ایمیل اکاونٹ۔ گونڈیں سرپدی یے۔ نبشتہ کار: زاھدہ رئیس راجی
ایمیل اکاونٹ۔ گونڈیں سرپدی
زاھدہ رئیس راجی
بازیں وھد ءَ مارا کاگدے یا نبشتانکے یا کتابے مردمے ءَ دیم دیگ کپ ایت۔ ما آئی ءَ لفافہ ءَ مان کن ایں، لفافہ ءِ دیمی نیمگءَ وتی نام ءَ ءُ ڈس ءُ نشان ءَ نبشتہ کن ایں ءُ پُشتی نیمگءَ ھما مردم ءِ نام ءُ ڈس ءُ نشان ءَ دئیں کہ آئی ءَ دیم دیگ لوٹ ایں۔ پدءَ پوسٹ آفس ءَ روایں، چیزے زَر پُر کن ایں ءُ اے لفافہ ءَ جمع کنائین ایں۔ شنگکاری ءِ اے کار چہ یک میتگے ءَ دومی میتگ یا چہ یک شھرے ءَ دومی شھر یا چہ یک ملکے ءَ دیم پہ دومی مُلک ءَ بوت کنت۔ پمشکا پوسٹ آفس تئی جمع کُتگیں لفافہ ءَ دستی یا میل ءِ وسیلہ ءَ یا آپی ءُ بالی گراب ءِ وسیلہ ءَ شمئے نبیس اتگیں ڈس ءُ نشان ءَ سرکنائین ایت ۔
انٹر نیٹ ءِ آھگ ءَ پد اے گرانیں کار ارزانیں رنگے ءَ کنگ بنا بیت۔دنیا ءِ تہ ءَ اولی مردم رے ٹومِلِنسَن بیتگ اَت کہ آئی ءَ سال 1971 ءَ وتی اولی کلوہ انٹر نیٹ ءِ وسیلہ ءَ وتی مردمے ءَ دیم داتگ اَتءُ چد ءُ پد اے کلوھانی دیم دیگ ءِ سلسلہ ھمنچو دیمروی کنان بوت کہ مروچیگیں وھد ءُ زمانگءَ ھمک روچ چہ 300 بلین ءَ گیش ایلیکٹرانک کلوہ یا ای میل دیم دیگ ءُ زورگ ءِ کار بیگ ءَ اِنت۔
رے ٹوملنسن ءِ اولی ایمیل ءَ رند بازیں ادارھاں آئی ءِ اے جُھد پہ بھا زُرت ءُ ایشی ءِ ایڈوانس یا جدیدیں دروشم ءِ سرءَ کار کنان کُت۔ گُڈ سرءَ بازیں کمپیوٹر ءِ باپار کنوکیں ادارھاں ایمیل اکاؤنٹ پہ کارمنداں جوڑ کنگ ءِ آسراتی دیگ بنا کُت۔ بندات ءَ اے پُلّی اکاؤنٹ بیتگ انت بزاں پہ بھا زُورگ ءُ کارمرزگ بیتگ اَنت ءُ تھنا پہ بزنس یا باپاری لوٹ ءُ گزاراں کارمرزگ بیتگ اَنت بلے وھد ءِ ھمراھی ءَ ایشاں مپتی اکاؤنٹ ءِ آسراتی دیگ ھم بنا کُت پمشکا کارگسی کارمنداں ابید، نوں شاھدربرجاہ ءِ نودربر ءُ استاداں ھم وتی اکاؤنٹ پچ کنان کُت ءُ ایمیل ءِ وسیلہ ءَ وتی نمدی یا نبشتانک یا کتاب یا آفیشل ءُ اکیڈمک کاکد دیم دیگ ءُ لوٹائینگ ءِ کارگپت۔
چوشکہ بُرز ءَ گوشگ بیت کہ پیسرءَ ایمیل اکاؤنٹانی کارمرزوک تھنا کمپیوٹر ءِ پڑ ءِ مردم بیتگ انت بلے دیمترءَ انچوش کہ انٹر نیٹ ءِ ھرچ درچ بازیں مُلکاں کمتر بوان بوت ، نوں اے آسراتی لس مھلوک ءَ دیگ بیت۔
