ارشاد عالم ءِ گندءُ نندے گوں واجہ بشیراحمد گاجیزئیءَ
ارشاد عالم ءِ گندءُ نندے گوں واجہ بشیراحمد گاجیزئیءَ
واجہ بشیراحمد گاجیزئیءَ بازیں وھد ماں دبئیءَ گوازینتگ ھما وھداں بلوچی زبانءِ نامداریں شاعر. زبان زانتءُ پولکار واجہ سید ھاشمی اوں دبئیءَ بوتگ داں مزنیں مدتے واجہ بشیر احمد ءُ سید ھاشمی نزیک بوتگ انت واجہ بشیر احمد گاجیزئیءَ سید ھاشمی نزیکءَ دیستگ آئیءِ تب. ھیل آدت زانتگ انت من سید ھاشمیءِ زندءِ چندے تکءُ پہناتانی بابتءَ آئیءَ جست کت..
جست… شما کجا ھُور بوتگ ئےءُ چنچو وھدءَ ھُور بوتگ ئے؟
پسو… منءُ واجہ سید ھاشمی دبئیءَ سال1968ءِ گڈی بہرءَ ھُور بوتگیں منی پجاروکی منی یک سنگتے واجہ منصور ناصر کہ بُندرا گوادری مردمے ات گوں آئیءَ کنائنت آ وھداں منصور شارجہءَ tos بزاں انگریزانی ٹہینتگیں پوجءَ کارءَ ات.territorial Oman scout. آ وھداں من وت بیروزگار اتوں وھدے کہ کار بندات کت گڈا سیدءِ کرا روگ آھگ ھست ات داں کہ آئیءَ پدا پاکستانءَ روآ کت….
جست…. سیدءِ دزگٹی گیشتر چے بوتگ انت؟
پسو…. دزگٹی ابید چہ وانگءُ نبشتہ دگہ ھچ نہ بوتگ.
جست…سیدءِ دوستیءُ سنگتی گوں کئے کئے ءُ چونیں مردماں گوں بوتگ؟،
پسو…..سیدءِ سنگتی ورناھاں بگر داں پیریناں بوتگ من چشیں ھاسیں مردمے نہ دیستگ سیدءُ سیدءِ سیاہ چاہ پہ ھرکسءَ ساڈی بوتگ انت.
جست…. آئیءِ سیاسی پھر چے بوتگ؟
پسو….آئیءِ سیاسی پگرءَ اگاں کسے چارگ لوٹیت گڈا آئیءِ تچءُ تاگاں1948ءَ آئیءَ انجمن اصلاح بلوچاں جوڈ کت ھما وھداں بگر داں بیرانیءَ دراھیں پٹ ءُ پول نبشتانک آئیءِ سیاسی پگرے پجار انت .
جست…چشیں گپ؟ واکیہ ھست کہ تو ھجبر شموشت کت نہ کن ئے؟
پسو….جی ھو من سیدءِ پچیں روھ برچکندیں وش اتکاں ھجبر چہ دلءَ درکت نہ کناں یک روچے منءُ واجہ منصور آئیءِ کرا شتاں اے وھداں دبئیءَ نائف روڈءِ کبلھی نیمگءَ یک فلیٹےءَ جھمنند ات اے فلیٹءِ باڈہءُ بھتہ آئیءِ آریپیں برات واجہ نظام شاہءَ داتگ انت گڈا منصورءَ آئیءَ را ڈوبارت گشت کہ تو لُچ ئے گوں بلوچ راجءَ ترا دوستی نیست اگاں بوتیں تو ایوب خانءِ ھلاپءَ روچے روزگارے گپ ئے جتگ ات. ھمے روچءَ من مارات کہ سیدءِ روھ تھار بوت ءُ درائنت ئے منی لوگءِ درآھگءُ نائف روڈءِ اوشتگءَ ایوب خان بدءُ رد کنگءَ بلوچ آزات نہ بنت منءَ دبئی مستر گنوکانی ھسپتالءَ بارت راجانی آزاتی گوں زانتکاریں مردماں گوں بیت گوں ناسرپدیں ھیوانءَ بوت نہ کنت…
دگہ کسہے گونمن گشت ئے کہ آ ماں جیونیءَ یک لبزانکی دیوانے ھاسیں مہمان ات یک ورناھے شعرے ونت مہلوکءَ سک دوست بوت گڈا آئیءَ را انعام اش دات انعام دیوک اوں من اتاں وھدے کہ دیوان آسر بوت ھر کس پہ وت شت یکےءَ منءَ گشت سید اے شعر کہ ورناءَ ونتگ تئی شعر نہ انت بلے منی شعر انت شما کہ درستاں دلبڈی داتگ من ھم زانتگ من نلوٹاں کہ ورنا دلپروش بہ بیت بلے گیشتر جہد کنت..من بشیر گشت دریا پہ کچکے چلپگءَ کم نہ بیت آئیءَ پسو دات دریاءِ مزنی ھمیش انت کہ باز جہل پراہءُ شاھیگان انت مزنءَ را مزنی ڈولدار کنت آ مستر بیت کمتر نہ بیت سگگءُ اوپار لوٹیت.
