تھنا کہ آ دل ءَ وتی جیڑیت، ھیال کنت
نبشتہ کار: قدیر لقمان

قاضی مبارک انچیں نامے کہ ھر بلوچ ءُ بدروچے آشنا اِنت۔ زیکیں نوبتاں کہ چارئے، ترا بلوچ ءِ پدریچ گندگ ءَ کئیت۔ کرن گوزاَنت، ماں راجاں چشیں کواس ءُ شھزانت ودی بنت۔ یکّے فاضل اَت کہ ملّا بوت، یکّے مبارک اِنت کہ قاضی بوت۔ بلے، کسّے گشت کنت کہ قاضی چہ تنھائی ءَ پرچہ بیزار اَت؟
تھنا کہ آ دل ءَ وتی جیڑیت ھیال کنت۔۔
گیشتراں کہ گوں قاضی ءَ وھد گوازینتگ، آھاں اے پد جنگ ءِ جھد نہ کتگ کہ قاضی ءَ پرچہ دُژمان داتگ۔ اے ھبر ءَ ھوں کس نہ جیڑیت کہ اگاں اے ھما قاضی بوتیں کہ اسل ءَ ھمیش اَت، گڑا آئی ءِ ساچشتاں الّم گندگ بوت۔ اے قاضی پاد پر دئیگ ءِ قاضی اَت۔
اسلم رئیسانی وھدے سر وزیر کنگ بوت، گڑا مردماں گُشت کہ اے وڑیں مردمے سروزیر کنگ بوتگ۔ بلے، راجدپتر گواھی دنت کہ زوریں بے سار ءَ پہ زانت چوشیں کار نہ کت کہ راجی تاوانے بہ بیت۔ اے ھم چارگ لوٹیت کہ شہزانت ءُ کواس چوش چیا بنت۔ چاگرد ءِ سزاواری اِنت، تھنائی ءِ مارشت اِنت، راجی نادزرسی اِنت، بے مھری اِنت، یا آ کجام چیز اِنت کہ ترا انچو بے تاھیر کنت کہ واز بکن ئے، کوکار بہ کن ئے، چوش بہ بئے۔
دژمان ءُ زاہ انسانی جوزگانی کتارسز اِنت۔۔۔ چہ گنوکی ءَ رکّگ ءِ، چہ اسّاسی ءَ دگہ کارے ءِ کنگ ءِ یا پہ امبروز ءِ گماں ایر برگ ءَ۔
پدا، اے نمیرانیں مبارک ءِ دل ءَ بچار اِت۔ اے ساھت ءَ گپّے، دیم ءِ ساھت ءَ پراموش۔ وت پراموش ءُ دیم ءِ مردم پراموش۔ پھک دلیں تچکیں پیرمرد۔
شاعرے یا کہ گنوکے بلے تچکیں مردے
قاضی ءَ دھر ءَ وتی نام نمیران کتگ
گپ ایر برگ بنت، ردی پھل کنگ بنت، یاد مان اَنت۔ کردار ءِ شاھیم ءَ شرّ ءُ ھراب تورگ بنت، راج ءُ چاگرد ءَ داتگیں سوگات تورگ بنت۔ پرے قاضی ءَ چم نز کنگ ءَ ھم شراء جنگ بیت۔
زی کہ جنازہ ءَ پد قبرستان ءَ شتاں، قاضی ءِ مانش مردماں انگر کتگ اَت۔ مردم ھمینچو باز کہ سنگتے ءِ درگیجگ ءَ موبائیل کار بندگی اَت۔ چک ءُ چوریگانی گَلگے نشتگ اَت ءُ گونڈو یے ءَ کروسے ھم گون اَت۔ سیاہ پٹیں کروس ءَ سْرکگ نہ کت۔
من ھمے گونڈو ءَ را جست کت کہ ترا قبرستان ءَ کروسے گون اِنت، اِدءَ گوں کروس ءَ چے لوٹ ئے۔ گونڈو ءِ چمّانی سُھری وت گواھی دئیگ ءَ اَت، بلے گشت ئِے، واجہ ابّا مُرتگ، من چوں نیا آں۔
اے ھما چک ءُ چوریگ اِتنت کہ نا سیاد، نا وارس۔ واجہ ابّا ءِ مھراں آؤرتگ اِتنت۔ بال ئِے پاد ءَ نیتک، بلے گوں اشاں فٹبال ئِے کت۔ کروس ءِ سْرکگ ھم شبین دَیگ ءَ اَت کہ قاضی ءَ سر ایر کتگ۔
دل کہ دردانی شھاز ءَ در کپیت
مھر ءِ سازندہ گوں ساز ءَ در کپیت
۔۔
آزمان ءَ سرشپ ءَ چوگان بیت
وھدے قاضی پہ نماز ءَ در کپیت

ھبدہ ستمبر دوھزار بیست ءُ سے