دستونک
شیرجان مجید

اوستانی بزیـں جنگل ءَ نزّار چراگے
تُنیگیں شپ ءِ دامُن ءَ پلگار چراگے

بے تو اے دل ءِ زَیماں کے ءَ پیش بِہ داراں
مِھکان تبیبے ءُ نہ گمــوار چراگے

شپ نوں وتی واباں منی اُرجین کنان اِنت
دردانی مُجـــــاں کپتگ ءُ بیمّــار چراگے

یل دئے او زمانگ اے وتئ دروگیں ستاھاں
آستونک ءِ تہ ءِ وپتگیں سیہ مار چراگے

چے اُزر منی واھگ ءِ شیدائیں دل ءِ کہ
ارسانی زِر ءَ نشتگ ءُ ھینّار چراگے

دنیا کہ چو زندانے ءَ بے رنگ ءُ تھار اِنت
دوشی پدءَ دیستگ گُل ءِ گیـوار چراگے

شیرجان اے تھاری ءِ ہمک ترمپ چو دریا
ھوشام ءَ وتی بال ءُ پمن بیــار چراگ