ریھوڑ Great Thick-knee (Esacus recurvirostris)
ریھوڑ Great Thick-knee (Esacus recurvirostris)
پولکار ءُ نبشتہ کار: سلمان بلوچ
ریھوڑ یک مزنیں ٹاگوایں آپی مُرگے کہ ھُمب، کور، دریا، تیاب ءُ ھورانی کَش ءُ کراں بیت۔ اے گیش شپ ءَ گردوکیں مُرگے بلے وتی دمگاں روچ ءَ ھم گندگ بیت۔
دمگ: ریھوڑ ایشیا ھاس انڈین کسان بَر ءَ مُرگ انت، آپی مُرگے کہ ھُمب کور، دریا، تیاب ءُ ھورانی کَش ءُ کراں بیت۔ ھان گان، لاوس، نیپال، وتنام، تائی لینڈ، سری لنکا، بنگال، انڈیا ءُ پاکستان ابید ایران ءُ امارات ءِ تیابی دمگاں بیت۔
کَچّ ءُ پَجّار: ریھوڑ مزنیں ٹانگو ایں مُرگے، اشی کَچۤ کساس 50 سینٹی میٹر بیت۔ اشی سُنٹ (چُمب) 7 سینٹی میٹر دراج ءُ زنڈ انت، اشی گردن ھم دراج انت۔ اے پرو رنگیں چو ھاک ءَ رنگ ءَ ھم جنت۔ اشی پاد ءُ سُنٹ دار ءِ رنگ ءَ انت۔ اشے دیم سیاہ رنگ انت ءُ چَمۤانی نیمگ ءَ یک اسپتیں کِشک ءِ روت۔ اشی چَم شُونز انت۔ اگاں بال کنت گڑا اشی بازُلاں اسپیت ءُ سیاہیں کشک گنگ کئیت ءُ بانزُلانی لمب سیاہ انت۔ اشی لاپ ءُ بانزُلانی چیر اسپیت انت۔ اے تیابی مُرگ ءُ ٹی ٹیانی وڑا سِٹۤی وڑیں توار کشیت۔
رین: ریھوڑ فروری بگر داں جولائی ءَ رین کنت، انڈیا ءَ فروری ءَ بندات کنت داں جولائی ءُ پاکستان ءِ چپ چارگد ءَ اے مارچ ءَ وتی رین ءَ بندات کنت داں جون۔ اے تیابی دمگ، دریا ءِ کش ءُ کرداں پَٹ ءِ سرا ھیک دنت۔ گیشتر یک ھیکے چیر کنت۔ لہتے وہداں داں سئے ھیک ھم دنت۔ اے یکیں ساتی ءِ گوں زند کنت ءُ چُک چوری کنت۔ اے کساس 24-27 روچ ھیکاں چیر کنت۔ نر ءُ مادگ ھر دو ھیکانی سرا نند انت۔ ھیک ترکَگ ءَ پد مات پِت ھیک ءِ کول ءَ دیر کن انت کہ شکاریانی چمۤاں چوریک مئیت۔ اے چوریک دو/ سئے سال ءَ جوان بیت۔
وراک: ریھوڑ گیش زِری یا کہ آپی لیلُک وارت، یا کہ ھما ساہدار کہ آئی ءَ سرین ءِ ھڈ نیست چو کہ گِج، مدگ (جینگا)، گُرۤ، کیکٹا ءُ اے دگہ تیاب دپی ساہدار، ابید چہ تیاب دپی ساہدار اے کِٹَگ، بالی مدگ، موکو ءُ دگا لیلُک، لہتے ریھوڑ توم ءُ سبزگ ھم وارت۔
نسلی جاور: ریھوڑ ءِ نسل ءَ میان استمانی ھلاسی تُرس پِر انت، آئی۔یو۔سی۔این (دنیا ءَ ساہدارانی رکۤینگ ءَ کار کنوک گَلۤ) ءِ رِد ءَ ریھوڑ ءِ نسل ھلاسی ءِ ترس ءَ سر انت۔ ھمے وڑا مئے دمگاں ھم باز کم بیتگ۔