داب کنت میتگ ءَ ساحریں زندماں شئیر اوشتاتگ اَنت۔ منیر مومن
دستونک
منیر مومن
داب کنت میتگ ءَ ساحریں زندماں شئیر اوشتاتگ اَنت
منیر مومن
داب کنت میتگ ءَ ساحریں زندماں شئیر اوشتاتگ اَنت
لُڈّگا اَنت بدن، لَڈْگا اِنت زباں شئیر اوشتاتگ اَنت
درد دانکے نہ کنت سازاں پیڑاتگ اَنت دامن ءِ دوچ تئی
وھد ھیران کہ ماں تئی موردانگاں شئیر اوشتاتگ اَنت
اچ تئی رپتن ءَ رَند ھم جلِْتہ مہلبیں زیمرے
ما وَ در َ کپتگیں سرگراں سرگراں شئیر اوشتاتگ اَنت
رنگ تالان بہ بنت ھورکیں دمک ءُ دراں ساہ پدا مان بہ بیت
کسّے ھالے بِد اَنت چمّ ءِ تئی زیمراں شئیر اوشتاتگ اَنت
شادھے یا گمے، کَس مبات اِنت زبہر اَچ تئی گُشتناں
پاتوئی بانزلاں ءُ سگاری زِھاں شئیر اوشتاتگ اَنت
تالِہ ءِ زاپراں چہ کہیباں تئی شِنگ ءُ تالان بنت
جُمبِتہ گُلزمیں جُنزِتہ آزماں شئیر اوشتاتگ اَنت
تئی زھیر ءِ ھوَس چو کہ کَہریں جُڑ ءَ ماں سر ءَ جُنزِتہ
مَیّتیں نوبت ءِ ناچ کُرتہ بُتاں شئیر اوشتاتگ اَنت
گوں تئی کِنزگ ءَ زیمرانی مُجے شِنگ ءُ تالان بیت
چو گنہگارے ءَ ماں تئی موردانگاں شئیر اوشتاتگ اَنت
مرچی سئوتاں منیر دل اوں ھمراہ نہ اِنت گْوات ءِ ایماں شُتہ
کارواں رَپتگ اَنت مہتل اَنت کارواں شئیر اوشتاتگ اَنت