پرایینتہ دلبری دستاں
 
اش نغوشوں کہ چے گوشی صادق
نوخ انت تی کہنیں شاعری دستاں

[Zahida Raees Raji]

(صادق مری)

ٹوک چو بے تواری ء گون انت
دل ھمے نیزگاری ء گون انت

آس گون انت دلء زمستان ء
یا چراغے تھاری ء گون انت

کیے پہ تی رھگوزاں پذا گوستہ
تی ھمے رند گاری ء گون انت

وث گلا بیت پہ سنگیں ماڑی آں
شذ ھواں دور و باری ء گون انت

دست ھورگی نصیوء دستان انت
اے کشار بے کشاری ء گون انت

پرما بیکارغی دہ کارے ناں
اے تہ مے بازکاری ء گون انت

ایکوی ایکوا نہ انت صادق
دل مناں گوں اواری ء گون انت

[Zahida Raees Raji]

(صادق مری)

دل تٰی قصو و گا لا کن
مرگے بی بلاں بالا کن

وشبو وث وثی ربالو
پیغامے کساں سالا کن

توفی بی دلاں نیخیں ناں
کاراں رب سوالہا کن

تاخے کہ سراں ژہ سستہ
پلے من ھواں ٹالا کن

صادق نیت و مہراں پہ
دستاں بند سوالا کن