دُرّ دانکانی چار ءُ تپّاس اِنت۔ منظور بسمل
دستونک
منظور بسمل
دُرّ دانکانی چار ءُ تپّاس اِنت
گُشتگ اِش گِندئے ‘پُکّی اِنت آس اِنت’
چمّ نزّ اَنت، تْرَکّنت ماتکی٘نُک،
کانگیءِ کْراک یا کہ گْورداس اِنت؟
پُورُّکی رُمب، بال گاشان اِنت
کئی تَبءِ نازُکی اِنت سَنجاس اِنت
یک تب ءُ تالِہ اَنت بلوچ ءُ روچ،
بس وتی پیژگاہ کوٗراس اِنت
ٹِیٹُکے کرزیت پْراہ پیشانی
اے کئی سُورءِ ھِنّی ئیں تاس اِنت
پِشّیءِ گِیت زباد بوت نہ کنت
نُو کہ دُزّ اِنت دَوایے تَلکاس اِنت
بِیر شَھم اِیت سَبزَگے تْرُکّیت
اشکُتہ ما کہ دَشت کرپاس اِنت
دنت آپِشک، کنت ھوشامی
اے ھما ڈیُک ءُ ھرّگیں داس اِنت
راز ھمیش اِنت راستی بسمل!
راست چَمدِیست دْروگ اَلباس اِنت
7 جولائی 2023