جیڑہ۔ نبشتہ کار: شاھُل بلوچ
جیڑہ
شاھُل بلوچ
چوناھا وَ گپ کنگ المی نہ اِنت پرچا کہ مئے چاگرد ءَ گواچنی ماں مُجاں اَندیم اِنت۔ بلے برے برے اگاں ھاموش باں ءُ ھِچ نہ گْوشاں گُڑا لبز منی اَندر ءَ دَجنت من ءَ۔۔۔بَدبھتی ءَ مئے لبزانک ءَ سید ھاشمی ءُ سباہ ءُ عطاشاد ءَ اَبید انگت چُشیں مردم ودی نہ کتگ کہ اے پدمنتگیں لبزانک ءَ وتی کوپگاں بہ زیر اِیت۔ اگاں دست کپ اِیت گُڑا ایشاں سَگ ءُ اوپار ءُ اَٹیگ ءِ زِکت نیست۔۔
منی واستہ آ درستانی بالاد یک ھساب ءَ اَنت کہ آ گوں بلوچی زبان ءُ لبزانک ءَ مِھر کن اَنت ءُ گوں بلوچی زبان ءَ بندوک اَنت، بلے اِزم ءُساچشت ءِ ھساب ءَ درستانی بالاد یک نہ بنت ھر نِبشتہ کار ءُ ساچشتکار ءِ وتی بالادے۔ بلے مئے چاگرد ءَ اِزم ءُ ساچشت چارگ نہ بنت بلکیں ھما نِبشتہ کارے زاتی زندمان چارگ بیت یا کہ آئی ٹَک ءُ کٹم چارگ بیت مئے چاگرد ءَ زیکی گوں نِبشتہ کاراں زوراکی بوتگ مرچی ھم بوھگ ءَ اِنت۔
اگاں زیک ءَ ما بہ چار اِیں عطاشاد ءَ مردماں گینگ کُتگ کہ تو مئے پِت ءُ پیروکی شائری ھراب کُتگ آ را بد ءُ رَد کنگ بوتگ ءُ واجہ حکیم بلوچ وتی کتاب (مانش دانش) ءِ تہ ءَ نِبشتہ کنت: “میں نے بقول امان اللہ گچکی صاحب(سنگانی سر کے اُستاکار شائر کے لئے ایک مرثیہ لکھا ہے)” (مانش دانش تاکدیم 44)
شرگداری ءَ لھتیں راہ رھبند ھست اِنت بلے مئے مردم شرگداری ءِ نام ءِ سر ءَ وتی زاتی زِدانی زاھر ءَ نِبشتہکار ءِ سر ءَ کَش اَنت۔ اگاں زات ءُ ٹَک چارگ مبوتیں منی ھیال ءَ عطاشاد ءِ شائری مئے گْوستگیں شرگدارانی پھم ءَ اتکگ اَت۔ بِگندۓ عطاشاد بَد ءُ رَد کنگ نہ بوتگ اَت۔۔
مئے لبزانک ءَ ردانک ءِ درپ زیکی ھورک بوتگ مرچی ھم ھورک اِنت (ھورک ھمے واستہ اِنت کہ ترا شریں ساچشت گندگ نئیت) مرچی ھم وانوک تچک نہ اَنت کہ بلوچی ءِ جوانیں ناول کجام اِنت یا کہ جوانیں آزمانک کجام اِنت۔ ما گوں اَنچیں چاگردے ءَ بندوکیں کہ نَگدکار وت جُست کن اَنت کہ تئی ساچشت ءِ سر ءَ نگد بہ کن آں یا کہ اِنّا، اے بَژن ءِ گپے۔۔۔
اگاں ما بہ چار اِیں مئے رِدانک نویس دْرست شائر بوتگ اَنت یکے رَندے آیاں الم شائری ءِ کِشک ءَ وتی بور تاچینتگ۔ بِگندۓ لھتیں انچیں ھست اِنت کہ آ تھنا رِدانک نویس اَنت۔
اکتاؤ پاؔز وتی گُلگِدارے ءِ تہ ءَ جُستے ءِ پَسّو چُش دنت: “لچہ کار گِدار نویس نہ اَنت”۔۔۔بلے مئے رِدانک نویس گیشتر شائر اَنت انچوشکہ بِندات ءَ ڈاکٹر حنیف شریپ، ڈاکٹر ناگمان، غنی پرواز ءُ دگہ۔۔۔۔
منیر مومن ءِ لیلان کہ آئی آزمانکانی دپترے، اگاں آئی ساچشت چارگ بہ بیت آئی ءَ آزمانک ءِ دْرستیں راہ رھبند پیلو کُتگ اَنت جْوانیں آزمانک نِبشتہ کُتگ بلے آئی زبان شَیری زبانے آئی آزمانکانی وانگ ءَ چہ سَما کپ اِیت کہ زبان ردانکی لچہ ءِ زبان اِنت، ھیر اے وھد ءِ وَ لوٹ بوتگ کہ منیر مومن رِدانک ءِ نیمگ وتی ھیال گْور کُتگ ءُ وتی اِزم پیش داتشتگ۔۔۔
اے رَنگیں کار نَگدکارانی کار اِنت بلے نَگدکار کئے اِنت؟ اے جُستے،ایشی واستہ مارا تاگ ءُ تاچ کنگی اِنت وانگی اِنت،زانگی اِنت۔۔
بائِد اِنت ھر نِبشتہ کار ءِ اندر ءَ یک نگدکارے ءِ بوھگ المی اِنت۔