سید ءِ شوھازگ ءِ واب۔ چندن ساچ
سید ءِ شوھازگ ءِ واب
چندن ساچ
زندگیں راجانی یک نشانی یے کہ آ وتی نمیرانیں سراں یات کن اَنت، آیاں شرپ بکش اَنت ءُ آیانی کرتگیں کاراں وتی راجی مڈی سرپد بنت۔ آ وتی نمیرانیں سرانی بابتا انچیں کار کن اَنت کہ آؤکیں پدریچ چہ وتی رپتگیناں آژنا بہ بنت ءُ آیاں نوکیں رنگے ءَ در بہ جن اَنت۔ بلئے پد منتگیں راجاں چشیں چیزانی سُدے پِر نیست۔ پد منتگیں چاگردانی مردم تہنا وتی جند ءِ ساہگ ءَ اوشتگ ءِ واب ءَ گِند اَنت۔ آیاں ناں وتی کش ءُ گور ءِ سما گور بیت، ناں وتی دود ءُ ربیدگ ءِ، ناں وتی زبان ءَ شرپ بکش اَنت، ناں وتی نمیرانیں سراں یات کن اَنت۔ بلوچ ءَ ھم ھمے پد منتگیں چاگرد ءِ گوات وارتگ۔ پمیشکا روچ ئِے مروچی بلوچ ءِ راجدپتر بزانکہ تاریخ نبشتہی دروشم ءَ بلوچی زبان ءَ دز نہ کپیت، بلوچ ھما راج اِنت کہ گوشیت منی زمین ءَ 11 ھزار کوھنیں دودمانے بوتگ، منی زبان دنیا ءِ کوھن تریں زباناں چہ یک زبانے، بلئے وتی زبان ءَ ناں آئی ءَ وتی تاریخ نبیس اتگ ناں وتی لبزانکی راجدپتر ئِے شوھاز اتگ ءُ نبشتہ کرتگ۔
زندگیں چاگردانی اکس دگرے۔ انگلستان ءَ برو چارلس ڈکنس ءِ میوزیم ءَ سئیل کن، اود ءَ چارلس ڈکنس ءِ دز نبشت، اکس، نبشتگیں گِدار، رو دپتر، ونتگیں کتاب، ڈکنس ءِ بابتا بوتگیں کارانی ریکارڈ جوانیں وڑے ءَ پہریزگ ءُ ایر کنگ بوتگ اَنت۔ ڈکنس ءِ ھما کرسی ءُ ٹیبل ھم ایر اَنت کہ آیانی سرا ڈکنس ءَ نشتگ ءُ وتی گدار نبشتہ کرتگ اَنت۔ جرمنی ءَ برو گوئٹے ءِ میوزیم اِنت کہ اود ءَ گوئٹے ءِ دراھیں چیز ایر اَنت۔
پراگ ءَ کافکا ءِ میوزیم اِنت کہ اود ءَ ھم کافکا ءِ دز نبشت، کافکا ءِ نمدی ءُ رو دپتر، کافکا ءِ جوڑ کرتگیں اکس، کافکا ءِ دز کشی ءِ ھما کاگد ھم ایر اِنت کہ آئی ءَ پہ کمپنی ءَ نبشتہ کرتگ کہ نوں من نادراھاں گومن کار نہ بیت۔ کافکا ءِ شھر ءَ کہ روئے اود ءَ بازیں کیفے است اَنت کہ کافکا کیفے ءِ نام آیانی سرا نبشتہ انت۔
ترکی ءَ ترکی ءِ نامداریں گدار نبیس ءُ نبشتہ کار اورحان کمال ءِ نام ءَ میوزیمے است کہ اود ءَ مردم رؤ اَنت ءُ آئی ءِ یات گاریں دراھیں چیزاں چار اَنت ءُ وتی نبشتہ کار ءَ گوں مھر ءِ درانگازی ءَ کن اَنت۔ اورحان کمال ءِ گدار دنیا ءِ کجام ھم زبانے ءَ رجانک بہ بیت، ھما رجانک آرگ ءُ کمال میوزیم ءَ ایر کنگ بیت۔ دگہ بازیں درور است اَنت کہ اود ءَ راجاں وتی ازم کار ءُ نمیرانیں سرانی یات گاری ءَ میوزیم جوڑ کرتگ آ میوزیماں آیانی گد ءُ چمپلاں ھوار اے دگہ چیز ھم ایر اَنت۔ اے میوزیمانی تہ ءَ ھمینگوے میوزیم، بالزاک میوزیم، کیٹس ءُ شیلے میوزیم ءُ دگہ بازینے ھوار اِنت۔
بلئے مئے جاور چون اَنت؟
