Akram Hayala , اکرم ھیال ءِ شئر ءُ پربند ندر پہ باسکاں

[Zahida Raees Raji]

Akram Hayala , اکرم ھیال ءِ شئر ءُ پربند ندر پہ باسکاں

 ۔۔۔۔۔۔ دستونک ۔۔۔۔
 
 دیدگاں مئے زنگ بستگ داں  نگاہ سرجم نباں
 باتن ءِ ھیسکارگاں گوں ایوک ءَ دلجم نباں
 
 دل سَتر کَستانی دریا ءَ کپیت ءُُ چول جنت
 تُنْ بستاریں متاہ ءِ شپ زدگ الم نباں
 
 رُستگ اَت بیوانکی درچکاں ءُ کُدو  ھالیگ اِتنت
 درد چاڑانی ابیتکیں شانتلانی رم نباں
 
 دْرپش دنت گوناپے وابانی شبینگ مھتلیت
 جیڑگانی بے وسی ءَ چمّ پہ مھرم نباں
 
 ھورکیں تاسانی زھیری لذّتاں گون اِنت ھیال
 ترانگ ءِ پیوست دابیں دروشمانی گم نباں
 

[Zahida Raees Raji]

تنگئیں ھالاں کپودر پہ مسالے سر بکن
تندبستگ دیدگاں مئے وشیں ھالے سر بکن

من پہ بے وانکی ھدوکاں نئیت ربالے ادا
رھگوزی راہ ءِمساپر تو سوالے سر بکن

جیڑگانی باتن ءَمئے زنگ مانشانتگ گُبار
ترانگ ءِ آسودگیں چماں کمالے سر بکن

ھژدری ارزشت ءِ باھوٹ اِنت تئ چہ بندر ءَ
مھرمیں ٹھلانی نازاں پہ دمالے سر بکن

زندگی بے وانکی ءِکوش ءَ را ساڑاتگ تبے
بیگہ ءِ دردیں زہیراں پہ شمالے سر بکن

مہتل اِنت ارواہ ھیال ءِ زرد پہ تُنّاپی ءَ
مھر ءِ تاھاپیں نگاہاں نوکیں گالے سر بکن

اکرم ھیال

[Zahida Raees Raji]

;;;;;;;;;;;;;;;;;;;
نہ کلو ھے گوات ءَ گون اِنت نہ کپوتانی رم ءَ
ترانگاں تئ واب برتگ دید گَشتاں تئ گم ءَ

ما وتی ارس ءِ ھمک راز آئ ءِ نام ءَ کتگ
جی پما اوست ءِ کلات ءَ جی پہ دید ء مھرم ءَ

تُنْی ئیں ارمان بستگ ما ھدا ءِ دامن ءَ
مئے نسیب ءِ آپ بنداں ھؤر گواریت الّم ءَ

مئے وپا ءِ داسپان ءَ اَہد ءِ ھار ءَ ملّتگ
تو نہ منتے رنگ ءُُ داباں یا نہ منتاں من ھما

پہ جھان ءَ یک ھیال ے نیم ساہ ءُُ بے وس اِنت
زند ماریت رنگ ءُُ جلواہ تئ نگاھاں سرجم ءَ
اکرم ھیال

[Zahida Raees Raji]

بھت ءِ بےوانکی منی مرچان زدگ گنْگیں ھیال
دربگیجاں درچکی تاکے موسماں پہ ماہ ءُُ سال

تنگ دستی ءَ منا آپ دات ہزار کنڈ ءَ گشئے
ھشک بیتگ نکْ چہ نادوک ءَ کہ دنیا اِنت زوال

تئ بدیں نیّت ترا نیلیت ہچ پیما ترْھگ
منّت ءُُ لیلا من دمبرتاں،شمُشتاں گپ ءُُ گال

اَہدءِ آس شانیں ھیالاں بیا بہ سہڑین سھب ءِ گوات
یات ءِ بندوک ءَ چُڈینیت بیگھے زپتیں شمال

اکرم ءِ گنْگیں زبان ءَ درنئیت اُپار ءُُ آہ
جی پہ ناکامیں مراداں جی ببات مھر ءِ کمال
اکرم ھیال

[Zahida Raees Raji]

تئ گوھریں زھیر چو منا پُکی ءَ شِنان اَنت
چہ گمان ءَ پد روان اَنت چہ ھیال ءَ در کپان اَنت

کہ زدگ بوھان اَنت دائم منی باتن ءِ دوھیں چم
دل ءِ بانزل اَنت ٹپیگ منی بال ھم پُرشان اَنت

گم ءِ ھورکیں دیدگاں گوں وتی ارساں جیڑگاؤں
چہ جبین ءَ لھڑ بستگ چہ نگاھاں سر رچان اَنت

اے ھتم زھیر ءِ بیگہ تئ موجری ءِ پیم ءَ
درھیں موسمانی جلوہ تئ دیدگاں بلان اَنت

ھمے مھر ءِ بالی مُرگاں منا داتگ اَت شبینگ
دل ءِ واھگانی چمّگ تئ یاتاں سنگران اَنت

تو ھیال ءِ ٹپ ءُُ ٹوریں چہ گمان ءَ در نیائے
پہ نباشدیں زمانگ وتی پیم ءَ انگران اَنت