سرگوست: دستی گوانکو ءِ دُزّی ءُ گاری ءُ واری
زاھدہ رئیس راجی
سی اگست ءَ سُھب ءِ ادار 9 ءَ من جناح ہسپتال کراچی ءَ سربیت آں ۔ چَہ کاؤنٹر ءَ پرچی زورگ ءَ رند من جنینانی ردءَ شُت نشت آں ۔ اودءَ شُلُک نیست ات ۔ چَہ وتی کش ءِ جنین ءَ جُست کُت کہ باریں چَہ داکترانی اوتاگ (کوٹی ) ءَ کسے اتکگ پہ پرچی ءِ زورگ ءَ ، آئی ءَ دراھینت کہ اناں تنیگہ نہ اتکگ بلے چار مردم تہ ءَ شُتگ انت بزاں داکتر تہ ءَ است انت ۔
من دلجم بیت آں ۔ ھمے جنین ءَ من ءَ جُست کُت کہ تئی پرچی ءِ نمبر چی یے ۔ من پسہ دات سی ءُ یک ، آئی ءَ گوشت کہ منی بیست ءُ پنچ انت بزاں من چَہ ترا پیسر تر رواں ۔ من گوشت شر انت ۔چیزے وھد ءَ رند پدءَ گپ ءِ جنگ ئِے بنا کُت کہ من ءَ شکر ءِ نادراھی ءَ گپتگ ءُ ھون ءِ پشار ھم مُدام بُرز روت ، ءُ ادءِ داتگیں درماناں ھم بدھال کُتگ ۔ پمشکا منی چُک من ءَ تھنا درکپگ ءَ نئیل انت ۔ انوں ھم چُک ءَ وتی گاڑی ءِ سرءَ من ءَ آرتگ ۔ زانگ نہ بیت مردم کُج ءَ بہ روت پہ ھلاج ءَ کہ ھرکد ءَ دوا بہ ور مردم روچ پہ روچ گوش ئے کپان انت۔
من گوشت کہ چونائی ءَ بازینے زیتون ءَ پہ شکر ءِ نادراھی ءَ ءُ سِرک ءَ پہ ھون ءِ پشار ءِ نادراھی ءَ وارت ۔ درمانانی ھمراھی ءَ ایشاں ھم بہ چکاس، بلکیں نپے بہ دنت ۔ آئی ءَ دراھینت کہ زیتون ءَ من نہ زان آں ۔ ترا اگاں موبائل گون انت من ءَ اکس ءَ پیش ئِے بہ دار۔ منی گورءَ اکس ایر ات من پیش داشت ۔ رند ءَ آ جنین چَہ من ءَ نام ءِ جُست ءَ لگ ات ءُوتی بابت ءَ گوشگ ءَ لگ ات کہ چَہ کورنگی ءَ اتکگ ۔چد ءُ پد ما دوئیں بے توار بیت ایں۔ شریں دمانے ءَ رند ودار کنگ ءَ دم بُرت اوں گُڑا پہ وھد ءِ چارگ ءَ من وتی گوانکو بیگ ءِ تہ ءَ پچ کُت ءُ چارات ، ادار دَہ ءُ نیم انت۔ پدءَ من گوانکو بند کُت ۔
پانزدہ منٹ ءَ رند منی کش ءَ نشتگیں جنین داکتر ءِ کوٹی ءَ شُت ءُ ایشی ءِ جاگہ ءَ بزاں منی کش ءِ سندلی ءِ سرءَ بلوچی گُدانی تہ ءَ یک سندھی زالے اتک نشت ءُ وتی پرچی ءَ پیشدارگ ءَ لگ ات کہ ایشی ءِ نمبر ءَ بہ چار چی انت ۔ من بلوچی ءَ پسّہ دات کہ شست ءُ نو انت ۔ چاراں بانک نہ پھمگ ءَ انت ءُ گوں سندھی ءَ رپٹگ ءَ انت ، گُڑا من اردو ءَ پسہ دات ءُ وتی باریگ ءِ ودار ءَ نشت آں ۔
