دل ورنگیٔن ملگؤر
شائر: ازیزبلوچ ۔ دادیار
بے تیی گُلیٔن دیٔمــــا نَبیت اے دِل دَمـانے دارگـا
سَـد آچِشئــے آساسُچئــی بے تیی گَمـانـی مــــارَگـا
چیّــــاکنـئے نـادِلسری دیٔمـــامَکـــن تـَـنْک و تَهـار
اےدِل سوالیـگ اِن تیـی رازیگـی کـَــن بیٔچـــارَگـا
وابانــی پاسا تان سَهَــرنامئی گُلیٔن تیی مان دپا
نالان ئه ٹُکّئی هَــردمان تیــی اِشکئے زرّیٔن تَهتگـا
رؤچے هزارجاهئیی برُن گؤن هَروڑیٔن مَهپئیکران
گْریٔت وپداکئیت تیی گْوَرا اَرسان ئه ریٔچئی شَنزّگـا
بےتوچه جاڑیٔن دیدگان اَرسانی توپّان اِن بچار !
مَــرچی دلُن ریٔشُن چَـــه تیی بانــداتیگیٔن هَـرگلِّگا
وهدے که دپ تیی هُکّهیٔن جام و شَراب اِن چؤن نبیت
جان سَجّهیٔن یکجا "دَپے" کَندان نلانچئی نؤشگا؟
رؤکِت کُتگ آسے چُشیٔن گؤن سَد شَماله اے دِلا
"مِهرئے دَما" تئیگا بگئیـرکئے داشت ئه کنـتئی ودّگا
توشاه ومن تیی دَرگهئے آ تُستگیٔن مِسکین، بیا
شاهـی کَــن و بــؤدیٔـن وتی دَرگـاهئے اےدَرمندگـا
تورؤچ و نورو گرمی ومن سرد وسارتیٔن شپ، بیا
سَرکَش چه مِهـــرئـے گُنبُدابَرجــانئےگْوَهریٔن چـلّگا
تودَشت ودَریـاودَمـن زیٔبـــاییئے سَبزیٔن چَمَــن
بــے دَروَریٔــــن بـانـــؤریئــے دُنـیـائـے زرّیٔــن کِلّگا
توآسمان و مِهــرتیــی آوش زبادیٔـن هئـورونؤد
مـــن دَشت وبَــرّے تُنّگیٔن مُهتاج پر تیــی گْـوارَگا
توباگ وآ بُستان گُلیٔن سَبزانتئی سَدگُل گؤن چَمَن
نالان مَنـــی دِل چـــؤکُلـــی پَرتیـی گُلانــی چــارَگا
تورُسْتگیٔن آجوسَری سئولئے سْپهداریٔن اَمُلّ!
اے جانئے شئیدایٔن کپؤت نِنداَن سَرئیی په وانگا
تو آ سَمینئے اَنبریٔن جَهل اِن چه گُلنؤدان زِری
شَنزّان ئه کئیت گؤن مؤلُمے پَر لــؤلـوانی دْرَنـزّگـا
گَرم وبلؤریٔن گْور تیی سُهبانی پیٔتاپ اِن گوشئے
آشؤپ ئـه پِـــرّیٔنیت و دِل شیمّــؤش کنت پرکِـنزّگا
بیاچـــؤکه پیٔتاپا دَمے یان گَل چؤکَندانیٔن گُلے
تانکه بزوریت دِل منـی سالــؤنکــی شان ومَلّگا
یَل دئے کچینبکّان و بِل بازارئے ڈیٔکیٔن هَرّگان
دیٔم پَروَتی دِلـــدادگاِچست کَن کپؤتــی گْرومْبگا
دریایا ریٔچُن دامُنا تیی گؤن دْرستیٔن گئوهــران
ٹِنگُن اگر جامے چَه تیی دیٔم رؤشنیٔن هَر کَندگا
دؤشی کـه مــن وشوابِتُن وابامنی تو "وابَتئے "
اؤدا نگهپان اے دِل اَت سَرتیی مان آیــی کؤپگـا
اَرمان اَتُن یک کترَهے نِندگ تیی گرمیٔن گْورا
نیئشتُن دلا "نادِلسریٔــن "هچ پئیم ودابے جُمبّگـا
چی اِت گوشُن نون چِکّدردؤست اِن تراگُل!اے دلا
