تاپساچی ءُ حسین زیب۔ قدیر لُقمان
((تاپساچی ءُ حسین زیب))
نبشتہ کار: قدیر لُقمان
نبشتہ کار: قدیر لُقمان
تاپساچی گُشنت آس ءِ بزانراں گوں دارے ءِ یا انچیں ازبابے ءِ سرا چیزے ءِ ساچگ۔ ایشی ءَ پرنگی زبان ءَ Pyrography گُشنت۔ Pyro بزاں آس ءُ Graphy یا Graphos بزاں نبشتہ۔ بزاں گوں آس ءَ(یا آس ءِ برانزاں) نبشتہ کنگ۔ بلوچی ءَ اے تاپساچی گُشگ بیت۔
بُن اسل ءَ تاپساچی ءَ دیر اِنت کہ ازمی دروشم ءَ اِنت۔ ایشی ءِ بُندپتر چہ مہتر عیسیٰ ءَ ساری ئیگ اِنت۔ چہ مصر ءَ لہتیں سد سال پیش چہ مہتر عیسیٰ ءَ اے ازم ماں دار ءُ گِل ءَ گوں اڑ کتگیں ازبابانی نکش ءُ نگاری ءَ زانگ بوتگ۔ چوش کہ الماری، ٹیبل ءُ انچیں، یا کُمب، رزان ءُ دگہ انچیں۔ چہ مصر ءُ فلسطین ءَ اے ماں یونان ءُ روم داں یورپ ءَ سر بوتگ۔ 19 ہمی کرن ءَ اے ازم ءَ نوکیں شناسائی یے رس اِت ءُ یک برے پدا دنیا انچیں نکش ءُ نگارانی نیمگ ءَ اتک۔ کلاسیک پدا وتی جْوانی ءَ دارہ بوت۔ بلئے، تنیگہ اے شون دیگ نہ بیت کہ چرے ازم ءَ انسانی اکس ءُہما اکس ءِ جندی دروشم اڑ کنگ بوتگ۔ اے شخصی دروشم ءِ ساچگ حسین زیب ءِ ازم ءَ دراہ بیت۔
حسین زیب پسنی بلوچستان ءِ جامنند اِنت۔ آ اولی تاپساچکار اِنت کہ دار ءَ تاپیت ءُ اکس اڑ کنت۔ اے اکس ءِ مدت دار ءِ مدت اِنت۔ تا ہما وھد ءَ دار مانیت، اکس مانیت۔ آئی ءَ لہتیں سال اِنت کہ اے اکس سازی ءِ پڑ ءَ اِنت ءُ آئی ءِ گشگ اِنت کہ آ اولی مردم اِنت کہ اے ازمے بنا کتگ ءُ چرائی ءِ اکسانی دیمدرائی ءُ شناسائی ءَ کراچی ءَ آؤکیں لاھوری ازمکارے( ھدا بہ زانت) ءَ ازم پہ وتا کشّ اِتگ ءُ پاکستان ءَ نام کٹّگ ءَ اِنت ءُ زرّ ءُ مال ءَ ھم جوڑ اِنت۔ بلئے، حسین انگہ وتی اڑ کتگیں اکساں گیشتر پہ داد دنت کہ بلکیں کسّے ءِ دل موم بہ بیت ءُ وتی یا وتی دوستیں مردمے ءِ اکسے پہ اڑ کنگ ءَ بہ دنت ءُ چرائی ءَ حسین ءِ ازم ءِ دیمروئی بہ بیت ءُ شُد ءِ دوزہ توسگ بہ بیت۔
حسین زیب ءُ کمانچر بلوچ ءِ وڑیں بازیں ازمکار ھست کہ وتی جہت ءَ کوشست کنگ ءَ اَنت۔ بلئے، تا کدین ءَ ؟
راجے کہ بہ بیت گُنگ نہ مانیت، نہ مانیت
مانیت پہ ادارکی بزاں زندگ اِنت مُردار
(سید ہاشمی)
