*تُمپ گوں ھَشیمیں گواتگِراں**بیست ءُ یکُمی بَھر*
*تُمپ گوں ھَشیمیں گواتگِراں*
*سفرنامہ۔۔۔۔۔اسحاق رحیم*
*بیست ءُ یکُمی بَھر*
اے وھد ءَ کہ میر بھرام خان گومازی ءُ تُمپ ءِ سرا ھملہ کنت اشانی لشکر دو بھر ءَ بیت۔ لشکر ءِ یک بھرے پدا پہ دشت ءَ روت۔۔۔۔لشکر ءِ دشت ءِ بہر ءِ سروکی ءَ میربراھیم میر مرادزئی کنت کہ گوں میربراھیم بارانزئی ءَ نزیک سیاد بنت ۔۔۔۔دویں براھیم وت ماں وت یک دومی ءِ پیروک زتک بنت۔۔۔۔۔۔۔
دشت ءِ لشکر ءَ میربراھیم میرمرادزئی ءَ شھسوار یارمحمد زئی ءُ پیری ء دربیش آھُرّانی ھم گون بنت۔۔۔۔ اے ٹولی اے رند ءَ بزاں چہ امین ءِ کوش ءَ پد کہ دشت ءَ روت گڈا اے سکّ باز لُٹّ ءُ پُلّ کن انت مہلوک ءَ سکّ پریشان کن انت لھتیں مردم ھم چِست کن انت گوں وت بر اَنت۔۔۔۔۔شھسوار یک جنیں آدمے ھم آوار جنت۔۔۔وھدے اے چہ دشت ءَ چہ مال جَنگی ءَ پد واتّر بنت کاینت گِند اَنت داں بھرام خان ءَ گوں گچکی ھاکماں سلاہ کُتگ۔۔۔روگءِ وھد ءَ میر بھرام خان سرپد بیت کہ شھسوار ءَ اُشتر ءِ لَچانی تہا گوں مالاں پجّی جنینے ھم آوار جتگ ءُ گون اِنت گڈا آ چہ شھسوار ءِ اے کار ءَ سکّ دلگران بیت جنیں آدم ءَ پیشن ءُ مند ءِ میان ءَ آزات کنت ءُ آئی ءَ مند ءَ میر ھدادات رند ءِ حوالہ دنت ھمدا دگہ بندیگاں ھم آزات کن اَنت۔۔۔۔چہ ھمدا شھسوار میر بھرام خان ءِ زئیاں چہ وتی راہ ءَ جِتا کنت ءُ گوں وتی مردماں دیم پہ نھنگ ءَ برزاد بیت۔۔۔۔
دگہ ٹولی یے گمشاد زئی کہ گومازی ءَ گوں میربھرام خان یکجاہ بنت آ ھم پہ نھنگ ءِ نیمگ ءَ روگ ءَ بنت بومِن ءِ کَور ءَ گوں مزار رند ءَ کہ (انوگیں ملا مزار اسپی کہن ءِ پیروک بیت) ڈیکّ دئے اَنت۔۔۔۔۔ لوٹ اَنت مزار ءَ بہ پُل اَنت آئی ءِ مالاں بہ بر انت بلے مزار گوں ھمراھاں ڈڈّ بیت بے کوش ءَ وتی مالاں نہ دنت گڈا گمشاد زئی مزار ءَ گوں دو ھمراھاں کُش اَنت۔۔۔۔مزار ءِ دویں ھمراہ آئی ءِ ناکو زتک بنت۔۔۔۔۔چہ اشانی کُشگ ءَ پد گمشادزئی دیمترا نھنگ ءَ گوں شھسوار ءَ ڈیک ور انت پدا یکجاھی ءَ رو انت۔۔۔۔
چہ بھرام خان ءِ لشکر ءِ واترّی ءَ پد گچکی ءُ بارانزئیانی نیام ءَ نارازی یک ھسابے ءَ ھلاس بنت گڈا پہ دلانی نزیک کنگ ءَ میر بھرام ءِ خان ءِ برات میر علی محمد خان وتی چُکّ میر دوست محمد خان ءَ پہ میرمراد گچکی ءِ جنک بی بی فاطمہ ءَ (سردار نادرشاہ،پردل خان،دوست محمد ءُ تیمور شاہ ءِ گوھار بیت) سانگ دنت۔۔۔۔۔۔پردل خان،دوست محمد ءُ تیمور شاہ سردار نادرشاہ ءِ برات بنت بلے جِدمادر بنت بی بی فاطمہ چہ مات ءَ پردل خان ءِ زئیانی گوھار بیت۔۔۔۔۔
