رملچہ ۔۔۔دورسریں کور۔۔۔۔۔
رملچہ ۔۔۔دورسریں کور۔۔۔۔۔
شائر: ریاز رزا
شائر: ریاز رزا
تو من ءَ دورسریں کورے ءِ جنگل پادا دات
ءُ گُشت ،
اے درچکانی ساھگ ءَ یک وھدے
من سپر ءَ بوتگاں ءُ منی پدانی کسہ ھست انت
چراگانی اکس رنگیں روشنائی
بالوانی سچگ ءِ وشبو اے کدھانی تہ ءَ
چو جمبر ءَ انگہ بُرز اَنت
بلئے۔۔۔۔۔
نوں لوگ اد ءَ نیست
بس سیاہ پوشیں کسہ انت
ءُ اکس انت
اے کور کہ ترا پاد ءَ انت
ھُورے ءِ شپ ءَ اد ءَ ھار ءَ مل ات
ابید ئے من ءَ کوکوے اوں پش نہ کپت
نوں مُرگ دگہ دیمے رپتگ انت ءُ مرچاں وتی چماں
بس پہ چینک ءَ روان دینت
اے گرنچاں گندئے ،مُرگانی شیزارگ ءَ پُر اَنت
وھدیکہ چم اش چینک ءِ چنگ ءَ کاینت
وھدیکہ من زھیروار باں
گڑا ،
کمو شیزارگ پما مُرگاں گون کناں
وتی کور ءِ لمب ءَ درچکے ءِ ساھگ ءَ ننداں
ریک ءِ سرا روان داتگیں مُرگانی شیزارگاں نبشتہ کناں