Author Topic: راج ءِ پجار منی گار نہ بیت  (Read 5436 times)

0 Members and 1 Guest are viewing this topic.

Offline Zahida Raees Raji

  • Administrator
  • *****
  • Posts: 7107
  • Karma: 356
    • Baask-Home of Baluchi Language, Literature & Culture
راج ءِ پجار منی گار نہ بیت
« on: March 02, 2014, 07:51:52 PM »

راج ءِ پجار منی گار نہ بیت

 دنیا ءِ تہا اے دودے جوڑ بوتگ کہ کجام ھم راجے ترا پروش دئیگی انت  پیسرا آئ ءِ تہا ناتپاکی ءِ توم ءَ بہ کش تاں وت ماں وتی جنگ جدل ءَ وتی شری ءُ بدی ءَ بیھال بہ کن انت پداآھانی ماتی ءُ راجی زبان ءَ پچ بہ گرءُ بارور بہ کنائین کہ گوں اے زبان ءَ تو وتی زندگی ءِ ھچ کار ءَ دیمروئ کُت نہ کنئے
ءُ تئ زبان دگہ زبانانی چپ ءُ راست کنگ ءَ جوڑ بوتگ ءُ پدا آئ ءِ پجار ءِ ھمک شریں چیزان چہ آئ ءَ دیر بہ دار ءُ بدیں چیزاں انچوش بہ مُش کہ آ پسکگ کنگ مہ زانت۔ وھدے اے چیز بوت بزاں کہ نوں آ تئ گلام جوڑ بوتگ۔
چہ بلوچ ءِ راجدپتر یا تاریخ ءَ پدر انت کہ بلوچ راج ءِ پُروش دئیگ ءِ ھاترا آئ ءِ زبان ءَ بہ گرتاں دود ءُ ربئیت ءِ پجار گار کنگ ءِ بازیں جہد کنگ بوتگ انت بازیں جاہاں آھاں مارا تاوان بہر ھم کُتگ بلے زندگیں راج چہ  وتی نُزوریاں ھجبر چماں چُپت نہ کنت ءُ نئیکہ کسے ءَ اجازہ دنت پہ وتی زبان ءُ راج ءِ پجار ءَ پہکا گار کنگ ءَ ۔
پمشکا نوں کہ کسے مارا ماں بلوچی پوشاک ءَ بہ گندایت دمانے ءَ پگر جنت کہ اے مردم بلوچ  بوت کننت۔ وھدے مارا ماں بلوچی زبانءَ گپ ءُ تران ءَ ایشکُنت ھما دمان ءَ زانت کہ اے بلوچ اَنت وھدے مئے زندگی ءِ تک ءُ پہناتانی سرا وتی چماں گوں نیک نیّتی ءَ شانک بہ دنت مئےمھمان جلی ءُ میار جلی ءَ بہ گندایت المّا سرپد بنت کہ اے ھما راج ء مردم انت کہ آھانی دود ءُ ربئیت پہکا گار کنگ نہ بوتگ ۔
آ راجےکہ چہ وتی پوشاک، وتی زبان ءُ وتی راجی کار ءُ کرداں شموشکاربنت آئ ءَ مدام زلورت کپیت کہ دنیا ءَ بُگوشیت من کئیاں؟ منی پُشت چی  انت ءُ منی پجار چی انت؟
بلے پہ ھماہاں کہ دود ءُ ربئیت ءِ زندگی ءِ بَہر انت آ ھاں جار جنگ ءِ زلورت ھجبر نہ بیت کہ آھانی پجار چی انت،  چُش کہ مئے لہتے ھمسائیگیں کوم کن انت۔
 ستر آ وتا میڈیا ءِ دیما مزن ءُ بُزتر پیش بہ دارانت بلے دنیا ءِ اے دگہ ملکاں کہ سر بنت آھانی کار ءُ کرد وت دنیا ءِ دیما چاپ جن انت کہ آھانی اصل پجار چی انت۔
بلے اے گپ ھم مننگی انت کہ دژمن تئ بدیں پجّار ءَ دنیا ءِ دیما منینگ ءِ ھاترا میڈیا ءَ ھرداب ءَ کارمرز کنگ ءِ صلاحیت ایر کنت  ءُ تاں تو ھوش بہ کنئے تئ دمب ءَ شرّی ءِ جاہ ءَ بدی ءِ نام لچینگ بیت ءُ پدا یک اُمرے پکار انت پہ ایشانی دیر کنگ ءَ
سال دوھزارشش ءُ ھپت ءَ وھدے اَئیدانی ماہ روچاں نیٹ ءِ سرا پاکستانی گُدانی نمائش ءِ سرا چم کپت انت گُڑا سک اجّکہ بوتاں کہ بلوچی دوچی ئیں پشک ءِ سرا سندھی لباس ءِ لیبل جتگ ات۔ وھدے مں جاک جت کہ اے بلوچی انت پرچیا سندھی گُشگ بئیگائینت ءُ بلوچی لباس کج انت؟ گُڑا ایشاں پسّو دات کہ اے سندھی انت ءُ بلوچاں پہ وام زُرتگ۔
اے گپ ستر دروگے ات بلے دنیا ءَ باور کنائینگ ءَ میڈیا ءَ وتی مزنیں جہدے کُتگ کہ ھما ھما چیز بلوچان ئیگ انت آ اے دگہ راجانی نام ءِ سرا لچینگ بوتگ انت ءُ آ چیزے کہ بلوچانی ھجبرنہ بوتگ انت  آ بلوچانی سرا مُشگ بوتگ انت ءُ انچش لِچینگ بوتگ انت کہ بازیں بلوچانی وتی جند ھم ایشانی مننوک اتنت۔
پدا آ روچاں نیٹ ءِ سرا ھم بید چہ یک سُہریں بلوچی پشکے ءِ دگہ اکسے نیست ات کہ ما پہ ثبوت ایشاں پیش داشت بہ کُتیں کہ شما دروگئے ءُ ماراست ءُ ھمیں گپ ءَ مارا مجبور کُت کہ بلوچی گدانی نمائش ماں باسک پلیٹ فارم ءِ سرا ایر بہ کنئیں ءُ بلوچی پوشاکانی اکساں دیما بیارایں۔ نوں وَ ھیر نیٹ پُر انت ءُ باید گیشتر بہ بیت۔
اے گپ ءِ جَنئگ ءِ مول ءُ مراد ایش انت کہ دود ءُ ربیت ستر زندگی ءِ بہر انت بلے زندگیں راجانی تہا وھدے ناتپاکی جاہ کنت گُڑا دژمن وتی کُلیں وسائل ءَ کارمر کنت تئ نام ءِ ھراب کنگ ءُ پجار ءَ گار کنگ ءَ ۔

