آزمانک: ھمساھگءِ شیشگیں نگاہ ۔ جلیل فیض
آزمانک: ھمساھگءِ شیشگیں نگاہ ۔ جلیل فیض
من آئی دیوانگ بیتگ اِتاں- دیوان اِتاں آئیءِدوئیں بادامی ءُ پلگاریں دیدگانی کہ تھاریں لوگےءَ چو دو چراگءَ روک اِتنت،آ کہ اتکءُ مئے کشءِ لوگءَ مئے ھمسائگیءَ جاہ مِنند بیت-منی کوٹی ءُ آئی ءِ کوٹی ءِ دریگ دیم پہ دیم اِتنت، اولی روچ ءَ من وتی کوٹیءِ دریگءِپردہ جت ءُ پدا دریگ بند کت…بلےرندءَگُشئے مجبور بیتاں منی دستءَ نہ ات ھپتگےءَ رند ھر روچ کہ چہ کارءَواتربیتاں دگہ کاریل دات انتءُدریگ ءِدیمءَنِشتاں کہ آئیءَبِچاراں، آئیءَ بِگنداں کہ گوں اوّلی نگاہ ءَ منءَ دیوانگ ئےِ کتگ ات-آھرروچ روزردءَدریگءِدپءَنشتگ ات ءُ وتی سیاہ ءُ بزیں ۔ھپرئےِ گْواتءِدستءَ داتگ اتنت۔
ھُداءَ پہ وڑے آئی سورت ساز اِتگ ات بلے کمّو گم ءِ تنداں آئی ماھیں سورتءِسرا بستگ ات،مدام چشمکےچمّءَ ات ئےِکہ آئیءِشیپگیں پونز ءِسرا ایر ات، مدام چمّ ئےِمنی دریگءَ ءُمنءَسکّ اِتنتءُ من اوں آئی ءِ ساھریں دیدگاں بے سُدّ چہ جھان ءَ چم سکّ داتگ اتنت، اگاں اناگہ منیءُآئیءِچمّ دُچاربیتگ اتنت تہ منی دل ءَ دریکگ بِندات کتگ ات، چہ دیر ءَ برے برےآئیءَرنگ لگشتگ ایں بچکندےمنی نیمءَشانک داتگ ات، برےبرےگوں دستاں منی نیمگءَاشارہ یےھم کتگ اَت…بگندئے من ردآں؟بلکیں من وابےگندگا اِتاں؟بلکیں اے دْراہ وتساچیں ھیال اِتاں؟ اگاں اناگہ یک روچےدریگ ئےِبندبیتگ ات تہ کوھیں گماں منی دلءَجاگہ کتگ اتءُوتسرءَمنی ارس رِتکگ اِتنت… مدام منی ھمے واھگ بیتگ ات کہ آئی ءِ چماّں چہ نزّیک ءَ بہ گِنداں ءُ گوں آئی ءَ گپّ بہ جناں…
اناگہ یکروچے شرّیں موقع ے من ءَ دست کپت، آ روچی ھم آ دریگءِدپءَنشتگ ات گوں ہوتی سبزیں گُشانءَ لیبءَات،آ باریں کجام ھیالانی تھا گار ات، گوات ھم گوں آئیءِگُشانءَلیبءَات،کہ ھمےدمانءَگْواتءَ آئیءِگُشان گوں وتابُرت،بلےآچہ گْواتءِاے شیتانی ءَ بے سما انگت وتی ھیالانی زر ءَ اوژناگءَات…
من انچوکہ اےنِدارہ دیست تچانءَڈنّءَدراتک کہ آئیءِ گُشانءَبزیراںءُ آئیءَ را سر ئےِ بہ کناں، منی دل زور زورءَ دریکگءَات، آئیءِگُشان زُرتءُآئیءِدرءِدپ ءَ شتاں اوشتاتاں،در اوں ٹُکّ اِت ءُ آئی ءِ جندءَ در پچ کت، آئیءِ وشّیں کدّ ءُ بالادءِ گندگ ءَ منی زبان ھُشک ترّ اِت ءُ من م…. م… ءَ لگّ اِتاں-
بہ بکش بانک! تئی گُشان ڈن ءَ کپتہ بیتگ…
مِنّت وار آں-
گُشان من آئی ءِ نیمگ ءَ شہار اِتءُگُشانءِ زیرگءِوھدءَمنی دستءَگوں آئیءِدستءَ ڈیکّ وارت ءُ ھمے دمان ءَ منی دل گیشتر دریکگءَلگّ اِت-…
من تئی ھمسائگ آں، تو الّم منءَ دیستگ، منی ءُ تئی کوٹی دیم پہ دیم اَنت، تو ھر روچ دریگ ءِ دپ ءَ نند ئے لازم تو من ءَ دیستگ… گوں ھیرانیءَ گشت ئےِ: ھو! بلے “تو مئے ھمسائگ ئے؟؟؟، بلے من ترا نہ دیستگ-
چشمک ئےِ چمّءَنہ ات من چہ نزّیکءَآئیءِ چمّ دیست آں آئیءِچمّ چو استالءَترپگءَ اتنت، بلے من ھیران اِتاں کہ چِتو من ءَ نہ دیستگ ئےِ؟ دوسئےھپتگ بیت کہ ھر روچ دریگ ءِ دپ ءَ کیت ءُ منءَ چاریت….
من کسّ نہ دیستگ، من کسّ ءَ دیست نہ کناں!!!
گْوش ئےگمےآئیءِزبانءَدراَت آئیءِ توار ھم لرزگ ءَ ات… من گشت! چتور،تو دیست نہ کن ئے؟ کسّ وتی چماّں بند وَ نہ کنت،، گشت ئےِ:کہ من دیست نہ کناں!! من!!! گوں ھمے گپّاں درئےِ بند کت ءُ من ھما جاگہ ءَ گوں ارسی ایں چمّاں ھیرانی ءَ داں دیراں اوشتاتاں-