شائریءُ لھتے دَری نگدکار

اِسحاق خاموشؔ

شئیر ءِباروا افلاطونؔ ءِایراد گِیریءُ لیکہ مزنیں اَرزشتے دارنت۔افلاطونؔ کہ ارسطوؔ ءِاُستادءُ سُقراطؔ ءِلائک تِریں شاگرد اَت۔آ،اَنچو کہ ، چہ شئیر ءِنازُرکیاں سرپد اَت ھمے وڑءَ آئی ءِوتی تھا ساچشتی بُودِشت ہم باز اِتنت۔آ، چہ شئیر ءِاثرءُ دِلکشّی ءِزانتکاری ءَاَبید وت ہم یک شائرے اَت۔آ، یک پیدائشی شائرے اَت۔بلے آئی ءَوتی شئیر دِرتءُ دَؤر داتنتءُ پدا شئیر ءِبگیری ءَپاد اَتکءُ اٗوشتات۔آئی ءِنزّ ءَشائرتْرپلّءُ رَدیں ھیال کاراَنتءُ پِگر ءُلیکھاں باپرین اَنت۔شائری درکانودی ءَگیش کنت۔آئی ءَشائری ءَدرسمائی (لاشعوری) کارے لیکھ اِت۔آئی ءِگُشگ اَت کہ شائری ءِبُنیاد ءَگوں عقلءُ زانگ ءَکار نیست۔

آئی ءِنِزّ ءَ’’جمہوریہ‘‘(Republic)ءِھاکمانی واستہ شائری ءِزانتءُ زانِشت یک زَھرے ءَچہ کمّ نہ اِنت۔آئی ءَچہ ’’ جمہوریہ ‘‘ ءَشائر در کَشّ اِتنت۔آئی ءِحیال ءَشائر یک شرّیںءُ گْراں تبیں شھری یے جٗوڑ بُوھگ ءِدیما مزنیں اڑاندے بنت۔آئی ءِاے ہم گُشگ اَت کہ شائر وتی جند ءِگُشتگیں شئیرانی گیشّواریءَوت ہم کُت نہ کنت ءُ نگدکارءُ دِگہ وانوک وتی تبءُ متلب ءِمعناءُ بِزانت کشّنت گُڑا چُشیں گپّانی سرا چوں مردُم بھیسہ کُت کنت؟۔افلاطونؔ، شائری ءِدروریءُ چیدگی اَرزِشتاں ھچ وڑءَ بئے نہ کنتءُ نہ منّیت۔آئی ءَگُشتگ اَت کہ نُوں شائری ءِکرن ءَجتگ …. نُوں شھزانتی(فلسفہ) ءِدؤرءُ زمانگ اِنتءُ شھزانتی مردُم ءَچہ راستیءُ اے دِگہ زانِشتاں آژناگ کُت کنت۔

افلاطونؔ ءِدومی لیکہ ایش اَت کہ شائری اخلاقیات ءِسرا ردیں سانءُ اثرے دؤر دنت۔آئی ءِھیال ھمیش اَت کہ دیوتا کہ کُلّیں شرّیانی پدرائشت اَنت، آھان ءَجنگءُ مِڑءُ بنیادم ءِسرا زُلمءُ جَورکنگ ءَ، پیشدارگ جْوان نہ اِنت۔افلاطون شائری ءَسئے تھر ءَبھر کنت۔بیانیہ، جنگیءُ کسمانکی….. آئی ءَکسمانکیءُ جنگی شئیری داستانانی تھا نقل گندگ کئیت۔آئی ءِھیال ات کہ اے تھرانی تھا شائر وت ءَجتا جتائیں کار ستانی تھا بھر کنت ءُ پیشداریت۔آ، چاروکءُ گوشدارک ءَھمے موہ دنت کہ وت ءَھمیشانی تھا ھَوار بہ کنت۔آئی ءِنزّ ءَنقلءُ رندگِیری مردُم ءِواستہ جْوانیں چیز نہ اَنت۔

