رملچہ ۔ اصغر زہیر۔ گردُوم
رملچہ
اصغرزہیر
گردُوم
اھدےءِ دیوالءِ دیمءِ
آدینکءَ کہ چاراں
منءَ بیم کئیت وتی کَلونٹانی سرءَ
ھُشکءُ ویرانیں دیمے
ھڈءُ کانپولاں پشت کپتگیں
چو دوا جتیں لاشےءَ سھتءُ سُھراں پوشتگیں
گردوم دنت گھڑیال وھدءِ منءَ
گوستءَ سپر کناں واتر
دل ایرنندیت
مَرگءِ ھیال گور جنت چمانی نوانءَ منی
چمانی چیرءِ کونسانی سیہ ناکیں نشان
گُلّ کنڈءَ کپتگ انت
آدینک منی اسپیتیں چوٹواں سیہ کت نہ کنت
آدینک منی کردگاراں پیش داریتءُ کندیت
منی دل ایر نندیت
مرگءِ ھیال ءَکپاں
چو وتی پیرکءِ ڈگارءَ ھار ملّ ایں
ڈل انت کہ ڈنّءَ انت
بے واھندی انت
ھوکینءَ کئے بہ داریت
بیرءُ باری
منی دیم چو مولدیں ماتیءَ
کہ سانکلاں گوں بستگءُ ھڈّئےِ ڈنءَ انت
منی دیم ءُ پیشانی
ننگار داتگ انت دھکان چاشیءَ
منی دیم چو ھدا گندیں ڈگار ءَ
کہ داں ھورے نہ گواریت
سبزانک نہ بیت
آدینک منءَ ھمک ساھتءَ مرگءِ گمان ءَ دنت
آدینک منءَ ھونءِ نشانءَ دنت
آدینک منءَ ھمک دمانءَ
گوستءِ چِیّل ءَ بارتءُ چگل دنت
ھمودا کہ ھمک ندارگءَ
بے موسمی پرّام گون انت