تیی هاترا کئیت چؤن منی شَر دَست وپادئے بَندگا
بیایُــن اگر پر وادهئـے جـاهـا و"واب اَئے"ساهِگا
پِریات ئه کنت چؤمـــادَرےنئیلئی په تیی نـاوَلّـگـا
لؤٹُن اگـــردْرؤتے دئیُــن پیٔچــؤکئے دِلگاها تیـی
تُـرسیتئی شئیدایٔن دلاوابـا چـَه تیـی پـَـلّـــرزگـا
وهدے که گندُن وپتگئے واب اِن گوشئے کُلّیٔن جهان
گواتگیٔچنے کنت دِل وتا لَگـّیَـت گڑا تـیی گیٔچگا
تانکه بزانئے بوتگُن مان وادهئے جـــاهـــا زی من
گــؤن مَلّـگیٔن ڈیلّــے په تیــی آ پُـرمُــرادیٔـن گِندگا
مَلگؤرئے کِرّی تیی کُتگ رنگیٔن گؤن هـؤنااےدلا
بِل تان بزانئے آتکگُن"مودان که بئےمان رَنــدگا"
اَنون که زانئےاے دِلا، دؤست اِن تراگُل! چِکّدر
آدیٔنکئے دیٔمــاکِنزّ و چـــار دُرّیٔــن دپئـے بِچکنــدگـا
بے تـونبی اُؤمان منـا سَهــت و دمـان و کَترهے
سؤچکیٔن زهیــرانــی جَــلا کَشُّن چـــه دل اُهکارگـا
هاتِرکه رنجیٔنتگ دلابوتُن "هئیالئے"من گُلام
بَلکیٔن همــابِلّئی منـا تیــی دست وپـادئــے پُنـڈگـا
وهدے که گؤن یک چَمُکےمنّ اِت هئیالا "واهَگُن"
کامـے چَه تومن کیٔچتگ چا وَهـم ووابئـےهــؤشگا
مـرتُن چــه تیــی بےمِهریان بارُن چَه اندؤه وگمان
ریٔشیٔــن دِلئے واگ ومَهــار گیٔشترنَبـی نون جَلّگـا
بیــاکه چــَه دَستا دَرْشُتگ اےدل، بجؤڑیٔن چارَهے
تُرسُن که رازا مئیگ و تیی سَرکنت په هَردَروازگـا
یان مِهرئی گواریٔن گؤن دپئے گَلنازُکیٔن بِچْکندگان
یان ڈکّئی جَن گؤن هَنجرے بِل تان کپئی چَه نارَگـا
من تیی مُریداُن مَهجبین! گؤن شئیر و اےداگان جَلیٔن
دَر کَپ چه کُـــلّا "هانگلــی"دِرّ" بے وپایــی پردگـا
رَهمے بکن چـــــؤ"هـــانُلا" پراے مُـــریدا کــه پــه تو
هَپتــاد وهَپـت داگئی پراِنت هَپتادوهَپت بَنـد و رَگا
بیــا او گـرانازیٔن اَمُــل! من لَلّئوان هـــؤتیٔن په تو!
پَر تیــی مُـرادانــی رَهـــا مَلّان ئه بُــن هَر کَنڈگـا
کیایئے پئیما تاچَگُن مِهرئے شِلنگادیٔم په تو
بیــا چــــؤ"سَدو" پلّیٔــن دلئُــن پر اِنتـــزارے دارَگا
توماهُو و مئیرم منی ،مَهنازو آ هانُل گُلیٔن
مــن اُؤمـــر و اِزّت تیــی شَهداد و شئیه اے کَـلگا
نَدراُن په تیی درّیٔن دَپئےهَر شَکّلیٔن گالا که آ
شؤداَن چَه دِل نادؤستیئے هَرزنگ وزَهْرئے ریٔنگا
هَمراهی اِت زِندآپن و مان زندئے شهجوّا تَچان
رؤپیـت چـَـه شئیــدایٔن دِلادَهْرئے سیاهــیٔن کیٔنگا
گؤن مِهرئے نؤدان میٔنگئے "اَهْدو وپایانی" گُلا
نئیلئے سراپِگــرےکـَـــدی پـَـر اے دلئــے رَمبیٔنگا
من تیی گلام اُن واهَگ وهَر ڈکّ ونیمؤنئے اَمُلّ!
