Author Topic: دپتان۔ کریم تھل ءِ پربند ندر پہ باسکاں  (Read 5383 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7095
  • Karma: 356
    • Baask-Home of Baluchi Language, Literature & Culture
دَپتان ( تفتان )
 
  ( شهیدیں همبلاں عبدالرحیم رئیسی ؛ علیرضا ارشد رحمانی ؛ ابراهیم اشکان و صادق رینکی ءِ یات و نام ءَ )
 
 دَپتان !
 
  منی ڈگار ءَ سَک
 
  سر ءَ تو آزمان ءَ ماں تچوکیں بالی جَمراں مُش ئے
 
  تچوکیں جمرانی گوں جُڑاں هبر کن ئے
 
  منی ڈگار ءِ بُرزتریں چیدگ ئے
 
  چه پیڑیاں چم اِت روژنا
 
  دل اِت دریکگ انت
 
  تو لشکرانی آیگ ءَ ؛
 
  و رُمبانی سردَیاں دیستگ انت
 
  پاهار اِت هم گواه انت اے دورو
 
  سوچوکیں هر لَوار ءَ
 
  سَرها تریں ساهگ ئے
 
  گوریچ ءِ هر ویلگردیں هونژگ ءَ
 
  تو گرمتریں پناه
 
  آرام و پُهته کاریں پیر ءِ داب ءَ نشتگ ئے ...
 
  ***
 
  دَپتان !
 
  سر اِت چه پیڑیاں سپیت
 
  چَم اِت چه یکے آپ گِپتگ و جهان ءَ چارگ ئے
 
  بلوچ ءِ تو بدیں روچ ءَ دل وارگ ئے ...
 
  دپتان !
 
  وتی آزمان ءِ برانز شانیں اِستاراں تو بچار
 
  چم اِش چه ارس شُشتگ انت
 
  شَرم انت که نِشتَگ گُج و گُب اِش
 
  ترا ترپان کندگ انت
 
  دپتان
 
  کُجام وشنیاتک
 
  ترا ماں دپتراں کدیں نه کُرته پَج
 
  تئی چه راج ءَ سِستَگ اِش سراں
 
  بُرتگ اِش لَج
 
  نازانتی ءِ مَیار بوتگ چو ترا
 
  تئی واری کَشیں راج ءِ کَؤتر ءَ ...
 
  ***
 
  دَپتان !
 
  چه پیڑیاں تو دور دور ءَ چارگ ئے
 
  گواتانی هال و شِیکگاں
 
  جان ءَ زانگ ئے و مارگ ئے
 
  بلوچ ءِ سُهتگیں ڈیه ءِ ٹَپ
 
  هر دَمان و کَتره ءَ نوک نوک بیت
 
  بلوچ بندی انت و ساه اِش گوات ءِ کوپگاں
 
  جهان انت شِنگ بَیاں ...
 
  دَپتان !
 
  بامگواه ءِ نرمکیں سمین ءِ تو دَمان
 
  چم پَچ بکن
 
  آزمان ءَ بَرکتانی رُژن شانیں اِستاراں تو بچار
 
  بارین منا په هالے نوکیں
 
  آزمان ءِ ماں پَڑ و پراهی ءَ
 
  اوداں که همبلانی یات مَنتگ چه شهید
 
  بیرکے
 
  چه آزمان ءِ رنگ دیست بیت ؟...
 
  ***
 
  دَپتان !
 
  توئے سُچ ئے چو کوه گَم ءِ
 
  مناں سُچاں چه راج ءِ گَم
 
  منا وتی تو ساهگ ءَ بزور
 
  مناں چه تو جهان ءَ دور دور
 
  ترا په پیڑیانی ترانگاں
 
  نوک کناں ...
 
  کریم بلوچ ـ تَهل
 
  ۰۸/۰۲/۱۱
 
  آستاخانف - اک.* - سَرها : : نه سارت و نه گرم . دلکش . وشیں مولُم .
 
  ** - پیڑی : : سَدی . سَد ( ۱۰۰ ) سال .
 
  *** - کَؤتَر : : کَپوت .
 
  **** - ترانَگ : : یات . هَیال . گِیر . گِیر آیگ .
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line