ادار یازدہ ءَ پیش منی باری اتک گُڑا من شُت آں ۔ زوت گِشگ ءَ پد من ڈن ءَ اتک آں۔ روڈ ءِ سرءَ ھالیکیں بسے ھم من ءَ زوت رس ات ءُ کساس 11:45 ءَ من لوگ ءَ سر بیت آں ۔ انچوش بیگ ءَ پچ کن آں چاراں موبائل نیست ۔ شری ءِ سرءَ تپاسگ ءَ رند من کماش سھیگ کُت ۔ کماش ءَ منی گوانکو ءِ سرءَ زنگے جَت بلے ھاموش اَت ۔ کماش ءَ برات ھال دات کہ زاھدہ ءِ دستی گوانکو کسے ءَ بُرتگ ۔ زوت سی پی ایل سی ءَ ھال بہ دئے ۔
برات ءَ گوشت کہ شما تچک ءَ بہ رو ات وتی سم کارت ءِ ادارہ ءَ ءُ اے سم ءِ گاری ءُ دومی سم ءِ کشگ ءِ گار ءَ بہ کن ات دانکہ موبائل ءِ سرءَ سِم کار مہ کنت ۔ یوفون ءِفرنچائیز مئے لوگ ءِ کش ءَ ات ما زوت شُت ایں ءُ سم کارت نوکیں کشائینت ۔
چوشکہ منی دستی گوانکو ءِ دراھیں نیٹ ایپلیکشنز (بزاں واٹس ایپ ، انسٹا ءُ دگر بگر بہ دار ) گوں ایمیلزاں ھمگرنچ انت پمشکا من چَہ لیپ ٹاپ ءَ وتی جی میل اکاؤنٹ پچ کُت ءُ تپاسگ ءَ لگ اتاں کہ منی اے اکاؤنٹ ءَ گوں کجام کجام کاربوج (ڈیوائیس ) ھمگرنچ انت ۔
آئی ءَ من ءَ پیش داشت کہ منی موبائل گُڈی وھد ءَ ادار یازدہ ءَ پچ کنگ بیتگ ءُ یکے ءَ منی نیٹ ایپس کارمرز ءِ جُھد کُتگ ۔
من ترانگ ءَ کپت آں کہ منی کش ءِ زال ءَ منی نام جُست کُتگ ات متلب آ چَہ منی نام ءِ اولی آب ءَ گوانکو ءَ پچ کنگ ءِ جُھد ءَ کنت پرچا کہ دُز چَہ مارا شرتر زان انت کہ مئے چاگرد ءَ درست چَہ وتی نام ءِ اولی آب ءَ گوانکو ءَ لاک کن انت کہ اے مئے شمئے مزنیں ردی یے۔
من ھما دمان ءَ دراھیں کاربوجاں گوں اے ایمیل اکاؤنٹ ءِ ھمگرنچی ولگوج کُت ءُ جی میل ءِ پاسورڈ ھم مٹینت ۔ چریشی ءَ نپ اے رس ات کہ دُز ستر وتی وس ءَ واک ءَ بہ کنت منی واٹس ایپ ءِ مردماں کلوہ دیم دات نہ کنت ۔ بلے نوں جیڑہ ایش ات کہ آئی ءِ دست ءَ ھما گوانکو اتکگ آ آف لائین کلوھاں ونت ءُ دیست کنت ءُ اودءَ منی زاتی ، آفیشل ءُ وانگ ءِ دراھیں سندانی اسکین کاپی ایر بیتگ انت کہ آ من ءَ وتی مزن شاہ دربرجاہ ، کار ءِ شوھازگ ءِ جاہ ، بینک ءُ وتی برات ءَ دیم دیگی بیتگ انت ءُ رند ءَ ایشانی ولگوج کنگ من پھک ءَ شموشتگ ات ۔
