زیبَلیں پُلّک! نمدی نویس: مومن مستاگ
ھمے ھساب ءَ منی درد گیش باں کازی
اگاں جناں من سد ءَ گوں سد ءَ ھزار برا
زیبَلیں پُلّک!
ھر کجا ئے شاداں بات ئے۔
لھتیں روچ پیسر من پہ تو چار دانک نبیس اِت ءُ گوات ءِ دپ ءَ دات۔ مرچی من ماں پگرے ءَ کپتگ آں کہ منی چاریں دانک پہ تو سر بوت انت یا نہ؟ دل گوش ایت سر کہ بوتگ انت۔۔۔۔۔ بلئے، مجگ گوش ایت کہ نہ، آ نمدی ءِ تھا تئی نام نبشتہ نہ اَت۔ گوں تو بستگیں یک واکیہ یے نبشتہ اَت انچیں واکیہ یے کہ ایوک ءَ من مار اتگ ءُ دل ءَ دوتکگ۔ تو مار اتگ یا نہ من ءَ اے بابت ءَ ناسرپد آں۔ ھیالے مجگ ءِ تھا ترّگ ءَ ات کہ اے نمدی ءِ تھا تئی نام ءَ نبشتہ بہ کناں بلئے تو وت اے چاگرد ءَ شرّ سرپد ئے۔
پہ ھما مردماں کہ ترا آھانی نام ءِ نبشتہ کنگ ءَ آسراتی مہ بیت، پچیں نمدی یے دیم دیئگ تکانسر کنت۔
یازدہ سال تو من ءَ ھمک روچ ءُ شپ یک وڑ گیر آتکگ ئے بلئے دو روچ انت تئی یات ءُ ترانگ گیش بوھان انت ءُ شہ دل ءِ دیوال ءَ سرلیٹ کنان انت۔ زان ئے اے دوئیں روچاں دل تئی ترانگاں چیا گیش ءَ چہ گیش بُڈّ گران انت؟
من مروچاں گوئٹے (ورنائیں ورتھر ءِ گمانی داستان) ءَ وانگ ءَ آں۔ اے مرد چونیں وشیں دابے نبشتہ کنت۔ مردمانی مارشت ءُ جزبگاں شرّ سرپد بوتگ ءُ آھانی مارشتان ءَ لبزانی شگل ئِے داتگ۔ ھما مارشت کہ مرتگ انت اے مرد ھما مارشتاں ھم زندگ کنگ ءِ بود دار ایت۔
یک جاھے نبشتہ کنت:
“مروچی من شارلوٹے نہ دیست۔ سوب ایش ات کہ من گوں وتی لھتیں سنگتاں دزگٹ اِت آں۔ البت من وتی نوکر شارلوٹے ءِ نیمگ ءَ دیم دات کہ من ھما مردم ءَ وَ بہ گنداں کہ شارلوٹے ئِے دیستگ”
من تئی نیمگ ءَ کے ءَ دیم بہ دیاں؟ منی وس ھمے چاریں دانک انت ایش اوں سرگردان ءَ ترّگ ءَ انت کہ شہ تئی چمانی دیم ءَ بہ گوز انت۔
پُلّک! روچ وَ گوز انت ھمک وڑا، پہ وشی گوں دوست ءُ ھمبلاں، پہ گم ءُ گڑتی گوں وش نیاتک ءُ دژمناں۔
شپ۔۔۔ شپ ءِ سوج ءَ مہ کن۔۔۔۔ ایوکی انت من آں ءُ گنْگیں کتاب انت۔ کتاب منی جوانیں سنگت انت ءُ من ءَ تئی وڑا دوست انت، چیزّے کہ تئی وڑا دوست بہ بیت اے بلاھیں گپے۔ بلئے تانکہ من وتی دلگوش ءُ چماں گوں اشاں گلائیش مہ کناں اے گنْگ انت۔ برے برے مردم بے وار، ژند ءُ ژولّ کہ بیت ءُ ھچ وڑیں مشکولی یے ءَ دل گوں مہ بیت، گڑا انچیں زانے ءِ تلبگار بیت کہ وتی سر ءَ ایر بہ کنت۔ چشیں ساھتاں تو من ءَ بے کساس گیر کا ئے۔ وائے نا دزرسی کہ من ابید شہ امیت ءِ دارگ ءَ دگہ ھچ کت نہ کناں۔ امیت نا دزرسی ءِ دومی نام انت ءُ من پہ امیت زندگ آں۔
مومن مستاگ
ماشکیل 6/12/2022