زوالیں چاگرد ءَ دزبگر اِت
چندن ساچ
سوشل میڈیا ءَ بازیں حالے شنگ بیت۔ لہتیں حال دروگ انت ءُ لہتیں راست انت۔ بلے باز وہد ءَ مردم نہ زانت کہ کجام حال راست انت ءُ کجام دروگ۔
دروگاں بِل۔۔۔ لہتیں حال انچین انت کہ دروگ نہ انت، آ راست انت، بلے انگہ باور نہ بیت کہ چش چوں بیت۔ لہتیں روچ پیسر یک حالے شنگ ات کہ چار سال ءِ گونڈوے “ریپ” کنگ ءُ کُشگ بوتگ۔ اے حال راستے ات۔ بلے من ہمائیں حیراناں کہ چار سال ءِ گونڈو ءَ گوں ریپ!!
چار سال ءِ گونڈوے ءَ گوں اے کار ءِ کنگ ءَ مردے ءِ دل چوں کشّیت؟ آئی ءِ دل ءَ اے واہگ چوں پاد اتکگ؟
روڈانی سرا یا لوگانی تہا جنینے ریپ کنگ بیت، مردم ءَ باور بیت کہ ہو رستریں مرد چوشیں کار کن انت۔ بلے نئیکہ چار سالی گونڈوے ءَ گوں ریپ۔۔۔۔ عجبیں چاگردے۔۔۔
من دیری رندے حالے اش کتگ ات کہ سعودی عرب ءَ پاکستانی یے ءَ یک مُردگے چہ کبر ءَ کش اتگ ءُ وتی کوٹی ءَ برتگ ءُ گوں مردگ ءَ بدکاری کتگ۔ من حیران بوتاں کہ ما میتے بہ گندیں مئے جان ءِ پُٹ پاد کایاں۔ اے چونیں مرد انت کہ میت ءَ زور انت ءُ کوٹی ءَ برنت ءُ آئی ءِ جان ءَ گوں گرمیں آپ ءَ شود انت ءُ پدا ہمے میت ءَ گوں بدکاری کن انت۔
نوں سوشل میڈیا ءِ دؤر انت۔ سدانی حساب ءَ چشیں حال مئے دیما کیت۔ نوں اے حال مارا اجکہ ہم نہ کن انت۔ پرچا کہ ما چشیں حالانی اشکنگ نوں عادت کتگ۔
یک زمانگے ہما ات کہ مئے دمگاں مردمے مرت گڑا ما دراہ پُرسی بوتگ اتیں۔ پرچا کہ مرگ پہ ما بلاہیں گپے ات۔ پدا دگہ زمانگے اتک کہ ما ہر روچ مردمے ءِ جون دیست، پدا ما مرگ ءُ بیرانی ءِ حالاں چہ ہم عادت کت۔
نوں پہ ما پریشانی ہچ نیست۔ مرگ ءِ حالے بہ بیت، یا گونڈو ءُ جنین آدمانی ریپ ءِ حال، یا کہ مردگے ءَ چہ کبر ءَ در کنگ ءُ گوں آئی ءَ بدکاری ءِ حال۔۔۔۔۔۔۔۔ اے حال نوں مارا حیران نہ کن انت۔۔۔۔ پرچا کہ ما زاناں اے چاگرد ءَ ہرچی بوت کنت۔۔۔۔
کسے جنیں آدماں سوج دنت کہ مردیں آدم اگاں شمئے ریپ کنگ ءَ کاینت گڑا آیانی نازرکیں جاہاں لگتے، روپگے یا چمپلے بجن ات۔ مرد شمارا ریپ نہ کنت۔۔۔۔ اے وڑ چوں بوت کنت۔ پہ مشت ءُ لگت یا پہ روپگ ءَ اے رستریں مرد چوں دارگ بنت۔۔۔۔ ہاں جنین یک کارے بکن انت گڑا بگندئے وڑے بہ بیت۔ آ کار ایش انت کہ جنین قانونے پاس بکنائین انت ءُ آ قانون ءِ تہا اے لوٹ کنگ بہ بیت کہ مارا پستول بندگ ءِ رضا دئیگ بہ بیت۔ دانکہ پہ بد نیتی ءَ کسے مئے نیمگا کیت گڑا ما آئی ءَ بگوازینیں۔۔۔۔۔ بلے اے وڑ ہم نہ بیت۔
شرتر ایش انت کہ مردم سیکس ایجوکیشن دئیگ بہ بنت ءُ اے بابت ءَ سرپدی پروگرام ءُ سیمِنار برجم دارگ بہ بنت۔ گونڈو سر ءُ سوج کنگ بہ بنت۔ مردیں آدم ءُ جنین آدم ہم سوج دئیگ بہ بنت۔ اے گہتریءِ نیمگا گامگیجے بوت کنت۔
مئے کارگس ءَ چوکیدارے کار ءَ ات۔ من دیست لہتیں روچ انت کہ مرد پریشان انت۔۔۔ من دل ءَ ہمے گشت کہ بلکیں لوگی جیڑہے بیت۔ دومی روچ ءَ من دیست کہ منی ہمکارے آئی ءَ سوج دئیگ ءَ انت۔ من جست کت کہ گپے۔ من ءَ گشت ئِے کہ ایشی ءَ چار ماہ انت لوگ ءَ وتی جن ءِ کِرّا نہ شتگ۔ نوں بے وار انت۔۔ من ایشی ءَ یک چیزے سوج دئیگ ءَ یاں کہ تو چو بکن، آرام بَئے۔ ایشی ءَ ہچ سرپدی نیست۔۔۔۔ من مروچی سوج داتگ۔۔۔۔ پدا ہفتگے ءَ پد ما ہمے چوکیدار دیست سک گل ات۔ گشت ئِے نوں من پہ وہد واب کپاں۔۔۔ پرچا کہ من ایشی ءِ سوج زرتگ۔۔۔۔ نوں من آراماں۔۔۔
اے وڑیں مردم ذھنی نادراہ ہم بنت۔ ایشان ءَ سر ءُ سوج کنگی انت۔ اے سرپدی دئیگی انت۔۔۔ بگندئے مئے سرپدی دئیگ ءَ چہ یک گونڈوے ءِ روچ کمو گیشتر بہ بنت ءُ آ چہ ریپ کنگ ءَ بہ رکھیت۔ نفسیات دان نادراہانی کاؤنسلنگ کن انت۔ آیاں سوج دئینت، آیاں دز گرنت۔۔۔ آیاں گوں نفرت نہ کن انت۔ نفسیات دان گشنت کہ مجرم ءَ گوں نفرت مکن، جرم ءَ گوں نفرت بکن۔۔۔۔
بچار دگہ امیت وَ نیست۔۔۔ لہتیں مردم کہ چہ ہمایاں امیت دارگ ءَ انت کہ آ پہ اے وڑیں کارانی گر ءُ دار ءَ سُر ءُ پُرے کن انت۔ اے نہ بوتگیں گپے۔۔۔۔ پرچا کہ آیانی تہا بازینے ءِ جند ہمے سرپ ءِ رسترانی کش ءَ اوشتاتگ۔