دو ادار ءَ رند برات ءَ من ءَ پت ءِ گوانکو ءِ سرءَ ھال دات کہ سی پی ایل سی، منی شکایت ءَ نہ زورگ ءَ انت ءُ گوشگ ءَ انت کہ گوانکو گھار ءِ بیتگ ، گھار ءِ جند رھوت (رابطہ ) بہ کنت ۔منی برات ءَ من ءَ سوج دات کہ تو آھاں اے مہ گوش کہ تئی گوانکو دُزی بیتگ ، بلکیں اے بہ گوش کہ نزاناں کُج ءَ کپتگ وھدے من چَہ بیگ ءَ زر یا دگہ چیزے کشگ ءَ بیتگ آں ، پرچا کہ آ ترا مجبور کن انت کہ تو پولیس ءِ گورءَ ایف آئی آر درج کنائینین ۔
من چَہ لوگ ءِ شمارہ ءَ سی پی ایل سی ءِ 1120 ءَ زنگے جَت ۔ آھانی جھگیر ءَ چَہ من ءَ گوانکو ءِ نام ، گوانکو ءِ رنگ، برانڈ نام ، ماڈل ، ای ایم آئی ءِ دوئیں نمبر زُرت انت ، پدءَ جُست کُت کہ کُج ءَ گار بیتگ ۔ آ دم پہ ساھت جُست ءَ ات کہ کُج ءَ دُزی بیتگ من دُزی ءِ جاہ ءَ گاری ءِ نام ءَ گران اتاں ءُ گوشگ ءَ اتاں کہ زانگ نہ بیت جناح ھسپتال ءِ توک ءَ یا ڈن ءَ یا بس ءِ سرءَ کپتگ یا دگہ جاھے ءَ زرانی کشگ ءِ وھد ءَ ۔
آ منی پجار کارت ءِ شمارہ (این آئی سی نمبر ) زورایت گوں لوگ ءِ ڈس ءُ نشان ءَ ءُ پدءَ یک نمبرے دنت کہ ایشی ءَ وتی گورءَ ایر بہ کن ۔ ھروھد ءَ ترا گوانکو ءِ بابت ءَ جُست پرس کنگی بیت اے نمبر ترا مالوم بہ بیت ۔
من گوانکو بلاک کنگ ءِ بابت ءَ جُست کُت، سی پی ایل سی ءِ جھگیر ءَ دراھینت کہ نوں بلاک ءِ کار ءَ ما نہ کن ایں ، ما کرائیم سیل ءِ رپورٹ لک ایں ۔ بند کنگ ءِ کار ءَ پی ٹی اےءِ دست ءَ انت ۔ تو آھانی ایپ ءَ کارمرز بہ کن یا سائیٹ ءَ بہ رو ۔
من چَہ پی ٹی اے ءِ سائیٹ ءَ کہ اے کار ءِ کنگ ءَ شُت آں چاراں نہ بیگ ءَ انت۔
من یک نزیکیں اھوالکارے کہ یک ٹریننگ ءَ گوں ما ھمراہ بیتگ ، آ سھیگ کُت کہ پی ٹی اے ءِ اپیلیکشن کار ءَ نہ انت کہ آ گوشگ ءَ انت پولیس تھانہ ءِ ایف آئی آر ءِ نمبر ءَ مان بہ کن۔
اھوالکار ءَ گوشت کہ چونائی ءَ سی پی ایل سی ءُ پی ٹی اے ءَ شکایت لکارینگ ءَ رند تھانہ ءَ روگ ءِ زلورت نہ کپ ایت بلے نوں کہ پی ٹی اے ءِ ایپلیکشن کار ءَ نہ انت تو ھچ دابیں رِسک (ھتر ) مہ زور ۔ وت مہ رو ، برات ءَ دیم بہ دئے بلّ ئِے رپورٹ لکارین ایت ۔ نتہ دُز اگاں گوانکو ءَ پہ ھرابکاری ءَ کارمرز بہ کن انت ، رند ءَ درست تئی نام ءَ کاینت ۔
