. زبانانی زندان- چارمی بھر
مجاہد بلوچ
سیمی روچ ءَ بازیں مراگش جتا جتائیں جاہاں بوھگ ءَ ات انت۔من اے مراگشاں چہ یک ءُ دو ءَ بہر زرت،من جہد کرت ہما مراگشاں بہر بزور آں کہ آہانی تہا بلوچ ءُ بلوچستان ءُ لبزانک ءِ بابت ءَ گپ بوھگ ءَ انت۔
اے سہب ءِ جْوانیں مراگشاں تہا”فکشن کی نئی آواز”بہر ءِ مراگش ءَ بہر زورت،ایشی تہا براہوی زبان ءِ جْوانیں ندکار حسن ناصرءِ براہوی زبان ءَ رجانک کرتگیں کتاب”زندان نا سنگت”،سندھی زبان ءَ مجیب روٹھوءِ گدار”غیر موزوں موسم جو کہانیاں”سرائیکی زبان ءِ ندکار بانک مہرین ءِ کتاب”چھاتی،ہریانوی زبان ءَ عمر ھیاتءِ گدار”مراڑ”ہور ات انت۔اے مراگش ءِ جار چین بانک صفیہ کوثر ات۔
اے مراگش ءَ بلوچستانءِ جاورانی بابت ءَ گپ ءُ تران بوت۔سنگت ھسن ناسر ءِ کتاب “زندان نا سنگت”ھمے وڈیں بنگپے ءِ سرا رجانک کرتگیں کتابے ات،کہ اے کتاب ءِ بنگپ گوں بلوچستان ءِ مروچگیں جاوراں سْیادی دار ایت۔
اے روچ ءِ مراگش ءَ نامداریں تاکار بانک عاصمہ شیرازی،عبدالرھیم ظفرءُ دگہ بازاں بہر زورتگ ات۔
ہمے روچ ءَ دگہ مراگشے لبز بلدانی سرا ات کہ ڈاکٹر ضیا بلوچ ءَ بلوچی لبز بلدانی سرا گپ جتگ ات۔من وت اے مراگش ءَ ساڈی نہ ات انت۔
بلوچستان ءِ ندکاراں چہ بلوچستان ءِ جاورانی بابت ءَ وڈ وڈیں جست کنگ بوت۔عطاشاد ءِ ذکر اے مراگشانی تہا بوھگ ءَ ات ،آئی شئر وانگ بوھگ ءَ ات انت۔
اے مراگشانی تہا گوں آزاتی ءَ ہر کس ءَ گپ جت،بلئے ترس ءَ مئے اندار ءَ سنگر بستگ ات،پدا ہم جہد کرت وتی ڈیھ ءِ جاور ءُ لبزانکی جاورانی سرا گپ بجن ایں۔
سیمی روچ ءَ بیگاہ ءِ مراگش کہ آئی بنگپ”پاکستان کی مادری زبانوں کے جدید ادب میں نوجواں ادیبوں کی شمولیت”ءِ بنگپ ءِ سرا ات،ایشی تہا بلوچی زبان ءِ جہگیری بانک رحشندہ تاج ءَ کرت۔دگہ زبابانی چوشکہ گوجری ءِ صفی ربانی،پشتو ءِ سارہ خان،پنجابی ءِ علی عثمان باجوہ،سندھی احمد شاکر،بروسکی ءِ ذولفقار برچہ ءَ ہور ار انت۔
بانک رحشندہ تاج ءَ بلوچی زبان ءَ زالبول آزمانکارءُ وتی آزمکانکانی سرا گپ جت۔آئی ءِ گشگ ءَ ات”ھمے رنگ ءَ چاکری عہد ءَ بلوچان جنگی ءُ عشقی لچہ پربستگ ھمے رنگ ءَ مروچگیں آزمانکار دوئیں بنگپاں نبشتہ کنگ ءَ انت۔”
اے مراگش ءَ کلاں گیش سندھی زبان ءِ ورنائیں ندکار احمد شاکر ءَ گپ جت،آئی گدارے ‘مسخ شدہ لاش ‘ءِ بنگپ ءَ اردو زبان ءَ رجانک بوتگءُ اے گدار ساری ءَ من وانتگ ات۔اے ورنا ءِ گشگ ات”من ءَ باز ترسینگ بوتگ بیہار دئیگ بوتگ،منی لوگ ءَ باز رند ءَ واجکار پہ پٹ ءُ پول ءَ آتکگ انت،من ءَ کس سندھ ءَ لبزانکی مراگشاں نہ لوٹ ایت پرچکہ من وتی وتن ءُ آئی ءِ سرا نندوکانی آجوائی ءِ گپ ءَ جن آں۔”آئی وتی گپانی تہا بازیں ادرگانی نام گیپتءُ پہ وتی وتن ءَ ندر بوھگ ءِ واھگ درشان کرت۔کلاں آئی گپ گوش داشت انت،کس ءَ آئرا چہ گپ کنگ ءَ مکن نہ کرت۔اے مراگش ءُ گپاں پد باریں آئی ھال چی بیت؟؟؟؟مراگش ءِ تہا ورنا ءَ گشت من ءَ کلاں چہ گیش بلوچ ندکاراں اثر مَنْد کرتگ،بلوچاں وتی ڈیھ ءِ درد جْوانیں رنگے ءَ نبشتہ کرتگ انت،آئی ءِ گشگ ات اے ندکارانی گپ اولس ءَ چہ کلاں گیش متاثر کن انت۔
مراگش ءَ پد ورنا مئے کرا آتک دروتءُ درھبات کرت۔من گشت شما ادا ھق ءِ گپ ءَ جنگ ءَ ات بلئے سندھ ءَ شما بلوچاں لاچار کنگ ءَ ات کہ وتی ماتی زبان بلوچی ءِ جاہ ءَ مردم شماری ءَ وتی ماتی زبان ءَ سندھی نبشتہ بکن ات،اے ہم زوراکی ے ءِ ۔۔۔
روان انت