سوکڑ ۔ ماھیگ۔ نبشتہ کار: راشد کریمی
سرگوست: سوکڑ
نبشتہ کار: راشد کریمی
نبشتہ کار: راشد کریمی
پانوان ءِ ھُور ءِ دپ ءَ بگر دانکہ گْوتر ءِ تیاب ءَ اے دراجے ءَ تیاب دپ پہ سوکڑ ءِ نام ءَ مشھور اِنت گرماگ ءِ موسم ءَ ادا چول سک مزن بنت انچو مزن کہ ھر یک چولے پنچ مِتر (میٹر) بیت کم ءُ گیش
میدانی ھساب ءَ وھدے کہ تیر استار بُڈیت تہ دریا سک مست بیت ءُ دریا ءِ چولانی زور سک باز بیت آپ ءَ رشت مان بیت
اے تیاب دپ ءَ کہ تو پانوان ءِ ھُور دپ ءَ چہ کمو دیم ءَ کائے لھتے کاپَر است اشاں گُش اَنت چم کُش کاپَر اے کاپَراں چہ تو گْوزے دیم ءَ کائے کئیت دشت ءِ ھُور کہ مرچی باندا کُنٹانی نام ءَ سک مشھور اِنت اے ھُور ءَ چہ انگت کہ دیم ءَ کائے دگے لھتے کاپَر کئیت اشاں گُش اَنت دشت کاپَر کہ دشت ھُور ءِ کِبلہ ئے نیم ءَ اَنت دشت کاپَراں چہ کمو دیمتر کئیت بُرجُک کہ اے ایران ءِ ءُ پاکستان ءِ سیمسر اِنت انی و سیم بستگ برابرا دوھیں مُلکاں وتی ھَدّ گیشینتگ پیسرا تھنا ایران ءِ پرچم ئے ھمدا مِکّ بیتگ دوھیں نیمگ ءَ چونہ ءَ بلوچستان اِنت بلے ۔۔۔۔۔۔
بُرجُک ءَ کہ کمو دیم گْوزے تہ کئیت یکّیں کاپَر اے جاگہ شمالی بلوچستان ءِ بھر ءَ اِنت ءُ چہ یکیں کاپر ءَ گْوزے دیم ءَ کئیت باھُور متلب کہ باھو ءِ ھُور چدو دیم کہ کائے دگے لھتے کاپَر است ھمے تیاب دپ ءَ اے کاپراں گُش اَنت مُراد کاپَر ءُ اشی ءَ دیم کُلّانی کَور باز مردم گُشیت نوکیں ھُور ادا چہ دیم گْوتر
ھر ھُور ءِ دپ ءَ ڈنّی اَنت ڈَنّی ھما جا ءَ گُش اَنت کہ ھودا آپ ءِ جُھلی کم اِنت( تنَاپ ) تنَک آپ گُشگ بیت کہ اشانی سرے چول انگت مستر بنت ءُ زور مند بنت
اے تیاب دراجی ءَ کہ ھر جاگہ کاپَر است گرماگ ءَ ادا پہ کِر ایں ماھیگ ءِ شکار ءَ ھما مردم کایاں ماھور آپ ءَ کن اَنت ءُ ھپتگ سرا یا کہ دہ روچ سرا اے رواں وتی میتگ ءَ پدا کایاں ورگ کاراں کِر ءِ سیزن ءَ یک ءُ دو ما ءَ ھمدا داراں اے کاپَر ھمیشانی لوگ اَنت
اے مردم بردیگ ءُ کلمتی اَنت
ھمے موسم ءَ ما ھم گوں یگداراں کاھیں ھمدا کِر کُشگ ءَ ھمے مزنیں چولانی تھا
2009 ءِ جون ءِ ماہ رمس منا یاد نہ بیت بلے اے شپ انگت ءَ منا یادیں کہ ما اتکیں شپ ءِ یازدہ ءُ دوازدہ بج بیتگ اَت چاریں دانکہ ماھیگ توار کنگ اِنت گْورم ھم سک مزن اَنت بلے چُش کہ ما ھر سال کاھیں وتی سیزن ءَ ھمے چولانی تھا ماھیگ گِریں مارا انچو تُرس نیست کہ تُرسگی اِنت
وھدے کہ ما ماھیگ توار اِش کُت گوانکو منی کستریں برات باسد اَت کہ اُمر اے وھدی شانزدہ سال اَت یگدارے کَنڈ ءَ ماھیگ توار ءَ اِشکُنگ اَت ماھیگ ما پاس اِت اَنت ءُ باسد ءَ گُشت اَبا ماھیگ ھمدا ھمے گْورمانی تھا آواز اِنت ما ماھور سر یلدات ءُ دیم پہ ھمے گْورمانی توک رھادگ بیتیں من کنّال چنڈگاں اسلم نامیں بچکے ءُ اکتر سِندی منا کنّال دست ءَ دئیگ اَنت منی ناکو منزور پیلُم ءَ ریچگ اِنت کماش گوں سُکّان ءَ گُلائیش ءُ باسد جَھل ءَ یگدار ءِ کنڈ ءَ چہ کنّالاں دئیگ اِنت اندازہ سئے یا چار کندو ماھور کہ شُت آپ ءَ ما ماتی گْورم ءِ تھا سر بیتیں