30 تاریخ ءِ سرجمیں روچ گوں ایپ ءِ سرپُتی ءَ گوست ءُ ھچ نہ بوت ۔
31 ءَ بانگواہ ءَ مئے وتیگے ءِ بیرانی ءِ ھال اتک ءُ تاں ادار 2 ءَ ما ھمانگور ات ایں ۔ رند ءَ پدءَ اے ایپ ءِ سرءَ کار کُت، برے گوش ایت کہ ای ایم آئی شمارہ رد انت ، برے گوش ایت کہ او جی ٹی شمارہ رد انت ، برے گوش ایت کہ ایف آئی آر مان نیست ۔
منی برات ءَ دوبر اتک وس کُت بلے نہ بیت ، آئی ءَ دوبر سی پی ایل سی ءَ زنگے جت ، آھانی جھگیر ءَ انچوش گوانکو ءِ ایم ایم آئی نمبر اِشکُت گوشت ئِے کہ اے گوانکو ءِ دُزی \ گاری ءِ شکایت زیک اتکگ ءُ ایشی ءِ سرءَ کار بیگ ءَ انت ۔ شما چَہ پی ٹی اے ءِ سائیٹ یا ایپ ءَ وتی گوانکو ءَ بلاک بہ کنائین ات ۔
اناگہہ ءَ منی مجگ ءَ ھیالے اتک کہ ھما وھد ءَ اے گوانکو کہ من ءَ برات ءَ داتگ ات آئی ءِ رجسٹریشن من چَہ سائیٹ ءَ کُتگ ۔
گوگل ءِ سرءَ من شُت پی ٹی اے ءِ لوگن تاک شوھاز کُت ءُ تچک ءَ ھمودءَ سر بیت آں ۔ وتی آئی ڈی چار ات ءُ پدءَ لوگن بیت آں چاراں دراھیں مالومداری کہ کجام وھد ءَ من وتی گوانکو رجسٹرڈ کُتگ ءُ گوانکو کئی نام ءَ انت اے درست اودءَ ایر انت ۔
نوں برات ءَ گوشت کہ تو شکایت فارم ءِ سرءَ بہ رو ۔ اودءَ من دراھیں گوانکو ءِ مالومداری مان کُت انت۔
فارم ءِ اسکرین ءَ داتگ ات کہ شمارا وتی گوانکو بلاک کنائینگی انت یا دگہ کارئیگی شما فارم پُر کنگ ءَ ات ، من بلاک ءِ سرءَ ٹک جت ۔
پدءَ برات ءَ وتی کسانوکیں گوانکویے من ءَ دات کہ وتی سم کارت ءَ ایشی ءِ تہ ءَ مان کن ءُ بہ چار ، فارم ترا جی ٹی او کوڈ ءَ دیم دنت ۔
دو دمان ءَ رند کوڈ گوانکو ءِ سرءَ رس ات ۔ من اے فارم ءِ تہ ءَ مان کُت ، شکایت سرجم بیت ءُ دیم دیگ بیت ۔
پی ٹی اے ءَ من ءَ ایمیل ءُ ایس ایم ایس ءِ سرءَ ھال دات کہ تئی گوانکو بلاک کنگ ءِ شکایت مارا سر بوتگ ،ھرچ گامگیجے زورگ بیت انت ترا ھال دیگ بیت ۔
چونائی ءَ ما دلجم بیت ایں کہ دز ھرچے بہ کن انت آ مئے نام ءَ نہ بنت بلے انگت پریشانی آئی ءِ سرءَ ایریں مالومداریانیگ ات انت ۔