آئی ءِیک نہ منّگ یے ایش ات ہم کہ شائری بنیادم ءِجْوزگانی ھاتر ءَتاوان باریں چیزے….. شائر بنیادمی مارِشتاں پْرشتءُ پْروش کنتءُ پیشداریت۔آ (شائرءِ) زِندگی ءَیک گٗولاپے ءِدْروشم ءَپیشداریت کہ چریشی ءَمردُم وتی جند ءَریپین ایت۔شائری مردُم ءَجنینءُ ردکاریں مردُمانی نیمگ ءَبارت۔افلاطون چہ شائری ءِزٗورءُ تاگت ءَہم زانتکارءُ سرپد اَت پمشکا گُشتگ اِت ئےِ کہ اگاں شائر اَنچو وت سرءُ یلہ درگَلہ یلہ کنگ بہ بنت گُڑا آ،دَروری (مثالی)’’جمہوریہ‘‘ ءِواستہ اڑاند جٗوڑ بنت۔آئی ءَگُشت کہ شائر کہ وھدے مئے شھر ءَکاینت ما،آھانی دیما وتی سراں جہل کنیں….گُڑا چُش چوں بیت کہ چُشیں مردُم مئے ریاست ءِتھا جاہ منند بہ بنت۔مزن دَروریں ’’ جمہوریہ‘‘ ءِکانود ھچبر اے گپّ ءِاجازہ ءَنہ دنت۔پمشکا آھانی گُدانی سرا وشبو پِرشانَگءُ پُلّانی ھار آھانی گْورا دَیگ ءَپد آ، چہ شھرءَدر کنگ بہ بنت۔

فامس لو پیکوک شائری ءِباروا گُشیت کہ شائرپہ یک راجے ءِ تھا چو جنگلی وکشی ءَاِنت۔آ، ھیالانی تھا زِند گْوازینیت۔شائری ءَرا دیمرئی دَیگ ، جْوانیں وانِشت ءِنیمگ ءَدِلگوشداری ءِکمّ کنائینگ اِنتءُ اے یک بے مکسدیں کارے ءِسرا وھد زوالی ءَابید دِگہ ھچے نہ اِنت۔

ہیگلؔ ءَچہ مھرانکی جُنز(رومانوی تحریک) ءَسکّ بد اَتک۔آئی ءِنزّ ءَشائری مردُمانی دِلانی تھا دِلپْروشی ءَودّین ایت ءُ بنیادمی جُہدءُ کوشست ءِدیما اڑاند رٗودینگ ءِسَوب جٗوڑ بیت۔بنیادم ھیالی دُنیا ءِتھا گار بیتءُ چہ عملی زِند ءَدزکشّءُ گِستا بیت۔ہیگل ءِنزّ ءَفرد( مردُم) ءَچاگرد سازی ءِجْوزگءُ مارِشت بُوھگ لُوٹیت۔مردُم اگاں چہ وتی اَبرم ءَدُور دُورءُ گِستاء بہ بیت تہ جْوانیں وڑے ءَماں چاگرد ءَوتی کِرد ءَپیشداشت نہ کنت۔مردُمءَھرچ وڑ ءَماں وتی چاگردءَوڑے ناں وڑے ءَوتی کِرد پیشدارگی اِنت ءُ ھمے کِرد آئی ءِچاگرد ءِھزمت بُوھگ لُوٹیت۔ہیگلؔ ءِھیال ءَشائر وتی قلم ءَچاگرد ءِپابند نہ کنت ءُ چاگرد ءِزلورتءُ لٗوٹاں وتی شائری ءِبُنیادءُ بُن ھِشت جٗوڑ نہ کنت۔

ویکو ؔ ءَگُشت کہ سرجمیں دیمرئی کُتگیں ذہن یے ءِتھا پہ شائری ءَھچ جاگہ نیست۔شائری گوں راستی ءَھمگْرنچ نہ بیت۔ایشی ءِتھا شائری چہ وتگڑیں ھیالاں کار گیپت۔آ، زِندءِراستیانی پلہ مرزی ءَنہ کنت۔چہ دْروگ ءَکار گیپت۔آ، راستی ءَدُور دَور دنت۔

دیمرئی کُتگیں ذہنءُ مجگ ،راستی ءِمنّوگرنہ اَنت۔راستی ، سائنسءُ چاگردی زانِشت ءَرٗودین اَنت۔آ، گُشیت کہ شائری دٗودمانءُ ربیدگ ءَدیمرئی دَیگءَھچ وڑیں کُمکّے نہ دنت۔آئی ءِرِد ءَشائری ءِزانشت ءَھچ وڑیں راسبندے نہ بیت۔ویکو ؔءِرِد ءَچاگردءَدیمرئی دَیگ ، روزِندیءُ چاگردی زِندءِتھا بدلی آرگ ءُ آئی ءَگہتر کَنگ ءِھاتر ءَانچیں زانِشت دیما آرگ بہ بنت کہ آ، زِند ءِراستیاں لَس مھلوک ءِدیما پدّر کُت بکننت۔

