رنگانی توار اِنت هامین۔ شائر: جمیل دیدار
رنگانی توار اِنت هامین
شائر: جمیل دیدار
شائر: جمیل دیدار
___________
اَنچو کہ تئی مِسکانی
وشبو رتکگ اَنت ماں آپ ءَ
سر شود ءُ سُبکّیں هوراں
مہناز ءِ حیا انجیر اِنت
هارے داں نہ ملّیت کؤراں
کیّا ءِ سفر سنجین اِنت
رنگانی توار هامین اِنت
*
واباں مُلمُکے مِیچین اِیت
نُکّ ءَ شیرگ ءُ بینَگ جنت
چنڈینیت زبادیں شاگ ءَ
شاگے حمّل ءِ بو ءَ کنت
دریا ءِ رواجاں وانیت
“مرکب واهگانی زین اِنت”
رنگانی توار هامین اِنت
*
ارساں هانی ءِ میسّینتگ
“بے بَہتیں مُرید ءِ دنیا”
عشق ءَ اپسے ءِ نالاں جنت
نوہتّاں مُشیت بنگی تاک
پُرّ ءُ هالی ئیں نارگ چے
اُپّار ءُ زهیر ءَ مین اِنت
رنگانی توار هامین اِنت
*
لَڈیت چہ اِدا هنکینے
لَڈیت ءُ کپوتاں کِلّیت
نازُرکیں کڑبی اوشاں
نرم ءُ نودی ئیں گورباماں
نالوکیں هَشاں واپین اِیت
میتگ رِتکگ ءُ دنزین اِنت
رنگانی توار هامین اِنت
*
اَنچو کہ تئی مسکانی
وشبو گون بنت سرگوات ءَ
گیرانی نَلے ارسین اِنت
رنگانی توار هامین اِنت
___________________