رجانک ءِ ارزشت۔ نبشتہ کار: انام رزا
رجانک ءِ ارزشت
دنیا ءِ ھر زبان ءُ ھر گالوارے کہ ھست درستیں زبانانی وتی لبزانکی ساچشت ھست انت ۔ دنیا ءِ درستیں زبانانی لبزانکی ساچشت یا آیانی دودمان ءِ دود ءُ ربیدگانی پجارگ ءُ زانگ گوں ایدگہ زبانانی لبزانکی ، مزھبی ، سائنسی، شاہ زانتی ءُ ایدگہ زانت ءُ زانشتی تکاں آشنا بوگ ءِ مستریں وسیلہ رجانک انت ۔
ھر زبانے ءِ وتی جتائیں کسہ ۔ داستان یا سوت ءُ گیدی شائری بنت ءُ ھما دودماناں گوں ردوم زور انت ۔ ھمیشانی پژدر ءَ جتا جتائیں زانشت ءُ لبزانک گندگ بنت ۔ دنیا ءِ جتا جتائیں ملک ھمے رنگ ءُ زیمراں گوں وت ءَ آشنا کنائینگ لوٹ انت ۔ اشاں گوں آشنا بوگ ءِ راہ ءُ در رجانک انت ۔
رجانک وتی اندر ءَ سکیں مزنیں ارزشتے ءِ واھند انت ۔ گوئٹے ءَ رجانک ءِ ارشت ءِ بابت ءَ گوشتگ۔
”ھما درستیں کار ءُ سر ءُ پر کہ سک ارزشت دار انت آیانی تہ ءَ رجانک ھم ھوار انت “
رجانک ءِ ازم چہ کدیماں رواج گپتگ اشی ءِ ارزشت ءُ بستار ھر دور ءَ بیتگ ۔ والٹر بجمن ، رجانک ءَ را لبزانک ءِ چہ مرگ ءَ رند زندگی گوشیت ۔
ڈاکٹر جمیل جالبی رجانک ءِ ارزشت ءَ چو بیان کنت۔
” رجانک ءِ بستار ھمیش انت کہ یک نیمگے ءَ ھمیشی ءِ سوب ءَ نوکیں سسا زبان ءِ تہ ءَ ایر کپ انت ، چریشی ءَ زھنی ردوم یکشل ءَ برجاہ مانیت ۔ دومی، زبانانی درشان ءِ توان ءَ نوکیں راہ ءُ در پچ بنت ۔ بزاں ھما زبان ءَ کہ رجانک کنگ بنت ھمائی ءِ لبزانک ءَ نوکیں سسا ءُ نوکیں چھر ءُ شبین رسیت ۔ءُ آ زبان ءَ پہ نوکیں درے پچ بیت ءُ پراہ شاھگان بیت ۔ زبان گوں نوکیں تبے ءَ دیم ءَ کیت ءُ نوکیں گالواراں وتی تب ءِ تہ ءَ جاگہ دنت ۔
بلوچی زبان ءَ رجانک آ بستار دیگ نہ بیتگ کہ یک زبانے ءِ زلورت بہ بنت ۔ رجانکاری کنگ وَ بیتگ بلے سک کم اشی ءِ اندازگ ءَ مااے وڑ ءَ جت کنیں کہ بلوچی زبان ءَ نیکرائی کتاب بید ءِ قران شریپ ءَ اے دگہ نیکراھانی چوشکہ بائیبل بگوت گیتا اے دگہ ھچ وڑیں نیکراھی کتابے ءِ رجانک مارا دست نہ کپیت۔ ءُ نیکہ چہ کسہ ءَ در ، در کسھی لبزانک ءِ سر ءَ شھمیں کارے کنگ بیتگ ۔
ءَ پد ءَ مئے مستریں بد بھتی اش انت کہ مئے رسانک گیشتر اردو انت کہ اردو وت رجانک در رجانک کنان ءُ پیداک انت بزاں اردو ءِ گیشتریں رجانک چہ اسل نکاناں نہ انت بلکیں چہ انگریزی ءَ زورگ بیتگ انت ۔