گوسنؔ ءَشائری ءِدرَ اِخلاقیءُ نُقصءُ تاوان ءِتکانی ھِلاپ ءَیک تاکبندے کشّ اَت۔اے تاکبند ءِتھا آئی ءَشائری ءِبگیری ءَقلم چِست کُت کہ شائری دْروگانی مات اِنتءُ اے ہم گُشت کہ شائری ھر وڑیں دْروگانی بُنزہءُ بُن چمّگ اِنت۔اے بنیادمی کِرد ءَرا نادْراھیں واھشانی وسیلگ ءَ، نِزٗور ترّین ایتءُ ورناھانی تاجگیں مجگاں چہ وہم ءَچکارءُ سرّیچ کنت۔شائری عقل ءَنِزٗور کنت۔مردُم ءَگُناھانی نیمگ ءَبارت ءُ جنسی واھشتاں باپرین ایتءُ پاد کنت۔گوسنؔ گُشیت کہ شائری وھد ءِزوال کنگ اِنت۔

لائجانسؔ کہ افلاطونؔ ءِمُرید اَتءُ چرائی ءِپِگرءُ لیکھاں سکّ متاثر اَت ہم۔ بلے پدا ہم آ، چرائی ءَجتا اَت….آ، شائراں چہ مُلک ءَدر کشّگ ءِگپّ ءَنہ جنت ۔آ، شائری ءِپُر معناءُ پُرمکسد بُوھگ ءِسرا زٗور دنت۔آ، بالائیں لبزانک ءَچہ ھمے لٗوٹ ءَکنت آ، وانٗوک ءِسرا چو سِحرے ءَتالان بہ بیت۔آ، لبزءُ گالانی جادُوگِری ءِمنّوک اِنت۔پمشکا آ، چہ شائر ءَھمے لُوٹ ءَکنت کہ شائر، وتی شائری ءِتھا انچیں جوشءُ جْوزَگے ودی بہ کنت کہ وانوک ءِسرا دیوانگی ءِچاگردے تالان بہ بیت۔بِزاں شائری اخلاقیات ءِرسانک ءِارزشتداریں وسیلگ جٗوڑ بہ بیت۔

میتھیوآرنلڈؔ ءِھیال ءَ،ھمک بنیادم ءَآئی ءِبُودِشت گوں آئی ءِمارِشت ءُ چاگردی کیلواں چہ رسیت۔آ، کلاسیکی ربیدگانی منّوگر اَت۔آئی ءِنزّ ءَمھرانکی شائرانی کِرّاہم تنگیءُ یکّوئی ءِچاڑءُ کیف نیست۔آ، شائری ءِسرا ایراد گیپتءُ گُشیت کہ ھمے کیفءُ چاڑ نہ بُوھگ ءِسَوب ءَچُشیں شئیر دیر مانٗوک نہ بنت۔آرنلڈؔ ءِزمانگ ریاستءُ ھاکمی ءِپْرشتءُ پْروش ءِدؤرءُ اَھد اَت…. آرنلڈؔ چہ ھمے اَھد ءَیاگی بُوتءُ نبشتہ ئےِ کُت کہ چُشیں وھد ءَناں لبزانک جْوانیں وڑے ءَساچگ بیت ءُ ننکہ دِلجمیں وانوک ودی بُوت کنت۔آئی ءِگُشگ اَت کہ ہما شائری بنیادم ءَتاھیر دات کنت کہ بُلندءُ بالا بہ بیت۔آ، زِند ءِبُلندءُ بالائیں قدرءُ کیلوانی دیما آرگ ءِباروا زٗور دنت۔

جتا جتائیں وھدءُ زمانگاں شائری ایر جَنَگ بُوتءُ شائری ءَرا یک حاصیں کالبے ءِتھا ایر گیجگ ءِاوں جُہد کَنگ بُوت۔ شائری ءِبگیری ءَبازینے ءَبغاوت ءِبیرک اوں مِکّ کُت۔

اے کُلّیں زٗورءُ کوشستاں ابید ہم کسّ ءَشائری ءِدیما دِیوال بست نہ کُت۔شائری ءِکاروان جُنزان بُوت…… شائرءُ شائری ءِمنّوکءُ وھدار رٗوچ پہ رٗوچ ودّان بُوتنت….. چو کہ لَس لیکہ کہ شائری ءِبگیر اِتنت، آھاں گوں اَبرَ م ءَسْیادی نیست اَت پمِشکا وھد ءِھمرائی ءَساہ دیان بُوتنتءُ شائری انگت وتی جاگہ ءَبرجاہ اِنت۔

٭٭٭

سر شون:

٭ارسطو سے ایلیٹ تک، ڈاکٹر جمیل جالبی، نیشنل بُک فاؤنڈیشن اسلام آباد

٭۔مغربی شعریات، محمد ہادی حسین، مجلس ترقی ادب، لاہور

٭مغرب کے تنقیدی اُصول، پروفیسر سجّاد باقر رضویؔ، مطبع عالیہ لا