تیوگیں آزمان مجاں گپتہ۔ نور سلام نور ءِ دستونک
دستونک: نورسلام نور
تیوگیں آزمان مجاں گپتہ
بیدء تو زندمان مجاں گپتہ
مانشانتگ تہاری ءَ چماّں
ماہکانیں شپاں مجاں گپتہ
باریں چنچو چراگ اُمیت ءِ
دستءِ ناسرپداں مجاں گپتہ
تو منی بئے، نہ بئے ہمے گپا
جیڑئتہ جیڑگاں مجاں گپتہ
جنگلءَ آس لگئتہ کُدواں
شانتلی نالگاں مجاں گپتہ
پیرک ءِ کسّہانی تام شُتہ
بَلُکّ ءِ ماسگاں مجاں گپتہ
تالہءَ دروہتگ منا کہ مئے
مُہکمیں واہگاں مجاں گپتہ
مہر ءِ راہ ءَ دوئین پیوستاں
کندگ ءُ گریوگاں مجاں گپتہ
من کئی نور مِنتّ ءَ بگِراں
کہ منی دیدگاں مجاں گپتہ