“آس ءِ لَیب “۔ لچّہ کار: رھمدل نات
“آس ءِ لَیب “
لچّہ کار: “رھمدل نات”
۔۔۔۔۔۔۔۔۔۔۔۔۔۔۔۔۔۔۔۔۔۔۔
سُچاں بلے!!
من واھِشانی گْوانزگ ءَ داں لِزّتانی چیکواں گِراں
اے کوھسار ءِ دامن ءَ گوں جنگ ءِ آسگواریں مھلباں رچاں
مُساپرے ءِ نیّتاں ءُ راھسرانی ھِنّیاں پہ ھچ وڈا گمی نباں
چیا کہ سرپداں
اے نُگرہ ماھِکانیں پُل!!
اے جنگ ءِ موسُم ءِ سپاھی آں، گوں جنگ ءِ مِنّت ءَ رُداں
اِشاناں بید ءِ جنگ ءِ مھلباں ءُ ھُون ءِ بوہ ءَ وش نہ بیت
اِشاناں ھید ءِ پوگس ءَ پہ جون ءِ بوہ ءَ وش نہ بیت
نوں تو بُگش
منا تو چون کنئے کہ اے من آں
اے لیب ءِ بھر بوتگاں ءُ بھر باں
گوں تئی شرابیں لیبوھاں ملامتی نباں
مُساپرے ءِ نیّتاں ءُ کانیانی آپ دوست باں منا
گوں تئی شپانی برکت ءَ من گندلاں بدل کناں
۔۔۔۔۔۔۔۔
منا گوں آس ءَ لَیب وش بیت
داں گْرندگُپتں توپک ءِ مچّاچ بند ءُ پچ بیاں
داں تراولانی کانگُڑو ءِ ڈور دست ءَ ڈک بیت
اے لَنکُکّانی سُچِنوں وتئ وَس ءَ داں کار کاں
منا زمین ءِ ھِسکگانی تُنگی توار کاں
ہمے توار ءِ رندپداں روان بان داں زندگاں
تھاریانی سرشپ ءِمن آخری نَس ءَ گراں
کدی کدی کہ رولہ آں تلاریں کوھسار ءِ چمّ چو پُل
گیمراں
تچوکیں چمّگانی شیرتواریں آپ ہم زُبان ءِ چَنکاں سور باں
مں اچ وتا چو آس ءِ نرمیں ساھِگ ءَ نزور باں
ملور باں
تاں گونڑیں گُھار ءِ کندگانی بینگاں پہ آپ باں
ءُ مات ءِ وشیں گپّ ءُ کسہانی وشبوھاں دِلاپ باں
دلاپ باں پہ میتگ ءَ
ءُ پیریں کُل یات کَیت
داں نوک بانزُلکیں برات کَیت کوپگاں سوار بیت
” لالا گاڑی ءَ بُگش کہ بال کاں”
” ما مزنیں شہر ءِ نیمگا رَؤہیں “
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آ آس ءِ لَیب کُٹ اِتگ!
توامیں بند ءُ بوگ برپ بوھگایاں نوں
دمانے رند سارتیانی بانُک ءِ شِلّنگ میتگ ءَ رسیت
ءُ گوات ءِ آمگیں جگّر اُوں زیم بیت گوں شیکّگاں
نوں مردُماناں میتگ ءِ دریگ بند کنگ کپنت
ءُ آس ءِ زَھگ چیر دیگ کپیت
کہ آس یکّیں مڑّی اِنت گوٛاہ بی زندہجانی ءِ
کہ آس تھنا چیدگ اِنت جھان ءُ زِندمانی ءِ
تئی چارگ ءَ مں پش کپاں
کہ اے سپر زمانگ ءِ تنیگہ دیدگانی تْراولاں نہ بُراِتگ
تو وت بگُش کہ انِشپی
اے تئی بھاریں دامن ءِ کِشار دانکہ سُھب چون باں
تو وت بگُش کہ اِنشپی
تئی دست ءُ پاد ءِ زیمراں داں سُھب گْوشداری کئے؟
تو وت بُگش کہ انشپی تئ درچک تاک چون باں؟
من گیمُراں اِدا ءُ اُودا مَستیں زِر تئی چؤل جنت
10/12/2020 کوئٹہ