اکبر بارکزئی ءِ لچّہ ۔ عالمءِ اِسرار
لچّہ ۔ عالمءِ اِسرار
شائر ۔۔۔۔۔ اکبر بارکزئی
کوہ باریں بچکندنت؟
گوات باریں گُژنک بنت؟
نود باریں سرپد بنت؟
مور باریں سر شودنت؟
باریں پُل ھم گندنت؟
رَنگ ھم نپس کشّنت؟
روچ باریں تُنّگ بیت؟
ماہ باریں جاں کشّیت؟
آس باریں آپُس بیت؟
آپ واب ھم گِندنت؟
باریں سِنگ ءُ ڈوک ءُ ڈَل
چُک وپیر ءُ ورنا بَنت؟
باریں مُھرگ ءُ مشتک
وپت ءُ واب ھم زانَ انت؟
باریں مُرگ ءُ ماھیگ ھم
شئیر ءُ سوت پِر بندنت؟
ھست ھنچیں دیوال ھم
بھہ نَہ اِشکننت کَرّنت؟
باریں مُردگ ھم گندنت؟
باریں مئے سرءَ کندنت؟
روچ ءُ شپ زبان دارنت؟
باریں موتک ھم کارنت؟
باریں کوھکر ءُ جمبر
آسمان ءَ ھم گوارَنت؟
باریں درشاک ءُ دارءُ گُل
سُور ءُ سانگ ھم زان انت؟
کُمب ءُ کور ءُ دریا ھم
درد ءُ دور ءُ گم مارانت؟
پور ءُ کلکشاں باریں
چمّ ءُ گوش ءُ دل دارَنت؟
باریں زُھرہ ءُ مرّیخ
مھر ءُ دوستی زان انت ؟
شئیر ءُ شائری زان اَنت؟
مئے اے گُل زمینءَ ھم
عاشقی کُتگ باریں؟
دَرد ماراتگ باریں؟
باریں چُنت کس پھمیت
جُھد کنت ءُ سرپد بِیت ؟
عالم ءِ اے اسراراں
اکبر ءِ اِے گپتاراں
اکبر ءِ اِے گپتاراں