تهنا سر گِر پد ءَ بِہ رَس تهنا ۔ منیر مومن
دستونک
منیر مومن
تهنا سر گِر پد ءَ بِہ رَس تهنا
اینکدر ھَم مَہ بات کس تهنا
باریں کئے چَہ نیام ءَ پاد اتکگ
دیم پہ دیم اَنت پد ءَ دو کس تهنا
مُرگ ءُ موسم شُتاں نَہ باں واتر
دْرچک اود ءَ اِد ءَ کبس تهنا
تو گوں ساہ ءَ منی روئے کائے
نُوں وَ کشّگ نَہ بیت نپس تهنا
وھد آدینک ءِ مُجاں کور کُتگ
ھوری ءَ نِشتگ چُنت کس تهنا
سی اِت انت ماہ ءُ روچ ھَم پہ تو
من نَہ باھینت ءَ واک ءُ وس تهنا
کس نَہ بیت اِنت تو پہ من ءَ کائے
شالا اَنچو بِہ باتاں بس تهنا
مُرتگیں مولمانی کبر ءِ سر ءَ
نِشتگ نازینک جنت ھَوس تهنا
تو کہ اندیم بۓ ھتم وَ کئیت
گِیمُر ایت دیدگانی جَس تهنا
توتی ئیں ھاجت ءَ کئےءَ بکش ئے
مئے اے شھرءَ ھزار کس تھنا
کِشک کُلّیں کُت اَنت من مُندریک ءَ
گار کُرتگ وتی من ڈَس تهنا
ایوکی ھَم مُنیرؔ ءَ میم نَہ کنت
اَنچو تهنا یاں پہ تو بس تهنا