جست…سید تبیتءَ چونیں مردمے بوتگ؟
پسو….. سیدءِ تبءَ گرمیءُ برانز مان نہ بوتگ ,زھرگرگءِ نزانتگ.
جست… آئیءَ گیشتر چونیں کتاب ونتگ؟
پسو… آئیءَ ھرچ رنگیں کتاب ونتگ بلے گیشتر پٹ ءُ پولی کتاب ونتگ ئے..
جست.. آٰئیءِ وشتریں وراک چے بوتگ؟
پسو….چوناھا وش وراکے ات. بلے پہ رسگ. داھمی وراک ڈبی والا مٹر. ماھیگ. ھیک بوتگ انت. گشادھے کہ بوتگ گڈا ایرانی وراک چُلومرگءُ کڑاھی ئے وارتگ.
جست…شمے کرا وش گٹی یا وتی شعرے گشتگ؟
پسو…. جی اناں وش گُٹی نہ ھچ نہ ونتگ ئے..
جست…. شمارا لبز مانا برے برے جست کتگ ئے؟
پسو…. اناں منءَ ھجبر جست نہ کتگ ئے کہ پلاں لبزے مانا چی انت.
جست.درزبانیں مردم آئیءِ,گورا اتکگ اناں؟
پسو…آئیءِ جندءِ گشگ ات کہ یک آٹلین زبان زانتے آئیءِ کرا اتکگ آ اوں زبانءُ ادبءِ سرا پٹءُ پول کنگءَ ات منءَ گشت ئے گونمن بیا,گوں. من نہ من ات ءُ گشت منی پٹءُ پول پہ بلوچءُ بلوچیءَ انت منی پڑ وت پراہ ءُ شاھیگان انت.
جست….دبئیءَ آئیءِ مالی جاورھال چون بوتگ؟
پسو……مالءُ متاھے ھچ نہ بوتگ بلے ھمے پیمءَ آ سک ایمن بوتگ نہ چہ کسےءَ لوٹتگ ئے ناں کسے زنگ ئے جتگ..
جست….نظام شاہ آئیءِ کرا شتگ اتکگ؟
پسو…..نظام شاہءِ کرا شتگ بلے نظام شاہ وت آئیءِ کرا نہ یتکگ..
جست…. شما وتی ورگ وت شر کتگ انت؟
جی ھو. ما وت ورگ شر کتگ نان چہ داشءَ گپتگ.
جست….نشہ آئیءَ کتگ اناں؟
سیدءِ نشہ دو بوتگ انت یکے سیاہ چاہ دانکہ واب تراس بگیپت دومی ولیم پنچ دانکہ ٹی بیءَ ایرماد بکنت.
جست… نماز روچگ عبادت کتگ ئے؟
پسو… جی ناں چشیں چیز نہ کتگ ئے.
جست…فلم سینیما شما شتگ ئے یا سوت گوشداشتگ ئے?
پسو….جی ھو فلم چارتگ بلے بے سریں ناچ ءُ گانا ئے دوست نہ بوتگ البت دلیپ کمار. راج کمار. بلراج ساھنی اشوک کمارءِ ازمکارانی جوانیں کسہانی فلم چارتگ انت.
جست…ملکی مردم آئیءِ گندگءَ اتکگ یا کہ ملکءِ زھیراں زرتگ؟
پسو….من چشیں نامداریں ملکی مردم ئے نہ دیستگ کہ آئیءِ گندگءَ اتکگءُ ملکی زھیر نام اوں نہ گپتگ ئے البت دگہ کسے اگاں ھانُل نام گپتگ وش ئے نہ بوتگ گشت ئے یک شاعرے شعرے نبشتہ کتگ ھانل نام مان کتگ گڈا من سیدءَ آئیءَ کاگد نبشتہ کتگ گشتگ کہ واجہ بلوچیءَ,دگہ نام باز ھست یکیں ھانلءَ پہریز.
جست…. گیشتر کجام وھدءَ ونتگءُ نبشتہ کتگ ئے؟
پسو….چوناھا نبشتہءُ وانگءَ وھدءُ پاسے نہ بوتگ بلے گیشتر بے وھدیں شپاں ونتگءُ نبشتہ کتگ ئے.
جست… لیڈرءُ رھشونانی زنگ ئے جتگ اناں؟
پسو…جی اناں چشیں زنگ نہ جتگ ئے.
جست…. آئی کجام زبان روتاک ونتگ؟
پسو…آ وھداں روتاک گیشتر انگلش ءُ اردوءَ بوتگ انت آئیءَ ھالتاک جنگ. اردو ڈائجسٹ ڈان ھالتاک ونتگ انت.
جست… سید چہ کئے متاسر بوتگ?
پسو… منی کرا اے وڈیں ذکر نہ کتگ ئے…..
واجہ شمے لکھ منت کہ منءَ وھد دات مارا سید ھاشمیءِ زندءِ بازیں تکءُ پہناتانی بابتءَ سرپدی,رس ات.
پسو…. تھی ھم منت کہ تو منی گوستگیں یاتانی دریگے پچ کت منی زرد ملما کت.