اگاں اے بہ گوش آں کہ لمسی گوانکو یا ٹچ موبائل ءِ آھگ ءَ گوں ایمیل سسٹم ءَ گیشتر دیمروی کنان کُت گُڑا رد نہ باں کہ نوں اے ایمیل اکاؤنٹ تھنا پہ کلوھانی برگ آرگ ءِ کار ءَ کنگ ءَ نہ ات ،بلکیں ایشی ءِ ھمگرنچی گوں گوانکو ءِ دراھیں ایپساں بوت ءُ چہ یکیں ایمیل ءَ بازیں کارے گرگ بیت ۔
انونگیں زمانگ ءَ کسے ءَ پہ کارے ءَ وتی ارزی یا ایپلیکشن دیم دیگی انت، آ وتی ارزی ءَ ایمیل ءِ وسیلہ ءَ دیم دنت ۔
ایمیل ءِ وسیلہ ءَ ارزی دیم دیگ ءِ یک نپے ایش انت کہ دیم دیوک ءِ گورءَ آئی ءِ رسید ءَ ابید ثبوت ھم ایر بیت انت کہ من اے روچ ءَ اے وھد ءَ پلاں ڈس ءُ نشان ءَ وتی اے ارزی دیم داتگ۔
مپتی ایمیل اکاؤنٹ ٹھینگ ءِ دامگ چونائی ءَ باز انت بلے گچین نامداریں دامگ ایش انت:
· Gmail.
· Outlook.
· AOL.
· Proton Mail.
· Zoho Mail.
· GMX.
· iCloud Mail.
· Yahoo Mail.
· Mail.com
پہ نوکباھنداں، منی سوج ایش انت کہ آ ماں جی میل ءَ وتی اکاؤنٹ ءَ پچ بہ کن انت۔ پرچہ کہ جی میل ءِ دامگ گوگل کمپنی ءَ گوں ھمگرنچ انت ءُ چہ 2004 ءَ یکشلہ کار ءَ انت۔ پولکارانی گوشگ ءِ ردءَ سال 2022 ءَ یک اعشاریہ ھشت بلیون مردماں وتی اکاؤنٹ ادءَ پچ کُتگ ءُ چہ ایشی ءِ ایمیل سسٹم ءَ نپ چست کُتگ۔
جی میل ءِ تہ ءَ 15 جی بی ھالیکیں جاگہ گوگل ڈرائیو ءِ نام ءَ رس ایت کہ اودءَ اکاؤنٹ ءِ واھند وتی کمپیوٹر یا دستی گوانکو ءِ ڈیٹا ءَ ایر کُت کنت چوشکہ اکس، توار بند، تامُر، کتاب یا نبشتانک ایر کنگ بنت۔
اگاں اکاؤنٹ ءِ واھند چہ ایشاں کجام ھم چیزے دگہ کسے ء پیش دارگ بہ لوٹ ایت، آئی ءِ گورءَ شئیرینگ ءِ آسراتی ھم است ۔
ھرھما مردم ءَ کہ وتی کمپیوٹر یا موبائل ءِ ھراب بیگ ءِ ھتر ءَ چہ پیسرءَ مارگءَ اِنت، آ بائد وتی مالومداری یا ڈیٹا ءَ وتی جی میل اکاؤنٹ ءِ گوگل ڈرائیو ءَ ایر بہ کنت بلے یک گپے ادءَ الم ءَ دلگوش بہ دئیت کہ ھما اکاؤنٹ گوں شمئے بینک اکاؤنٹ ءَ ھمگرنچ انت یا اودءَ شمئے ھساسیں آفیشل ءُ اکیڈمک ڈاکیومنٹس ایر انت، آ اکاؤنٹ ھجبر پبلک مہ بیت۔ اے گپ ءِ مُراد ایش انت کہ آ اکاؤنٹ ءِ ڈس ءُ نشان ھرکسی گورءَ مہ بیت ءُ نے کہ آ گوں چاگردی رسانکدرا ں ھمگرنچ کنگ بہ بیت۔
پہ چاگردی رسانکدراں بائدیک جتائیں اکاؤنٹے بہ بوج اِت ءُ تھنا پہ ھمے کارءَ کارمرز بہ کن ات۔ ایشی ءِ نپ ایش انت کہ دامگانی دُز یا ھیکرز شمارا سک باز تاوان دات نہ کن انت۔
15 جنوری 2023