گوشئے زانا سیہ شپے ءَ مانشانتگ ءُ ھر نیمگ ءَ چیپاں مور اِنت چیپاں مور۔
گوادر ءَ سید ھاشمی ءِ لوگ پہ باڑو ءَ دیگ بیت۔ بلئے یکے ءَ ھم اِے سُد نہ بوتگ کہ لوگ ءِ کوھنیں چیزاں بچاریت کہ باریں ھمے داری پیتی کہ اِد ءَ کپتگ اَنت، ایشانی تہہ ءَ چے مان اِنت۔
اسل چیز مھر اِنت، مھر مردم ءَ چیزانی شوھازگ ءُ آیانی نزینک ءَ رؤگ ءَ لاچار کنت۔ مزنیں مھرے کہ بہ بیت پہ مردم ءَ دُرویں راھانی سپر ھم ھچ گران نہ اِنت۔ بلوچاں گوشتگ
دل کہ نہ کشیت گڑا تاپگ ءِ سر ءِ نان ھم نہ پشیت
ھمے مھر اِنت کہ سید ھاشمی ءَ شھلچہ کار ملا پازل ءِ شوھاز ءَ بارت ءُ آ ملا پازل ءِ شئیراں شوھازیت ءُ آئی ءِ کبر ءَ ھم درگیجیت کہ اگاں سید ءَ مہ شوھاز اتیں مروچی وھد ءِ مُجاں اندیم کرتگ اَت۔ آ زمانگ ءَ سپر کنگ ءُ چیزانی شوھاز چونیں گرانیں کارے بوتگ۔ بلئے مزنیں مھر ءُ اِشک ءِ دیما کئے اوشتات کنت۔
مئے بے مھری ءِ ھال اتکگ ایش اِنت کہ ما سید ءِ کوھنیں پیتی نہ چار اِتگ اَنت کہ باریں ایشانی تہہ ءَ چے مان اِنت ءُ چے مان نہ اِنت۔
کافکا ءِ لھتیں چیز ایستھر ہاف ءِ گورا بنت کہ آ ایشاں چیر دنت۔ اسرائیل ءِ سرکار مدام ایستھر ہاف ءِ سرا بیت کہ آ کافکا ءِ چیزاں دگہ جاھے ءَ درکانونی ھساب ءَ مہ بارت ءُ لیلام اِش مہ کنت۔ پمیشکا یک رندے پولیس ایستھر ہاف ءَ دزگیر ھم کنت۔ وھدے ایستھر کہ بیران بیت گڑا اسرائیلی سرکار کافکا ءِ نبشتگیں چیزاں زوریت ءُ سرکاری کتاب جاہ ءَ بارت اِش کہ اے راجی مڈی اَنت ءُ ایشانی پھریزگ مئے ذمہ واری اِنت۔ بلئے سید ءَ کئے بشوھازیت؟
سید اکیڈمی دیر اِنت کہ سید ھاشمی ءِ نام ءَ اڈ بوتگ۔ اکیڈمی ءَ سید ءِ چندے کتاب شنگ کرتگ ءُ بازیں دیوانے ھم سید ءِ نام ءَ برجم داشتگ۔ بلئے من لھتیں واب دیستگ کہ من لوٹاں اِے واباں اکیڈمی ءِ اگدہ دارانی دیما ایر بکناں۔ دانکہ آ اِے بابتا کمیں بہ جیڑ اَنت ءُ سُر ءُ پُرے بہ بیت۔
سید ھاشمی ءِ نام ءَ یک پٹ ءُ پولی بنجلے یا کہ میوزیمے اڈ کنگ بہ بیت اود ءَ سید ھاشمی ءِ نبشتگیں کتاب، دز نبشت، رو دپتر، سید ءِ کتابانی اولی چاپ ءُ ھما کتاب ھم آرگ بہ بنت کہ سید ءَ گوشتگ کہ رَد چاپ بوتگ اَنت۔ سید ءِ بابتا بوتگیں کارانی ریکارڈ، سید ءِ ونتگیں کتاب ما بزانیں کہ سید ءَ چونیں کتاب ونتگ۔ سید ءِ اکس، سید ءِ گد ءُ چمپل، دست ءِ اسا، نبشتگیں نمدی، آدینک ءُ شک، چادر ءُ دزمال ھرچی کہ دز کپیت آ آرگ ءُ ایر کنگ بہ بنت۔ اگاں میوزیم ءِ جاہ گوادر ءَ بہ بیت سک شر اِنت کہ اِے سید ءِ ودی بئیگ ءِ جاہ اِنت۔ مردمے کہ گوادر ءِ سئیل ءَ کیت آ سید ھاشمی ءِ میوزیم ءَ الم چکرے جنت ءُ سید آژنائی ءِ سپر دیما جنزان کنت۔
