رملچہ: اکس ءِ زیبائی، اصغر زہیر
رملچہ: اکس ءِ زیبائی
اصغر زہیر
اکس ءِ زیبائی
اے اکس کہ منی کوٹی ءِ دیوال ءَ ٹنگ اتہ
اے اکس ءِ واھند
زیبداریں مردمے بوتہ
وتی زند ءَ
چو آ دگہ مردماں
نزوری ءُ شری ءِ
دوئیں تَکاں
نزور ءُ شر بوتہ
برانز گپتہ
زھر ءَ کپتہ
برے برے جیڑھانی
شول کشیں تانجواں ماں پیڑ اتہ
برے زند ءِ سپر ایرجیگ
برے جھد ءِ راہ ءَ بے اوست
دلپروش
برے چو البرز ءِ مھکمیں ھسار ءَ
برز چو ماتکوھی چُدگاں
اے گوں ھر وڑیں ساڑاھاں
زند ءِ بیل ءُ آلاڑاں
انسانے بوتہ
درد وارے بوتہ
راجی بزگی ءَ ارس ءُ ھون ئےِ پالاتہ
اے اکس ءَ تھنائی ءَ گریتہ
اے اکس کہ منی کوٹی ءِ دیوال ءَ ٹنگ اتہ
زیبداریں مردمے بوتہ
زند ءِ سرد ءُ گرماں
ملامی بوتہ
زندگ بوتہ
گِلہ ءِ گرنچ ءَ پیڑاتہ
آزار ءَ شول اِتہ
اے اکس ءِ دوئیں چماں امروز ءِ ندارہ سازی دیستہ
اے اکس ءِ چماں کنٹگ مان بوتہ
اے اکس ءِ چماں پُل رودینتہ
اے اکس ءِ چماں دنیا
چو دمکے ءَ وتی اندر ءَ گُبارتہ
اے اکس کہ منی کوٹی ءِ دیوال ءَ ٹنگ اتہ
زیبداریں مردمے بوتہ