بیست ءُ چار دسمبر۔ مبارک قاضی
بیست ءُ چار دسمبر
مبارک قاضی
مبارک قاضی
مرچیگ بہ بیت باندات بہ بیت مئے روچ گْوز اَنت
اِے گپ چہ کجا بندات بہ بیت مئے روچ گْوز اَنت
بِلئے کہ زمانگ میم نہ کنت مئے راست ءُ رداں
کورانی دو چم دو چات بہ بیت مئے روچ گوز اَنت
اِے دنیا اِنت هر شکس وتا گوں دلگوش اِنت
کوکّار بہ بیت سلوات بہ بیت مئے روچ گوز اَنت
تئی یات بہ مان اَنت تهنا هچی متلب نیست
گوریچ بہ بیت سرگوات بہ بیت مئے روچ گْوز اَنت
گوں کُنٹگ ءُ سنگاں پاداں تْراول رودینتگ
پُلّانی جگر هرّات بہ بیت مئے روچ گوز اَنت
مئے روچ گْوز اَنت داں ساهگ چمّاں بند نہ کنت
دل کازی پہ دنتان جات بہ بیت مئے روچ گْوز اَنت