(ماتی گْورم ھما اولی گْورم ءَ گُش اَنت زر ءَ پُرشیت اے گْورم ءِ زور سک باز اِنت )
ماھورا ریچان اِنت یگدار وتی رپتار ءَ برابر ءَ رؤگ اِنت چی واستہ کہ ادا آہستہ رؤگ ءِ جاگہ نہ اِنت برو بوجیگ چاراں داں گْورم چو سرے بان ءَ رُستگ ءُ تلمب اِنت دیم پہ یگدار ءَ کماش ءَ چہ سُکّان ءَ کوکّار کُتگ کہ بچکاں بدارے وت ءَ بلے مارا اے گُمان نیست اَت کہ مئے یگدار ءَ گْورم دیم چیر کنت
وھدے کہ گْورم ھوالہ بیت گوں یگدار ءَ من دپّان مُھر مُھر ءَ داشتگ ءُ چارگاں کہ یگدار پورا لیٹان اِنت یک وھدے چاراں ما یگدار ءِ چیرا ءُ یگدار مئے سر بُرا اِنت یگدار چَپ بیت ءُ بُڈ اِت
من وت ءَ چہ یگدار ءِ چیرا کَشت دانکہ چاراں کماش ھم آپ ءِ تھا اوژناگ اِنت ناکو منزور ھم دیم پہ تیاب ءَ روان اِنت
منی برات باسد ءُ اکتر سِندی زاھر نیاں اسلم پریات کنگیں کہ منا بگرے من مُرتاں
من کماش ءَ جُست کنگاں کہ ابّا باسد
گشیت منی ھیال ءَ باسد بے بلاھے مُرت منا پورا ساہ ءَ دیم دات دل ءَ گُشت من ھم مُرتیناں دیم پہ دیم برات شُت دل ءَ انچیں لرزگے زُرت اے وھدی پورا کیامت ءَ من ءُ کماش کُوکّار کنگ اِنت کہ باسد اکتر کسّ ءَ جواب ندات تھنا اسلم ءِ پریاتانی توار پیداک اِنت
کمّو دیرا رند چاراں داں مئے پُشتی نیمگ ءَ باسد ءَ آواز دات چاراں داں باسد اِنت مئے دل ءَ پورا بود کُتگ ءُ چمّاں چار روک آؤرت بلے اکتر انگت گاریں ما آواز دیان ءُ اے دیم ءُ آ دیم ءَ چاران بلے اکتر زاھر نہ اِنت ءُ اسلم اتکہ مئے نزّیک ءَ کماش ءَ کہ اسلم گِپت کہ سک بے وار اِنت اسلم کہ اتک کماش نزّیک ءَ گِپتی کماش گُٹ کہ اے اگاں مِراں ھم بہ مِراں بلے من بہ رکّاں چہ مِرگ ءَ چو نزانت کہ ما بہ مریں تو اوژناگ نزانے چون تیاب ءَ سر بئے کہ تیاب سک دیر اِنت کماش ءَ چارِت اسلم وت مِریت منا ھم کُشیت کماش ءَ کہ اسلم یل دات اسلم دیم پہ منا پیداک اِنت من دل ءَ جیڑگاں کہ گْورم باریں مارا کُشاں نہ کُشاں بلے اسلم ارادہ سک ھراب اِنت
من کمو وت ءَ دیر داشت ءُ اسلم سرپد کنگ ءِ جُھد کُت