چہ اے سانگ بندی ءُ سلاہ ءَ دگہ بارانزئی ھاکم درست رازیگ بنت بلے بھرام خان ءِ گوھارزتک میربراھیم خان رازیگ نہ بیت۔۔۔۔۔۔ ھما وھد ءَ کہ اے سلاہ کن انت میر براھیم دپ ءَ تیر وارت ءُ ٹپّیگ بیت دومی پدا میر بھرام ءُ علی محمد خان مستر بنت آ ھمے سرپد بنت کہ بلکیں میر براھیم خان ءَ مئے سلاہ قبول اِنت۔۔۔۔
بلے میر براھیم خان وتی ناکوانی کُتگیں سُہل ءُ ترْان ءَ چہ ھچ پئیم رازیگ نہ بیت آ گوش ایت کہ چہ نادرشاہ ءِ شکایت کنگ ءِ سبب ءَ بُگان ءَ منی سئے مردم کُشگ بیتگ پدا ھمے بیر ءِ دئین ءَ منی ناکو میر امین ھم پہ منی ھاتر ءَ گوں ھمراھاں کُشگ بیت من پہ بھرام خان ءُ علی محمد خان ءِ کُتگیں سُہل ءَ ھِچّ سُہل نہ کن آں۔۔۔۔۔۔۔
پدا میربراھیم خان پہ تُمپ ءِ سردار نادرشاہ ءَ کاگدے نبشتہ کنت کاگد ءِ تہا آ اے نبشتہ کنت۔
“شما منی ناکواں گوں سُہل کتگ آھاں ھون بہا ءُ زرّ داتگ آ اُزر کُتگ اَنت ءُ آھاں سانگےھم داتگ۔۔۔۔۔۔بلے شما گوں من ھِچّ نہ کُتگ۔۔۔۔باید کہ توئے نادرشاہ من ءَ ھم رازیگ بہ کن من ءَ اُزر بکن چہ اُزر ءَ باز مردم گوش ایت کہ میربراھیم خان چہ نادرشاہ ءَ سانگ لوٹ ایت کہ من ءَ پہ وتی جنک ءَ زاماتی ءَ بہ زیر۔۔۔۔۔۔
وھدے اے کاگد نادرشاہ ءَ سر بیت چہ اے کاگد ءِ سربئیگ ءَ پد نادرشاہ ءِ نیمگ ءَ کاگد ءِ جواب پہ میربراھیم ءَ دیم دئیگ بیت اے کاگد کہ چہ سردار نادرشاہ ءِ نیمگ ءَ روت اے کاگد ءِ تہا سردار نادر شاہ میر براھیم خان ءَ سکّ بد ءُ رد کنت۔۔۔
آ نبشتہ کنت۔۔۔
“اگاں ما علی محمد خان ءِ چُکّ میر دوست محمد پہ زاماتی ءَ زُرتگ آ بلوچستان ءِ ھاکم اِنت مئے مَٹّ ءُ درور اِنت توئے پیرچینک وار ءُ ازگند وار کئے یے کہ چہ من اُزر لوٹ ئے ؟
ھمے کاگد ءِ تہا سردار نادرشاہ جزباتی بیت آئی ءَ گوں شِگان ءُ پِگان کنگ ءَ پجّی لھتیں سُبَکیں ھبر ھم نبشتہ کنت داں میر براھیم ءِ آنجگ ءِ نام ءَ ھم گپت ءُ دگہ لھتیں بدیں ھبر ھم نبیس ایت”۔۔۔۔۔
گیشتر مردمانی ھیال اِنت کہ اے کاگد ءَ نواب بائیان گچکی پہ میر براھیم ءَ نبیس ایت بلے نام ءَ سردار نادرشاہ ءِ نبشتہ کنت نادرشاہ پہ مردمانی گوشگ ءَ سکّیں سوبر ءُ سنگینیں مردمے بیت۔۔۔۔۔۔۔
چہ اے کاگد ءِ سر بئیگ ءَ رند میربراھیم خان سکّ برانز گِپت کہ من ءَ نادرشاہ ءَ بد ءُ بُلّ کُتگ، پیرچینکی ءُ ازگند وار گُشتگ۔۔۔۔
میر براھیم خان زھر گِپت ءُ گوش ایت ھر پئیم بیت من نادرشاہ ءَ پیش داراں کہ من کئے آں ۔۔۔۔۔۔