باید انت مئے پارسی زانت ءُ اربی زانوگریں وانندہ اے نیمگ ءَ دلگوش گور بہ کن انت ۔
دگہ جیڑھے اش انت کہ ما اگاں آرت ءِ تہ ءَ واد ءِ کساس ءَ رجانک کتگ بلے مئے وتی لبزانک واد ءِ کساس ءَ ھم رجانک نہ بیتگ اگاں من بہ گوشاں کہ مئے لبزانک دنیگہ میاں استمانی لبزانک ءِ چماں نہ کپتگ تہ من رد نہ باں پرچا کہ ما رجانک کنگ نہ بیتگیں ۔ ما ھر وھد ءَ ھمے زنگ ءَ جنیں کہ مئے لبزانک ءَ پرچا دیمروئی ءِ پند نہ بر اتگ بلے ما اے گپ ءِ نیمگ ءَ دلگوش گور نہ کتگ کہ مئے لبزانک ءِ جند میاں استمانی لبزانک ءَ رسانک نہ انت پرچا کہ ما رجانک کنگ نہ بیتگیں ۔ رابندر ناتھ ٹیگور اگاں لچہ کاری ءِ نوبل داد ءَ گیپت تہ ھمے رجانک ءِ بدولت ءَ ۔
رجانکاری ارزانیں کارے نہ انت پرچا کہ ھر زبانے ءِ وتی زلورت ءُ ھاسیت بنت ۔ ھر زبانءِ وتی جتائیں بتل ، گالبند ءُ گالریچ بنت ھمے رنگ ءَ ھمک زبان ءِ وتی جتائیں درانگازی ءِ وڑ ءُ پیم بنت ۔ رجانک کنگءِ وھد ءَ مستریں جنجٹ ھما وھد ءَ دیم ءَ کیت کہ یک زبانےءِ بتلاں وتی زبان ءِ تہ ءَ آرگ ءِ زرورت بہ بیت ۔ اے رجانکار ءِ کمال ءَ کار داریت کہ آ چینچو شیواری ءَ گوں بتل ءُ گالبنداں ترینیت ۔ ھمے واستا ھما رجانکار ءِ رجانک گیشتر وانگ بنت کہ آئی ءِ زبان زگر بہ بیت آئی ءَ وتی زبان ءِ بتل ءُ گالریچانی سر ءَ دزرس بہ بیت تانکہ وانوک ءَ را سما مہ کپیت کہ اے دگہ زبانے ءِ گال ءُ گالبندانی تچک ءَ رجانک انت ۔
جمیل مھراب ءَ کہ اسماعیل کاردارے ءِ گدار کہ چہ انگریزی ءَاردو ءَ رجانک کنگ ءُ نز آرگ(تلخیص) بیتگ بلوچی ءَ رجانک کتگ ۔ یکے وَ ایش کہ اے گدار رجانک در رجانک پیداک انت ءُ پد ءَ رجانکار ءَ نزـ (تلخیص) آورتگ ۔ آ شیرکنی کہ سرجمیں گدارے ءِماں وتی جند ءِ زبان ءَ وانگ ءَ بہ بیت آ پش نہ کپتگ ۔ بلے پد ءَ ھم جمیل مھراب ءِ جپا کشی ءُ منت بے مز نہ انت ۔ ھمے گنج انت کہ جمیل ءَ رجانکاریءِ زرورت سما کتگ ءُ اے نیمگ ءَ دلگوش گور کتگ ۔ءُ چوناھا اسل نکان ءِ رسانک سک مشکل انت پرچا کہ مئے دزرس گیشتر اردو ءُ یا گیش ءَ چہ گیش انگریزی زبان ءَ انت ءُ ادءَ اے گپ ھم یات کنگی انت کہ انگریزی ءِ نکان ھم اسل نہ انت بلکیں رجانک انت بلے مئے زھنانی تہ ءَ ھمے پگر ءَ جاگہ کتگ کہ انگریزی اسل نکان انت ءُ اردو ءِ تہ ءَ کہ کاینت تہ رجانک در رجانک بنت بلے چوش ھم نہ انت پرچا کہ اسل نکان ، چہ روسی ، جرمن، پرانسیسی یا اے دگہ زباناں چہ پیداک انت ۔ ما اگاں ٹالسٹائی ءَ وانیں یا دوستو فسکی ءُ کامیو ءَ اے ھم رجانک انت ۔ گپ ءِ مکسد اش انت کہ رجانک در جانک ھراب نہ انت بلے بنکی چیز کہ آ تئی رجانک ءَ وش ءُ واناک کنت آ تئی زبان ءِ زگری ءُ شرکنی انت ءُ تئی بتل ءُ گالریچانی زانگ ءُ پجارگ انت زبانانی نازرکی ءُ زیبائی ءُ گالانی گچین ءُ نچین انت ۔
اسماعیل کاردارے البانیہ ءِ نبشتہ کارے ۔ آئی ءِ یک گدارے من پیسر ءَ ونتگ ۔ آئی ءِ گدار تہ ءَ من وتی چاگرد دیستگ۔
اے گدار یک انچیں زوراکیں ریاستے ءِ کسہ انت کہ اود ءِ ھاکم پہ وتی زیردستاں چمانی کور کنگ ءِ سزا ءَ بندیت ۔ھما مردم کہ آیانی چم گر انت آیانی چمانی کور کنگ ءِ جتا جتائیں وڑ ءُ پیم ءِ سزا ایر کنگ بنت ۔
اے کسہ زورآور ءُ زیردست ءِ میان ءِ سیادی ءَ پدر کنت ۔ یک انچیں ریاستے کہ اود ءَ لس مھلوک ءِ چمانی کور کنگ یک لس گپے ءُ اے سزا ءَ را یک کسانیں سزاھے پھم انت ۔
چوناھا چمانی گرگ ءِ شرک ءُ پال مئے چاگرد ءَ ھم ھست انت ۔ مئے چاگرد ءَ ھم نزر ءِ سر ءَ ستک کن انت ۔ ھمے واستا نزر بُر ھست انت ءُ ھما مردم کہ آیانی چم گر انت ھما نزر بُر ھم کن انت ءُ لِبز جن انت ءُ نزر ءِ گپتگیں مردم ءَ دراہ جان کن انت ۔بلے مئے کر ءَ پہ نزروئیں مردم ءَ چمانی کور کنگ ءُ گمان نیست ۔ البت باز مردم نزروئیں مردمانی دیم ءَ کپگ ءَ پھریز کن انت ۔
اے گدار ءِ تہ مھر ءُ سکس ءِ ھم یک شوکیں کسھے ھوار انت ۔ کارست میری سرپد انت کہ آئی ءِ دشتارءِ چم کور کنگ بنت بلے انگت آئی ءِ مھر پہ وتی دشتارءَ برجاہ مان انت ۔ اے گدار ءِ تہ ءَ گلامانہ زھنانی درانگازی شریں وڑے ءَ کنگ بیتگ ۔ زھنی گلامی مردم ءَ انچو لاچار کنت کہ آ وتی جند ءِ سر ءَ بوتگیں زوراکی ءَ را ھم ھک ءُ برابری یے گمان کنت انچو کہ اے گدار ءِ چاگرد انت ۔ مردم وتی چمانی کشارینگ ءِ سزا ءَ وت گچین کن انت ۔ آ اے پرمان ءَ را ریاستی پرمانے ءِ ھساب ءَ پہ ھک ءُ انساپ پہ وت گچین کن انت ۔ زھنی گلامی ھمے وڑ ءَ مردمانی ھاٹیگاں پچ گیپت ۔
جمیل ءِ رجانک واناک انت بلے آئی ءَ کمے انگت زبان ءُ سر ءَ منت کنگی انت ۔ زبان ھمینچو گیشتر زگر بیت تہ وانوک ءَ وانگ ءَ گیشتر لزت رسیت ۔ امیت کنیں کہ جمیل وتی اے سپر ءَ برجاہ داریت ءُ دیم تر ءَ چد ءُ شرتریں رجانک وتی زبان ءَ دنت ۔
انام رزا