ھما تاک ءُ ماھتاکاں کہ سید ءِ دستونک ءُ اے دگہ چیز چاپ بوتگ اَنت۔ ھما تاک ءُ ماھتاک آرگ ءُ ھمے میوزیم ءَ ایر کنگ بہ بنت۔
سید ءِ ھما ڈائری کہ آیانی تہہ ءَ سید ءِ دستونک ءُ اِے دگہ نبشتگیں چیز نبشتہ اَنت آ ھم آرگ ءُ ھمد ءَ ایر کنگ بہ بنت۔ دانکہ مردم اِش بہ گند انت ءُ سید ءِ کار کنگ ءِ وڑ ءُ پیم ءَ واکوب بہ بنت۔
سید اکیڈمی ھر سال سید ءِ بوتن یا رپتن روچ ءَ مراگش برجم بہ داریت۔
اکیڈمی ءِ اگدہ دار انچیں توجیلے بہ ساز اَنت کہ اکیڈمی ءِ دروازگ ھچبر بند مہ بیت (کسے کیت شر نئیت شر، بلئے اکیڈمی پچ بہ بیت)
سید ءِ سرا ھر کس ءَ کہ کارے کرتگ آ چیز آرگ ءُ سید میوزیم ءَ ایر کنگ بہ بنت۔ انچیں چیزے کہ چاپ ءُ شنگ کنگی اِنت آیاں چاپ ءُ شنگ ھم بہ کنت۔
ھر کس ءَ کہ سید ءِ ونتگیں کتاب یا کہ آئی ءِ لوگ ءِ کتاب بُرتگ اَنت۔ آ کتاب شوھازگ ءُ نز آرگ بہ بنت۔ اکیڈمی آ کتاباں ھم بیاریت ءُ سید میوزیم ءَ ایر اِش بہ کنت۔ (من اش کرتگ کہ گنز پبلک لائبریری ءَ یک انچیں کتابے گوادر ءِ نامی ئیں مردمے ءَ سوگات کرتگ کہ آئی ءِ سرا سید ھاشمی ءِ نام نبشتہ اِنت، اے وڑیں شنگ ٰءُ شانگیں کتاب یک پہ یک ءَ چِنگ ءُ آرگ بہ بنت)
ھما مردماں کہ سید دیستگ آ مردمانی گلگدار گرگ ءُ ریکارڈ ءَ آرگ بہ بنت۔
ھر وھد ءَ کہ سید ءِ بابتا کسے چیزے نبشتہ کنت آ آرگ ءُ میوزیم ءَ ایر کنگ بہ بیت۔
سید ھاشمی ءِ نام ءَ ھر سال یک فیسٹولے برجم دارگ بہ بیت۔ چش کہ لاھور ءَ فیض فیسٹول ءُ سندھ ءَ شیخ ایاز میلو برجم دارگ بئیگ ءَ اِنت، اے دؤر ءَ چشیں فیسٹول ءِ برجم دارگ پہ ادارھے ءَ گرانیں کارے نہ اِنت۔ کراچی ءَ من آصف فرخی دیستگ کہ آئی ءَ ایوک ءُ تھنا مزن مزنیں فیسٹول برجم داشتگ۔
سید ءِ ھما چیز کہ مردماں برتگ اَنت۔ پہ آیانی آرگ ءَ توجیلے سازگ بہ بیت۔ بگندئے آ مردم چیزاں اکیڈمی ءِ اگدہ داراں مہ دئینت۔ پہ ایشی ءَ شرتریں راہ ایش اِنت کہ اکیڈمی انچیں مردم بہ گپیت کہ آ ھما مردمانی نزینکیں مردم بہ بنت کہ آیانی گورا سید ءِ چیز ایر اَنت۔
اکیڈمی سید ءِ کتاباں وھد پہ وھد مدام چاپ ءُ شنگ بہ کنت۔ دانکہ نہادی ءَ سید ءِ کتاب ھر وھد ءَ پہ بہا ءَ ایر بہ بنت۔
سئے سال ءَ پد سید ءِ ودی بئیگ ءَ سد سال سرجم بیت۔ اکیڈمی اِے درگت ءَ سید ءِ سد سال ءِ سپر ءَ دیما بہ کنت ءُ مزنیں دیوان ءُ مراگشے بہ ٹاھین ایت۔ اگاں سید سد سال ءِ سرجمی ءِ سال ءَ اکیڈمی سید میوزیم ءِ دیم درائی ءِ دیوان ءَ بہ کنت۔ اے یک جوانیں کارے بیت۔
پہ اے کارانی کنگ ءَ بس مزنیں اشکے لوٹیت۔ مزنیں اشک وتی راہ ءُ دراں وت پچ کنت۔
کار پہ کنگ، راہ پہ رؤگ
(اے نبشتانک آر سی ڈی کونسل گوادر ءَ سید ھاشمی اکیڈمی گوادر ءِ چیر دستی ءَ برجم داشتگیں مراگش ءَ 27 اپریل 2023 ءَ وانگ بوتگ)