کساس دو ادار ءَ رند پی ٹی اے ءَ من ءَ ایس ایم ایس ءُ ایمیل ءِ وسیلہ ءَ سھیگ کُت کہ تئی شکایت ءِ سرءَ دستی گوانکو بلاک کنگ بیتگ ۔ اگاں ترا چہ جاھے ءَ گوانکو دوبر دست کپت یا ھما جاہ ءَ کہ تو گوانکو ءِ گاری ءِ شکایت داتگ ، آھاں دست کپت ءُ تو لوٹ ئے کہ وتی گوانکو ءِ بلاک ءَ پچ بہ کنائین ئے ، اے نمبر (شمارہ ) ءَ دوبر مارا بہ دئے ما ایشی ءَ پچ کن ایں ۔ اگاں شما چَہ مئے کار ءَ دلجم ات ، چمشانک ءَ جھل ءِ لنک ءَ بہ دئیت ۔ من دلجمی زائر کُت ءُ اے داب ءَ گوانکو ءِ مالومداریانی تاوان ءَ رکینگ بیت ایں ۔
ادءَ وتی سرگوست ءِ نبشتہ کنگ ءِ مول ءُ مراد ایش انت کہ منی جند آئی ٹی ءِ پڑ ءِ مردمے کہ انچو چست ایر من زانتگ بلے مئے بازیں وانوکیں اے بابت ءَ نہ زانت ۔ آ چَہ منی سرگوست ءَ درونتے یا درسے بہ زور انت۔
اولی گپ پبلک پلیس ( شُلُکیں جاگہ ) ءَ ھما مردم ءَ نہ زان ئے گوں آئی ءَ ھمدردی یا نیکی مہ کن ئے کہ رند ءَ منی پیم ءَ وار بئیت۔
منی داب ءَ بازیں جنک ءُ جنین وتی چادر ءِ چیر ءَ پرس یا بیگ ءَ ایر کن انت کہ من ءَ سرءَ ایر کنگ ءِ ھم بدیں تجربہ یے (دُزی بیگ ءِ ) لھتے ماہ پیسر بیتگ پمشکا من چیر ءَ ایر کنگ ھیل کُتگ بلے یک گپے شموشتگ کہ اگاں سندلی ءِ سرءَ نشتگ ئے یا زمین ءِ سرءَ ھم وتی پرس یا بیگ ءَ کُٹ ءَ بہ کن آں ، کش گورءَ مہ بیت کہ دُز دُزی ءَ ھچ چک ءُ پد نہ بنت ۔
ھمک لمسی گوانکو یا ٹچ موبائل کارمرز کنوک وت ءَ گوں جی میل ءِ اکاؤنٹ ءَ ھمگرنچ بہ کنت ۔ وتی واٹس ایپ ءُ انسٹا ءُ دگہ ایپلیکیشنزاں گو ں ھمے ایمیل ءَ ھمگرنچ بہ کنت۔ داں نوکیں موبائل یا گوانکو ءِ سرءَ اے دراھیں دوبر جی میل ءِ وسیلہ ءَ انسٹال کنگ بہ بنت ۔
ھمک چیزے وھد ءَ رند وتی بیک اپ ءَ جی میل ءِ ڈرائیو ءِ سرءَ ایرکنان بہ کن ات ۔ گوانکو ءِ دراھیں کانیٹکٹ نمبرز ءُ ناماںھم جی میل ءَ گوں ھمگرنچ بہ کن ات ۔
گوانکو ءِ سرءَ پاسورڈ یا کُبل الم ءَ جنگ بہ بیت ءُ نام ءِ اولی آب ءَ ھجبر مہ دئیت کہ دُز ھمشی ءَ کارمرز کن انت ۔
واٹس ایپ ءِ 2 اسٹیپ سیکیوریٹی آسراتی ءَ الم کاررمز بہ کن ات ءُ اودءَ وتی جند ءِ لنکگ ءِ نشان ءَ گوں پچ بند بہ کن ات ۔
