آسمان بار امانت۔نبشتہ کار: ڈاکٹر اے آر داد
آسمان بار امانت۔
نبشتہ کار: ڈاکٹر اے آر داد
نبشتہ کار: ڈاکٹر اے آر داد
۔۔۔
مردم باید انت کار ءِ ساڑا ءَ بکنت۔کار ءَ کَے کنت ایشی ءَ چارگ مہ بیت۔
نام ءُ ندکار داں نویسگ ءَ ھمراہ انت کتاب کہ چاپ ءُ شنگ بیت پد ءَ باید ندکار ءَ گوں کتاب ءَ کار مہ بیت۔کتاب ءِ وتی رنگ ءُ زینتے، کتاب وت درشان ءُ زبانے، نی ھرچی انت ھمے کتاب انت کہ وانوک ءَ گوں تران کنت، وت ءَ گُوش ایت ءُ پیش دار ایت کہ من کے یاں۔
بلوچی لبزانک ءَ نوکیں دور ءَ چندیں انَچیں ورنا رستگ کہ بے زَرنکان ءُ بدیں جاورانی موسم ءَ اشانی کاراں مردم گند ایت دل وش بیت۔
ما وَ ایوک پہ گپ ءُ پیتاری ءَ پشت کپتگیں کار ءِ باندات ءَ مئے ھساب گَلگ ءَ انت۔
عباس حسن ءُ سلمان ابراھیم ءَ لبزانکی ساچ در گل ءِ نیمگ ءَ اے سال ءَ “نیادانک ” یے دیم ءَ آورتگ۔نہ ایوک ” نیادانک” وش ءُ گچینی نامے، بلکیں اشی ءِ تہ ءَ مارا دنیا ءِ مزنیں ندکار ءُ شاعراں گوں جْوانیں گند ءُ گدارے ءِ موہ ھم رس ایت۔
نیادانک ءِ اوّلی تاک ھمیش انت دو روچ بیت چاپ ءُ شنگ بیتگ۔اشانی گوشگ ھمیش انت کہ ھمک شش ماہ ءِ سر ءَ اشی ءَ چاپ ءُ شنگ کنگ بیت۔دوسد ءُ یک تاکدیم ءِ اے تاکبند ءَ دنیا ءِ کْوھن ءُ نوکیں مزنیں نام ھوار انت۔یک نیمگے ءَ اگاں ٹی ایس ایلیٹ انت گڑا دومی دست ءَ فاروقی نشتگ ءُ لبزانک ءِ بارو ءَ گپ ءَ انت۔رپتگیں ناماں چہ اگاں یک دستے گارشیا ءُ اوکتایو پاز انت گڑا دومی وٹّ ءَ زندگیناں چہ ھاروکی مورا کامی ءُ میلان کنڑیرا نشتگ ءُ وتی کسھی لبزانک ءِ تجربت ءُ کتہ کاری ءِ کسھاں آرگ ءَ انت۔اے تاکبند ءِ یک جْوانی یے ایش انت کہ درائیں گلگدار چہ انگریزی ءَ ماں بلوچی رجینگ بوتگ انت۔نصرت رحمانی ءِ چہ فارسی ءَ ، ءُ شمس الرحمن فاروقی ءِ چہ اردو ءَ رجینگ بوتگ۔
سکیں جْوانیں کارے اے ورناھاں کتگ۔اے دلمانگ انت کہ نیادانک ھرشش ماہ ءِ سر ءَ در بہ کپ ایت بلے ایوک نیادانک تاکے بیت بزاں اشی ءِ تہ ءَ دنیا ءِ مزنیں ندکار ءُ شاعرانی گلگدار چاپ ءُ شنگ کنگ بنت ۔اے تاکبند چو کہ میاں اُستمانی تاکبندے گڑا باید ھمیش بوتگ ات کہ بلوچیں شاعر ءُ ندکارے ءِ ھم گلگدارے ایشی ءِ تہ ءَ جاگہ دیگ بوتیں داں اے تاکبند ءِ مانائی ارزشت چد ءُ گیش بوتیں۔ھیر اے ھورکیں جاگہ دیم ءِ تاک ءَ ھم پُر بوت کنت۔باید اے تاک ھرکسی گور ءَ بہ بیت۔ھمایانی گور ءَ الم ءَ بہ بیت کہ باند ءَ مزنیں شاعر ءُ ندکارے بُوّگ ءِ واھگدار انت داں اے مزنیں نامانی تجربت ءُ کار کنگ ءِ رِپک ءُ تکنیکاں در ببر انت۔
نیادانک جوانیں دروشمے ءَ چاپ ءُ شنگ کنگ بیتگ۔ سرتاک ءُ پدی تاک ءِ چارگ ءَ ھم دل ءَ چاڑے چیست بیت۔ھمک گلگدارے ءِ دیم ءَ ندکار ءِ کسانیں پجّارے ھم دیگ بیتگ کہ پہ نوکیں وانوکاں ارزانی یے بیت، آزانت کنت کہ چہ اشاں کے کے ءَ چی نبشتگ ءُ کے ءَ نوکیں کار چی دست ءَ انت۔دگہ مستاگ ءُ مرادی گپے ایش انت اے تاکبند ءِ چندیں رجانکار پمن ءَ نوک ات انت۔عمرانہ رشید، عمران نور، مشرین حمید، نبیل ارمان، علیشاہ طاھر، منی ھیال ءَ اے نام پہ شما ھم نوک بنت۔بلوچی لبزانک اے نوک سرکشتگیں دھل ءُ نھالاں وش اتک کنت۔بلوچی زبان چد ءُ گیشتریں پُلّ ءُ وشرنگیانی واھگدار انت۔
28فروری 2023۔