فرانز کافکا ءُ۔۔۔۔۔۔۔۔ زندگی ءِ فلسفہ
بے شک کافکا ہمک وانوک ءَ وتی گوما نہ بارت۔۔۔۔۔ بلئے اگاں وانوک سگین ئیں وانوکے بہ بیت گڑاں کافکا آئی ءَ الم آپسرے سر کنت۔۔۔۔ آئی ءِ گدار بہ بنت یا کہ نبشتہ کتگیں واب بہ بنت کافکا مدام زندگی ءِ بازار ءَ انت۔۔۔۔۔۔ اگاں کسے زندگی ءِ فلسفہ ءَ فہمگ لوٹیت گڑاں لازم کافکا ءَ بہ وان ایت۔۔۔۔۔ 27 جون 1913 ءَ کافکا وتی دوست ءَ نمدی یے نبشتہ کنت کہ من یک بد بھتیں انسانے آں۔ منی دیما بازیں سوال انت ءُ منا تچگ ءَ راہ نیست۔۔۔۔۔ اصل ءَ زندگی ءِ مستریں فلسفہ ہمیش انت کہ سوال تئی دیما بہ بنت ءُ ترا پدا تچگ ءَ راہ مہ بیت۔ بازیں نگدکار کافکا ءَ دلپروشیں انسانے لیکھ ایت بلئے اصل ءَ منی حیال ءَ چو نہ انت۔ آ جاہے وت نبشتہ کنت کہ دلپروش مہ بو اے راستی ءَ کہ تو دلپروش بوت نہ کنئے، ترا معلوم بہ بیت کہ ہر چیز ہلاس بوتگ، گڑاں نوکیں قوت تئی کمک ءَ کاینت، حقیقت ءَ ہمیشی ءِ مطلب انت کہ تو زندگ ئے۔۔۔۔۔۔ منی حیالاں کافکا ءِ سرا درستاں وشتر البرٹ کامیو ءَ نبشتہ کتگ کامیو ہم ہمے گپ ءَ جنت کہ کافکا پُر امیتیں نبشتہ کارے بلئے شرگداراں آ نہ فہم اتگ۔۔۔۔۔ کافکا جاہے نبشتہ کنت کہ مرگ ءَ چہ پد انسان چہ وتی جاہ ءَ کنزیت گڑاں آئی ءِ حیقیقت بوت کنت کہ دیما بئیت، اگاں اے حساب ءَ ما بچاریں گڑاں کافکا وت ہم مرگ ءَ چہ پد دیما اتکگ مروچی کافکا کہ لبزانک ءِ شہنشاہ گشئگ بیت بلئے زندگی ءَ آئی ءِ اینچو بستار نہ بوتگ۔ پمیشکا آئی ءَ وتی دوست ءَ را بنشتہ کتگ کہ منی درستیں نبشتہ کتگیں چیز ماندارگ بہ بنت۔۔۔۔۔۔ بلئے دوست ءَ آئی ءِ اے لوٹ سرجم نہ کتگ۔۔۔۔۔۔۔۔۔۔ من کہ کافکا ءَ واناں منی دیما گشئے نطشے ءِ زردشت کیت ءُ اوشتیت گالوار کنت کہ درد ہم یک لذتے، بد دعا ہم نیکیں دعایے، شپ ءَ ہم روچے گون انت، چداں چہ روئے گڑاں ترا معلوم بیت کہ عقلمند ہم گنوکے۔۔۔۔۔۔۔۔ ما گندیں جمبر گوارگا انت بلئے مارا کدی اے سما نہ بیت کہ یک درچکے ءِ چیرا کسانیں مورے اوشتاتگ ءُ جیڑگ ءَ انت ہور بہ کٹیت من وتی کونڈ ءَ چوں سر باں۔۔۔۔۔۔۔۔ من مدام کافکا ءَ واناں گڑاں سما بیت کہ آ ہر ساعت وتی رنگ ءَ بدل کنگا انت۔۔۔۔۔۔ کافکا ءِ وانگ ءَ چہ پد مردم ءَ سما بیت زندگی اے نہ انت کہ ما گوازینگائیں بلکیں اے یک مزاقے مئے گوما بوہگ ءَ انت۔۔۔۔۔۔۔۔۔ زندگی ءِ حقیقی رنگ چہ تئی اجکہ بوہگ ءَ پدر بنت۔۔۔۔۔ نوں تو کجام رنگ ءَ اجکہ بئے آ تئی سرا انت۔۔۔۔
۔۔۔۔۔۔۔۔۔۔۔۔۔۔۔۔چندن ساچ۔۔۔۔۔۔۔۔
