سوجے پہ رحمان واڈیلہ ءَ۔بدلخان واڈیلہ
سوجے پہ رحمان واڈیلہ ءَ
پہ زانت ءُ زانگ ءَ برو اسکولءَ
دل ءَ دے وانگ ءَ برواسکولءَ
اے دنیا تہلگے گُردر ءَ تہل انت
شکر درشانگ ءَ برو اسکولءَ
بکن رژنا وتی بانداتی روچاں
گوں سینہ تانگ ءَ برو اسکولءَ
اے کرزی شہتکّاں نزارءُ واپین
وتءَ کن کانگ ءَ برو اسکولءَ
یلو کن پاچناں میشءُ بشوراں
مکپ گوں شوانگءَ برو اسکولءَ
چراگءِ دروشمءَ روژناھی ءَ بو
بہ زَر پروانگ ءَ برو اسکولءَ
گَلءُ گرانی ادب داری برو بیا
منی چُک وانگءَ برو اسکولءَ
بدل خانءِ بزیر سوجانءُ پنتاں
بچار پد مانگ ءَ برو اسکول ءَ
بدلخان واڈیلہ