لچّہ : مئے تب ءِ موسمانی کہ رندءَ کپ ئے۔ زاھدہ رئیس راجی
لچّہ : مئے تب ءِ موسمانی کہ رندءَ کپ ئے
لچّہ کار: زاھدہ رئیس راجی
مئے تب ءِ موسمانی کہ رند ءَ کپ ئے،
چَہ وت ءَ رَد کپ ئے
اے تب ءِ پُشدرءِ تھل ءُ تُرپشیں کُتہ کاریانی سپر،
یک دمان ءِ نَہ انت
اے تب ءِ درچکے ءَ برکُتگ اُمرے ءَ
آپ داتگ زیان ءِ ھمک موسم ءَ
تو پَہ وشنودی ءَ ، سربُری کسّہ ءُ داستانانی ساچوک ءِ کارست بئے،
لبز لبزاں کمایان ءُ گواچینی مارشتاں سَرگوز کن ئے
چون جیڑ اِت کناں؟
ھرکُج ءَ چرپی یے دیستگ ئے رپتگ ئے
یک دمے، سِیتّے ءَ ، چَہ وت ءَ سِستگ ئے
مئے تب ءِ پُشت ءُ رند ءَ کپ ئے، رد کپ ئے
مئے تب ءِ ریشگے!
گوست ءِ گواچین ءَ پیوست بیتگ مُدام
وش ءُ سک ءِ میان ءِ دماناں بِہ پُرس،
اَھد ءِ زوراکیانی ھمک کسّہ ءَ
کینگیں براتے ءِ براتوی کِردے اَت
توکہ آبیل ءُ کابیل ءَ سرگوز کن ئے، کے میاریگ بیت؟
مار پَشکءَ بِہ بیت یا کہ آستونگ ءَ
اے کزا ءَ رزایے ستر گون بیت
سر کہ ساٹگ بِہ بیت، جنت سد سالے ءَ
گوست ءِ چیرگیجی ءِ دپترءَ پچ بہ کن
گرانیں بُٹّانی چِیرءَ لگتمالیں راجانی دلّار،
ھجبر درآمد نہ اَت
راجدپتر چہ تو بودناکیں تب ءُ پگرے ءِ لوٹ کنت
لوٹ پَہ چاڑی ءِ
لوٹ گواچینی ءِ
لوٹ سنگینی ءِ
لوٹ پَرّیچی ءِ
لوٹ دیرگِندی ءِ
لوٹ جھولانکی ءِ
لوٹ بُرزیں، چہ استال ءُ ماہ ءِ گُرابانی ھمراھی ءِ
لوٹ ھرموسم ءِ نوکیں گامگیجی ءِ
لوٹ باندات ءِ پدریچ ءِ رُژنائیں امروز ءِ وشھالی ءِ
وھدے تئی اوں تب ءُ مئیل ءِ لوٹ ءُ گُزر
مسکیں ھاک ءَ گوں پیوست ءُ ھمگرنچ بیت
نوں رزا بیت ترا
نوں رزا بیت ترا مئے تب ءِ موسمانی کہ رند ءَ کپ ئے
ھچ وڑ ءَ رد نہ بئے، الم ءَ جاہ کپ ئے۔
5 ستمبر 2023