کلچر ڈے ءِ چونائ ءَ زلورت نیست ات کہ ما وتی بلوچی پوشاک ءَ ھمروچ گورا کنئیں، وتی شرکنیں ماتی زبان ءَ ھمروچ گپ جنئیں ءُ وتی دود ءُ ربئیت ءَ مدام زندگ دارئیں بلے مئے چاگرد ءَ کہ بلوچ ءِ زیبداریں پوشاک ءَ درآمدءِ کنگ ءِ مدام جار جنگ بئیگائینت ءُ درآمدانی سلّی مئے سرا مُشگ بئیگائینت اے ساھت ءَ زلورت اے چیزئیگ انت کہ ما ھما وسائلاں کارمرز بہ کنئیں کہ مئے ھلاپ کار کنگ بئیگاانت ءُ پیش بہ داریں کہ

 تو سترجاک بہ جن، دروگ بہ بند ، ایر بہ جن ۔۔ ۔  راج ءِ پجارمنی چَیر نہ بیت گار نہ بیت۔

زاھدہ رئیس راجی

01 مارچ 2014

9:39 PM

 
Zahida Raees :Raji:
baaskadmin@gmail.com , admin@baask.com
Learn Baluchi Composing in INPAGE
Learn Balochi Poetry Background Designing
Help Line