لچھے پہ نوکیں سال ءَ۔ 2023۔ اسلم قادر
لچھے پہ نوکیں سال ءَ
2023
اسلم قادر
وھد ھَورے شل ایت
وھد ھَورے شل ایت
سال ترمپ انت ریچ انت
ماہ درنزانت وت ءَ
ترینزوکانی وڑا
روچ چش نمبگ ءَ
گوات ءَ شینگ انت روانت
من کہ اھد ءِ ادا
وت وتی منزمان
من کہ کرد ءِ وتی
وت بباں پاسبان
کئے نوں اوشتیت پمن
کئے مئے گاماں گوں روت
گوں وت مھرے بکن
وت ادا مھروان
وت بکندین وت ءَ
وت بسھڑین وت ءَ
وت بہ پھریز وت ءَ
کھریں چہ موسماں
چہ گم ءُ مولماں
گرانیں چہ نوبتاں
مشکل ءُ آپتاں
کس ادا پہ ازل
گوں تو.ھمبراہ نہ انت
تو وتی راھے ءِ
ایوکیں راھی یے
تو وتی منزل ءِ
کہ مساپر وتی
وش بیت چوں سپر
تو اے راز ء بزان
تو اے کزب ءَ بزان
زند کسمانکے
تو ببو ازمکار
تو اے ازم ءَ بزاں
پتو ایر انت ھنر
راہ تئی گیش اتگ
تو بزانے اگاں
گار ءُ بیگواہ بے
تو نزانے اگاں
ھچ نمانیت ادا
پتو ڈس ءُ نشان
تو چش دنز ءِ وڑا
بال بئے گواتے ءَ
گار بئے جاھے ءَ
کس نہ جل ایت پتو
کس تئی ھمبراہ نہ بیت
شپ پہ وابے نہ بیت
روچ نئیت کارے ءَ
سھب ءِ سارتیں سمین
ترند ءُ گرمیں لوار
درس لئیب ءَ تئی
راستیں دست ءِ دل ءَ
تو بچارے اگاں
تو بزانے اگاں
ساپیں یک.کاگدے
پتو اے زندگی
تو یک ندکارے ءِ
تو نبشتہ بکن
وھد ھورے شل ایت
سال ترمپ انت ریچ انت