کہ اسلم نی یگدار وا بُڈ اِتگ تو اوژناگ نزانے اگاں منی گُٹ ءَ گرے من ترا نہ براں گوں تیاب ءَ اگاں ناں منی گپ ءَ زیرے دانکہ من زندگاں ترا مِرَگ ءَ نئیلاں بلے منی گُٹ ءَ مہ گِر منی کوپگ ءَ بدار من تو اوژناگ کنان ءَ روئیں ھُدا بادشاھے سر بئیں تیاب ءَ اسلم سرپد بیت ءُ اتک منی کوپگ داشتی من ءُ کماش باسد گوں اسلم ءَ اوژناگ کنان دیم پہ تیاب ءَ بلے آپ ءَ آلاڈ اَت آپ مارا زِرا برگ ءَ اَت ءُ گْورم مارا ھمدا ژانبُلینگ ءَ اِت اَنت ناں ما زرا شُت بئییں ءُ نا کہ تیاب ءَ من چار اِت کہ اے وڑا ما مُشکُل اِنت کہ تیاب ءَ سر بہ بئیں باسد کمّو اوژناگ ءَ تیار تِر اَت روان اَت دیم پہ تیاب ءَ بلے مئے نزّیک ءَ گون اَت گوں کماش ھم بلے منا بے اوژناگے کوپگ ءَ اِنت نی چون کنے من وت ءَ چٹ برھنگ کُتگ کہ گُد منا اوژناگ ءَ نئیلگ ءَ اِتاں من اسلم ھم گُشت کہ گُداں لگوش کہ اے وڑ ما تیاب ءَ سر بیت نہ کنیں اسلم ءَ ھم شلوار بوتک یلدات
منا گشیت منی شلوار ءَ بلے بگر ھھھھھھ من گُشت کلام برات شلوار ءَ جند ءَ رکّین
ما روان روان تیاب ءَ دانکہ چل منٹ ءَ یا کہ چل ءُ پنچ منٹ ءَ ما واری ءُ ھزابی سر بیتیں تیاب ءَ
دانکہ منزور مارا چہ پیسر تیاب اِنت
ما کہ تیاب ءَ سر بیتیں کئے مِریت اسلم چی واستہ کہ گورماں گوں بُک وارتگی آپ توکا وارتگی سُوریں آپ نی تیاب دپ ءَ شانگ اِنت گِپتگاں اسلم ءِ پاد چنڈ اِتگ لاپ پرنتکگ دانکہ دریا ءِ آپ در اتکگاں ءُ اسلم ھوش ءَ اتکگ
شتگیں کاپراں میدان ءَ باکس ءِ پچ گِپتگ آس روک کُتگ کہ کسے بزانت مارا مسیبت ءَ گِپتگ ءُ مئے کُمک ءَ بئیت
داں وھدے چاراں یگدارے اتک تیاب ءَ مئے گور ءَ دانکہ ناھُدا گُلام نبی اِنت جمیر اِنت منا شرّی سرا یاد نہ کنت کہ من شلوار چہ یکیں کاپرا مردمانی گْورا پچ گِپت یا کہ ناھُدا گُلام نبی یگدار ءَ چہ بلے اے وھدی من وت ءَ پردَگ کُتگ اَت من سر کپتاں یگدارا شتیں گْورمانی تھا پدا اکتر چارگ ءَ کہ انگت ءَ اکتر گار اِنت شوھاز کُت بلے مارا اکتر دست نہ کَپت
شپ ءَ تیاب دپ چار اِت کہ بلکیں اکتر آپ ءَ آؤرتہ لیپگ کُتگ بلے انا اکتر زاھر نہ بیت
نی ھُدا بہ زانت کہ اکتر ءَ چیزّے لگّ اِت کنّالے یا کہ یگدار ءِ ماھورا پتات ھمودا اڑیت رند ءَ چو ما سرپد بیتیں کہ اکتر ءَ اوژناگ نزانتگ بیتگ ءُ مئے گْور ءَ گُشتگی کہ من اوژناگ زاناں پرچی واستہ کہ مئے کرّا کسے کہ کئیت مئے جُست درستاں چہ پیسر ھمیش اِنت کہ تو اوژناگ زانے یا اِناں ھمے واستہ کہ مئے گْورا یا کہ ھر یگدارے کہ سوکڑا رؤت کِر گِرگ ءَ چہ درستاں اوژناگ الّمی اِنت ھترہ باز اِنت گْورم جناں کدی تو دریا ءَ روئے ھمنچو اوژناگ بزانے کہ کمو دست ءُ پادے سُرینت بہ کنے انچو کہ اسلم اَت
مردماں ھال سر بیت کہ ناھُدا کریم بکش ءِ یگدار بُڈ اِتگ سھب ءَ مُلک ءَ چہ بازیں مردمے اتک پہ کُمک ءَ دانکہ سُھب بیت مردماں ھِمّت کُتگ یگدار راست کُت ءُ ما اتکیں مُلک ءَ بیگہ ءَ ھال اتک کہ اکتر ءِ لاش دست کپتگ
ما شُت ءُ اکتر آورت ملک ءَ دپن کُت
اے یک انچیں سرگوستے کہ کدی ھم بیھال نہ بیت زندگی چنچو کیمتی اِنت مِرَگ چنچو گران اِنت اے دوئیں چیزّانی نیام ءَ اے شپ ءَ ما گوستگیں