(وپتگیں مرد ءِ میش نَر کاریت، تارق پشوکانی)
مئے بھشتیں پیشوکان ءَ یک کُٹمے ھست اِنت کہ نام اِش,, ھمدانی،، اِنت- اے کٹم ءَ یک ھیلے بلکیں بَدیں ھیلے ھست اِنت کہ آ وتی واب ءَ (نیمروچ ئیگ ءَ) “بزاں ھمے واب کہ مُلّا ھم ایشی ءِ ھکّ ءَ اَنت خیلولا ئےِ گُش اَنت” ھرچ ھال ءَ جَن اَنت ئےِ – اے مردم بید ء نیمروچ ءِ واب گنوک بنت، بلکیں بازینے بیتگ ھم،
بلے یک ھسابے ءَ نیمروچ ءِ واب شرّ اِنت کہ شیتان مردم ءَ باز نہ بڈّ ایت ءُ کُنّت نہ کنت، مردم شپ ءَ واب ھم کم گند ایت، بے واب ءَ چون واب گیپت؟،،
چوناھا اے کُٹم وتی پیرُکانی، سُلتان ءِ داتگیں ٹیکی بزان زمیناں گوں باز نام دار اَنت، ایشاناں ایکڑی ھمدانی ھم گُش اَنت- بازیناں وتی ایکڑ بھا کتگ اَنت، ءُ آ گوادر ءَ جاہ منند اَنت- ایشانی گُشگ ءِ پد ءَ کہ ما اسل ءَ عرب قوم ءَ چہ ودی بیتگیں ءُ رند ءَ مارا پہ لٹّ ءُ کُٹّ بلوچ اِش کتگ-،،
منی ھیال ءَ شُمئے سمجھ ءَ نیاتک؟ پرچا کہ شُما ایوک ءَ غیر مسلمان ءِ مسلمان کنگ اِشکُتگ ءُ اے گُش اَنت کہ ما عرب ءَ چہ بلوچ کنگ بیتگیں، بلے شُما پریشان مہ بئیت کہ منی گپّ راست اَنت من اوں بدبھتی ءَ مات ءِ نیمگ ءَ ھمدانی یے آں، پمیشکا من ایشانی کسّو ءَ سھیگ ءُ سرپد آں، اے گُش اَنت کہ سُلتان ءِ زمانگ ءَ کہ پیشوکان ءَ آئی ھکومتی کہ بیتگ گڑا مئے بُن بُلکّ ءَ گوں عربے ءَ سور ءُ آروس کتگ ءُ ما ھمائی ءِ کُڑاسگیں،
چوناھا مشکت ءَ ڈنّ یک جاگہ یے ھست اِنت- کہ نام ئےِ,, بِرکا،، اِنت، اود ءَ مئے حمدانی عربی قبیلہ ھست اَنت-،، ھمے عربیں حمدانی آنی وشّتریں وراک گوج اِنت- ایشاں کہ گوجے دیست گڑا بزاں کہ کُچِکّ ءَ ھڈّے، گوک ءَ کڈّبے ءُ Tom ءَ Jerry دیستگ-،،
ھیر! آ وَ دگے جیڑھے،
بلے پیشوکان ءِ نزیکیں ھند ءُ دمگاں چْوشکہ گوادر، جیمڑی ءُ گنز ءَ ایشانی نیم روچی واب ءِ کسّو سکّ مشھور اَنت- کہ ایشاناں وتی واب ءِ ھاتر ءَ وتی زمین دگرانی ناماں کھتونی کتگ اَنت- آ چو اے وڑ ءَ اگاں اے یکّے ءِ لوگ ءَ مہمان بیتگ اَنت- ءُ لوگ واجہ ءَ ایشانی نیمروچ ءِ واب ءِ بند ءُ بست کتگ- گڑا ھردے کہ اے عصر ءِ بانگ ءَ پد گُڈ اِتگ اَنت بزاں پاد اتکگ اَنت- ایشاں وتی یک ءُ دو ایکٹر لوگ واجہ ءَ پہ نیمروچ ءِ واب ءِ پُشت ءَ داشتگ ءُ بکشاتگ اَنت-
من بلوچی بتلانی ھکّ ءَ آں بازیں بتلاں مارا شرّیں پنت ءُ سوج دنت- بلے اے بتل ءِ سر ءَ من ءَ کمّو شکّ اِنت کہ “وپتگیں مرد ءِ میش نَر کار اِیت-،، پرچا کہ ھمدانی آں وتی تیوگیں ھپت پُشتی زند گوں نیمروچ ءِ واب ءَ گوازینتگ بلے ھرام بات کہ ایشانی میش نَر بیار ایت-،،