وَهدے که چؤوش نِشتگئے تِپلیٔن دلئے چَنڈیٔنگا
دابــے که توسَهْریٔنگئے رَنجیٔن دِلئــےاے کـــؤدکا
سَد جان منی کئولیگ ئه بیت پَرتیـی چُشیٔن رؤدیٔنگا
گؤن آه ئه سؤچُن هَرسَهَر من وشنیاتکانی دِلا
بِل تان مَبنـداَن دل په تیــی پُلّیٔــن دِلئــے رَنجیٔنگا
چؤن من مئیاریگُن په تیی دُرّیٔن سَرئے شئیداییا؟
وَهدے که وت کایئے په گَل پَراے دِلئےچَمبیٔنگا
وسپان که دُرّیٔن اِشکنئے گؤن گؤهریٔن گالان منی
کَندان ئه بئے گؤن سَددَپ ودْرکّئے دلئےناچیٔنگا
وپسئے منی دیٔما گُنامَلگؤر و مُودان ڈکُّمیٔن
لُنٹّــان سُریٔنئــے لَهمَـکـــےچمّــان کنئے وابگیٔنگا
کارئےمنی دیٔمابَرے مارمِتْکگیٔن مؤردانگان
لَرزیٔنئے گه گؤن لیٔٹگے تْرنْجیٔن بَران مان سیٔنگا
گؤن آوتی بِچْکندگئے هئورانی نَرمیٔن تْرمپُکان
دْرِکّئے منی جان و دِلئے هُشکین رَگانی میٔنگا
وَهدے که دْرَپشَنت تیی سَروسَرسیٔنگئے سَنجاک وسَهت
نِنــدئـے دِلا شیـرکِن تـراَچ هَـــرکؤه وباگئے بیٔنگا
چَمّانی آدیٔنکئے تَهاوَهدے که نِندئے اےوَڑا
بئے آسمـانے تــوگوشئے پُرّاِن چَــــه هَررَنگینگا
شَپ تان سَباهانشتگُن "واب وهئیالا" تَنْـتَـنا
شئیــرو گَـزَل وشزیٔملیٔـن بَنــدُن پــه تیـی نازیٔنگــا
چَمّانی چارَگ آسْکلیٔن وشّیٔن توارئے زیٔملِت
تیراَن جَگرسؤچیٔن گوشئے هَرزَهْرگئے لَرزیٔنگا
تِکا که گندُن دَستُکئے لُنٹئے نِشانا گُمچهیٔن
رئو هؤش وسارُن چَه سَرا گنتر چـَـه هَـردیٔوانگا
وَش چامَلیٔن آ بُرّوبَند گؤن آ بْراهاماهَلیٔن
انچیٔن سِلاه اَنت تیی که نے هچگؤنگیٔن مَهگؤنگا
گؤن اے سِلاهان جَه جَن و وئیلیٔن دِلئے سئیدابیا
واب اِن مان تیی دُرّیٔن سَرئے مِهرانی سارتیٔن چمّگا
تیی نِندوپادایئے چَم وآ داب و نازان چےگوشُن
نیٔستِن چُشیٔن نـاز و کِهــیٔب دنیــایئــےهِــچ دُردانگا
وَسْواسئے آس وآچِشا پرّیٔنئے جانئے جَنگلا
رَنــداپـه"کُــربانے" گوشَگ سؤچئــے دِلـئے پَروانگا
زانتُن هما رؤچی که تو گَل کُت چه تئوسیپان منی
کائے پــه اے پُلیٔـن دِل و جــان وسَرئـے باهیٔنگا
هردم منارنجیٔنگئے بِل تان سِدئی اے دِل چه تو
گؤن سَبرئے زَمزیلّا گرُن بَندانئی مان تیی کؤپَگا
زهران وسَرسَنگین که بئے گؤن من پَه نیمّؤنے اگر
زانُن منـی ڈئــولا پَـــداکایئـــے مان یکّیٔن هَپتَگا
کُربان په "نیمّؤنان" که تیی بؤجیگ ئه بنت بِرگردگئے
نــدرُن په" ڈَکّانت" که آلؤٹنت چه من تیی واهَگا
بِلّی نمنّئیگُن په دَپ گؤن من نیئے سَر زاهرا
زانُـن بَلــه زِردِت چَـــــه مـــن شئیــدا تـراِن پَــرمَنّگا
گندُن که چؤن اُژناگ ئه بئےوَسپانی نیبلؤیٔن زِرا
چمبّئے چِه پئیماگؤن منی گالان په گَل بےپَردگا
بَس اِن مَکّجیٔن نون وتی تئوریٔنتگیٔن زِردا اَمُلّ!
بِشکُن که زی چےگوشتگُن بَهتئے تِلاهیٔن ماسَگا:
گْوَزکن چه هَلکئے تانه وبازارئے تَژْنانی جَلا
"اِشکئے شـرابـا تـام نے بے درد و رنجــئے کشّگا"
گَل کَن بیا که تیی دِلئے رَنجانی ٹُؤلَک تُمبّــِتگ
میــران گُــلاییش اِن پـــه تــو زرّیٔــن کَــلاتے بنــدگا"
زِردئےمُراد وواهگئی تیی دَرْگهادُرّیٔن اِش اِنت:
وَهدے پـــه تواؤمــان ئــه کَنت بِلّئــی گڑا پـَه نالَگا
کاریانی چاشتئے ـ رؤچا ـ یکشنبه ۴ نومبر
