شائرے ءِ پریات : نبیل نود
شائرے ءِ پریات : نبیل نود
شپ ءَ من شپ نہ گْوشت
ءُ روچ ءَ روچ
من اَنچو تُرس ءِ ساھگ ءَ
وارتاں زندءِ شپ
نی پیر ءُ آجزاں
جان ءِ پوست چَل تَریتہ
جسم ءِ رنگ زَرد تَریتہ
ھمبلے اوں نیست کہ
جونءَ کوپگءَ بہ کنت
منی
ءُ ایر بہ دنت ماں جندءِ باتن ءَ
وت ءَ من جست گراں
کجا کُتہ من زندگی؟
لدیگاں ڈیھ لپاشتہ
فروناں گلزمیں وتی کُتہ
ھُکّاں دپ جتاں کشار
منی مات ءُ منگہیں گھار
من پرچا گُنگ اتاں
ھچ نہ گُشت ءُ جنگ نہ کُت
من جند ءِ زات ءَ بند اِتاں
من چو کناں من آ کناں
تھنا زند ءِ رنگاں مٹ کناں
منا چکار گوں زمین زادگاں
گلامیں ھاک ءِ وارساں
گنوک بے متاہ زندگاں
بلے نی تھت ءِ کنڈءَ کپتگاں
پیر ءُ آجزاں ءُ مود رتکگاں منی
من زند ءِ گڈی روچاں اے گپ جیڑتہ
من زندگی ءَ زندگی نہ کُت
ھاک ءِ چماں مُرتگاں
کسے اتک تہ کل بہ کنت من ءَ
من زمین ءَ چی گُشاں
منی کبر ءِ شک ءَ چُش بلیک
اے زمین ءِ واجہ ءَ
زمین نیست شناس نیست
اِدا ما بس
وت گرزیں شائرے ءِ جون کل کُتہ
نبیل نود