میر براھیم خان کساس چِل ءُ پنچ داں پنجاہ مردم ھمراہ کنت چہ ایرُکشان در کئیت۔۔۔۔۔۔۔آئی ءِ ھمرائی ءَ میر ھوتی للّہ زئی ، میر تاج محمد دِھانی ءُ لھتیں مردم چہ سلاہ کوھیاں ھم گون بیت۔۔۔۔میر براھیم خان اودا وتی ھمراھاں ھبر نہ کنت کہ من کئی جَنَگ ءَ روگ آں بلے گوں وت سلاہ زیر اَنت۔۔۔۔ وھدیکہ کاینت پُلّ آباد ءِ گوریچی نیمگ ادا جَمیگ ءِ چمّگ ءَ دار اَنت۔۔۔۔نوں ھمدا میر براھیم آھاں ھال دنت کہ من ءَ سردار نادرشاہ کُشگی اِنت۔۔۔۔
شپ کہ بیت گڈا میر براھیم خان وتی لشکر ءَ سئے جاہ ءَ بہر کنت ءُ شپ ءِ نھنگام ءَ پہ تُمپ ءَ روت۔۔۔۔
لشکر ءِ یک بہرے تُمپ ءِ مزنیں کلات ءِ دیما نادین ایت کہ اے کلات نواب بائیان گچکی ءَ گون بیت ، وت گوں ٹولی ءَ گومازی ءِ راہ نھنگ ءِ کَور ءَ بند ایت کہ چہ گومازی ءِ پلٹن ءَ سپاھیگ میا انت۔۔۔۔میر ھوتی ، تاج محمد دھانی گوں چیزے مردم ءَ نادرشاہ ءِ جند ءِ کلات ءَ رو اَنت شپ بیت ءُ سردار نادرشاہ واب بیت۔۔۔۔۔۔ نادرشاہ ءِ گارڈ ھم واب بیت اناگت گوں ھمیشانی پاد برْمشاں آگاہ بیت گوں گارڈ ءِ آگاہ بئیگ ءَ اے گارڈ ءَ تیرے جن انت ءُ کُش انت۔۔۔۔۔ گوں تیر ءِ توار ءَ سردار نادرشاہ ھم آگاہ بیت آ وتی کمرہ ءِ دروازگ ءَ پچ کنت کہ ڈنّ ءَبہ چاراں چے بئیگ اِنت۔۔۔۔۔۔ھمے وھد ءَ میر براھیم خان ءِ ھان زاتیں ٹیھ جُمّی گوں تپنگ ءَ دروازگ ءِ دپ ءَ اوشتاتگ بیت گوں دروازگ ءِ پچ بئیگ ءَ جُمّی سردار نادر ءَ ھِچّ موہ نہ دنت ءُ ھمودا جنت ءُ کُش ایت۔۔۔۔۔۔
نی براھیم خان ءِ لشکر سردار ءِ کلات ءَ گِپت چُکّ ءُ جنین درکاینت۔۔۔۔۔۔سرادر نادرشاہ ءِ دو جنیں چُکّ بنت اشاں ھم میربراھیم خان ءِ مردم کُش انت۔۔۔۔۔چہ اے جنیں چُکّاں یکّے جام آف لسبیلہ ءِ چُکّ ءِ نام گِپت بیت۔۔۔۔۔
پدا اے کلات ءِ تہا مال ءُ چیزاں مُچّ کن انت داں اینچوک ءَ براھیم خان ھم رس ایت گِند ایت منی ھمراھاں سردار نادرشاہ وا کُشتگ بلے دویں جنیں چُکّ ھم کُشتگ انت براھیم جست کنت شما جنین پرچا جتگ انت ؟
ھمراہ ئے پَسّہ دئے اَنت کہ ما چار اِتگ تو جنیں چُکّاں آوار جن ئے ءُ گوں وت برئے اے ھبر انچوش پہ گچکی ھاندان ءُ دو ھمینچو پہ مارا ھم بنّامی بیت پمیشکہ ما اے جنیں چُکّ کُشتگ انت۔۔۔۔
اے شپی کہ میربراھیم گوں ھمراھاں تُمپ ءَ نادرشاہ ءِ کلات ءِ سرا اُرش کنت ءُ آئی ءَ گوں دویں جنیں چُکّ ءُ یک گارڈے ءَ کُش ایت اے شپ ءَ تاریخ 6 اکتوبر 1921 بیت۔۔۔۔۔چہ تُمپ ءِ کلات ءِ اُرش ءَ پد میر براھیم گوں وتی ھمراھاں شپ کنت در کئیت ءُ روت۔۔۔۔۔
(روان اِنت)