لچہ " عہد سازیں مئے عطا "
13 فروری ، نمیرانیں عطاشاد ءِ سالروچ ءِ درگت ءَ
اسلم قادر ۔ کیچ
مژدوار گشئے داسپاں
دروریں تئی نامے ءَ
تُنگ انت گشئے ماھکاں
دیدے ءِِ تئی رژنے ءَ
گسر ھمک مساپرانت
منزل ءِ چہ راہے ءِِ
زنگ زرتگ دپتراں
سینگ ءَ مشتگ وتی
زانت ءِ مہتابیں جنک
نوں سر ءِ رندگ نزانت
جور دپ ءَ برچکندگاں
چو گشئے کندگ نزانت
سر بتک نوں کارواں
کشکے ءِ رندگ نزانت
شئر گشیں نوں شاعرے
شئرے ءِِ بندگ نزانت
کیچ ترا کنتیں توار
شال پتو چوں زھیروار
ترک ات انت بولان ءِ کوہ
آس داتگ سیوی ءَ
ستکگ انت پل ءُ گلاب
ھورک گشئے گنجیں کتاب
آس لگ ات مکتباں
لنککاں ستک انت قلم
پرشت انت گشئے زانت ءِ قدم
نابزانتی حاکم انت
زانتے ءِ نوں میتگ ءَ
بیا بکن واتر پدا
عہدسازیں مئے عطا
