آزمانک : مراد جنگل ءَ شت، آزمانکار:اکرم ارس
آزمانک : مراد جنگل ءَ شت
آزمانکار:اکرم ارس
مرچی ائید ءِ سھب انت شپ نوکی گوربام انت مراد ءِ مات مراد ءِ سرون ءَ اتک ءُ اوشتات ءُ گشت ابا پادا مرچی ائید انت جان ءَ شود کیامت ءَ پُگل بئے شر نہ انت، مراد سر چست کت ءُ پد ءَ وپت دیر نہ گوست روچ اوں دراتک بلے مراد پاد نیاتک درستیں زھگاں نوکیں پُچ پِر کتگ ات گل ءَ بال اتاں کماشاں پس کُشتگ ات انت بھر ءُ ونڈ اِش کت انت
مراد ءِ کماش ءَ مراد پہ زھر توار کت بچ ءَ پادا سرجمیں روچ واب ئے مرچی وشیں روچے تو انگت واب ئے بلے مراد ءَ پاد آیگ دل ءَ نہ ات بلے زاناں روچ ءِ برانزاں پاد کت، پاد اتک ءُ شت چم ءِ ششت انت یک کوپے چاہ ءِ وارت ءُ تاں دیست ئے لوگ ءِ درستیں مردماں نوکیں پُچ پر کتگ ءُ شات ءُ گَل انت آئی وتی لوگ ءِ مردم گلی ءَ دیست انت آئی لنٹاں بچکندے تالان بوت آئی چم وھدے وتی گس ءِ دپ ءِ درچک ءَ کپت انت پد ءَ ابیتک بوت
مراد انگت نشتگ ات چو ھمک روچی ئیں وڑ ءَ وتی پیم ءَ ات مراد ءِ پت ءَ مراد ءَ توار کت پادا برو جان ءَ شود پچاں پَر کن رواں نماز ءَ نماز ءَ پش کپ آں مراد ءَ لوٹ اِت پت ءَ را گپے بہ گشاں دگہ ھچ ءِ نہ گشت ءُ پسہ ئِے دات ابا تو برو من وتی وڑ ءَ جان شوداں کایاں مراد ءِ لوگ ءِ مردم درست شت انت ھمساھگانی لوگ ءَ مراد ءِ پت اوں شت مراد تھنا نشتگ ات کسے ءَ اگاں مراد بہ دیستیں کسے ءَ اے گپ سما نہ کت مرچی ائید انت پرچا کہ ھمک روچی ئیں روچانی وڑ ءَ نشتگ ات سر ءِ بونژاں بانژ ات
ھمے ساھت ءَ مراد ءِ سنگتے مراد ءِ گورا اتک مراد ءَ کتابے دیم ءَ ات وانگ ءَ ات کتاب ھلاسی ات چندے تاک دیم پش کپتگ ات مراد ءَ سنگت دیست کتاب ءِ دپ ءِ بند کت ءُ سنگت ءَ را توار ءِ کت ءُ نندگ ءَ پہ سلاہ ءِ جت سنگت نشت سنگت ءَ مراد ءَ دیست تاں ھیران بوت کہ مرچی ائید انت مردم یک ءُ دومی دیدار ءَ کنگ ءَ انت شاتکامی کنگ ءَ انت اے ھمد ءَ نشتگ انگت جان ءِ نہ ششتگ ءُ کتاباں دز گٹ انت سنگت ءَ مراد ءَ گشت برو جان ءَ شود بیا رؤئیں سنگتانی گورا مرچی گردگ ءُ سیل ءَ رواں مرچی وشیں روچے تو نشتگ ءُ گم جت ئے ترا چی انت
مراد ءَ سنگت ءَ را چار ات دیر ءَ پد باز جیڑگ ءَ رند گشت ئے
شمے گورا وشی ءُ گم ءِ ھچ بزانتے نیست تھنا پہ وت جیڑات پمیشکا شمارا سما نیست مرچیگیں روچ بہ گند ئے پہ شما وشیں روچے بلے پہ من وشی دگہ چیزے
مراد ءَ دست پہ وتی لوگ ءِ دپ ءِ درچک ءَ ٹال کت ءُ گشت اے درچک ءَ گند ئے ایشی ءِ سرا نشتگیں کپوت ءَ گند ئے تو سرپد ئے اے کپوت ھمک سھب کیت اد ءَ نندیت کو کو نہ کنت اے کپوت زان ئے پرچا کو کو نہ کنت سالے بیت کہ درچک ءِ تاک کپتگ انت ھشکیں شاھڈے پیسرا اے درچک سبز بوتگ ایشی ءِ سرا مدام کپوتاں کوکو کتگ ءُ بلبلاں شینزار اتگ بلے مرچاں سرجم ءَ ابیتکی انت چہ کہ اے درچک ءِ تاک کپتگ انت
مراد ءِ سنگت ءَ دیر بوھگ ءَ ات آئی ءَ زانت مراد گوں من نئے ات گوں آ پاد اتک ءُ شت ءُ وھدے روچ بیگاہ بوت مراد ءِ گس ءِ مردم درست واتر گس ءَ اتک انت گس ءَ تاں دیست اِش کہ گس ءِ دیم ءِ درچک ءَ مراد ءِ نوکیں پُچ ءُ سواس چادر ٹنگ اتگ ھمے ساھت ءَ مراد ءِ درچک ءَ ٹنگ اتگیں پچانی جیب ءَ کاگدے دراتک مراد ءِ پت ءِ پادانی دیم ءَ کپت کاگد مراد ءِ کستریں برات ءَ ونت کہ نبشتگ ات،
من رؤگ ءَ آں جنگل ءَ پہ وتی گم جتیں کپوت ءَ کوکو یے کاراں