لولی اُردل ءَ لولی لول
لیلو
لولی اُردل ءَ لولی لول
لولی ءُ سپت پہ بچّ ءَ
بچیگ واھگ ءُ دیداریں
چنڈی گوازگءَ شیشاریں
بچّیگ سدستائی دادے
مُلّائی گس ءِ اولادے
مات ئےِ چہ ہما پارسایاں
پت چہ کعبہ ءِ درویشاں
ھلک ءِ بانکاں داوت دئے
وش گُٹیں جناں سٗوکالءِ
پیشگاہءَ سرپے بِل بنداں
چوگان ءُ سپت پر بنداں
ونڈیگیں گرانڈ ءُ گوکاں
بھرءُبانگ کن اِت ماں ھلکاں
لوٹ اِت عالم ءُ مُلاھاں
وان اَنت سی جٗزیں فرقانءَ
ٹکّان ئِے جن اِت پاسپانی
دستاں مھرگاں ھپت رنگیں
نسّارئِے کن اِت یاسین ءَ
شمس ءِ سورت ءُ رحمن ءَ
بچیگ گوانزگ ءَ شمشاد ءِ
زھم ئےِ ماں سرونءَ درتکگ
دستان بند ات ئِے کُلمیر ءَ
باندات ءِ نواب ءُ میر ءَ
چنڈ اِت گوانزگ ءَ نرم نرم ءَ
بچ ءَ ھلوتی نازین اِت
دانکے در مئیت چہ لُنٹاں
بچیگ نوں منی آسک وابیں
جےکےجلالی