اگاں شمئے جند ءِ گورءَ کمپوٹر (ڈیسک ٹاپ ، لیپ ٹاپ ، ٹیبلیٹ ) است ، اودءَ وتی واٹس ایپ ءَ انڈیپینڈینٹ ورژن ءَ انسٹال بہ کن ات ءُ الم ءَ یک دو رند ءَ پچ بہ کن ات کہ ایشی ءِ نپ شمارا گاری ءِ وھد ءَ گیشتر رس ایت کہ شما وتی گوانکو ءِ گاری ءِ ھال ءَ ھمے ایپلیکیشنز ءِ وسیلہ ءَ وتی مردماں دات کن ات ءُ وتی بیک اپ ءَ زورگ ءَ رند وتی واٹس ایپ ءِ بازیں ھساسیں نکاناں ڈیلیٹ کُت نہ کن ات ۔
ھروھد ءَ کہ گوانکو دُزی بیت یا گار بیت۔ پیسر ءَ وتی سم کارت ءَ بند بہ کنائین اِت ۔ چوشکہ سم کارت بندکنائینگ مروچاں مزنیں چست ایری کار انت پمشکا نوکیں سم کارتے گوں وتی پجار کارت (این آئی سی کارڈ ) ءِ وسیلہ ءَ بہ کشائین ات ۔ آ جُست کنت بہ گوش ات کہ راہ ءَ گار بیتگ پمشکا زوت نوکین ءِ زلورت انت ۔ ڈپلیکٹ سم کارت کہ درکئیت، اولی سم کارت وت سرءَ بلاک بیت انت۔
چہ سی پی ایل سی ءِ نمبر 1120 ءَ کال بہ کن ات ءُ وتی گوانکو ءِ بکس یا ڈبہ ءِ سرءَ نبیس اتگیں مالومداریاں بہ دئیت ۔
چوشکہ گوانکو ءِ بکس یا ڈبہ ءِ سرءَ داتگیں گیشتریں نام ءُ شمارہ سک ارت نبشتہ انت ءُ مئے رنگیں عینکی گنتر پہ چارگ ءَ ازاب بنت پمشکا دگرے ءِ گوانکو ءِ سرءَ اکس ءَ بہ کش ات ءُ مزن بہ کن ات ءُ کاگدے ءِ سرءَ گوانکو ءِ نام ، ماڈل ، برانڈ، ایی ایم آئی ءِ شمارہ ، ءَ نبشتہ کن ات داں سی پی ایل سی ءِ جھگیر ءَ گوں گپ ءِ وھد ءَ زوت زوت ءَ اے بابت ءَ پسہ دات بہ کن ات ۔
سی پی ایل سی ترا شکایت نمبرے دنت ، آئی ءَ ھم کاگدے ءِ سرءَ بہ نویس ئے ۔
نوں پی ٹی اے ءِ سائیٹ ءَ گوگل بہ کن ات ءُ اودءَ کنزیمور فارم ءِ سرءَ بہ رو ات ۔ وتی نوکیں سم کارت ءَ یک سادہ ئیں گوانکو یے ءِ سرءَ ایر بہ کن ات تاں پی ٹی اے ءِ فارم ءِ کوڈ کہ ادءَ دیم دیگ بیت شما آئی ءَ دیست بہ کن ات ءُ شکایت ءَ سرجم کنائینت بہ کن ات ۔
اے رھبند ءَ گوں شمئے گوانکو بلاک ھم بیت انت( پہ دُز ءَ اے لیبوکے ءَ گیش ھچ نہ بیت) ءُ مالومداری ھم چَہ دُزانی کارزوالی ءَ رکینگ بنت ۔
اگاں زندگی ءَ موہ دات من ایشی ءِ سرءَ گونڈیں تامُر ے اڈ کن آں ایر کن آں ۔ تاں زوتر پھمگ ءُ سرپد ی زورگ بہ بیت ۔
سلامت بات ات
نیکیں دُوایانی مُدام رھچار