لیلہ ھالد ءِ سر گْوست ( پنچمی بھر )رجانکار: سرباز وپاؔ
منی مردم زندگ مان اَنت۔ لیلہ ھالد ءِ سر گْوست ( پنچمی بھر )
رجانکار: سرباز وپاؔ
منی ناکو ( ماس ءِ براس ) کھو دکو ءَ اے وئیل ءِ ھال رستگ گڑا آئی ءَ اَچ من ءَ پکّ ءَ کنگ ءِ لوٹ کرتگ۔ آئی ءَ من چکاس اِت ءُ باز سانمند بوت، آئی ءَ بیسّہ نہ بوتگ اَت کہ شش سال ءِ زھگے ءَ کُران پاک ءِ انچو باز بھر یات اِنت۔ آئی ءَ پہ انام من ءَ یک لبنانی پونڈے داتگ ( آ 25 پینس ءِ کَچ ءَ اِنت) منی زندمان ءِ اولی مُزّ اَت۔ من وشان بوت ءُ وتی ناکو ءِ دپ چُک اِت ءُ تچان ءَ ماس ءِ کِرّ ءَ آتک آں وتی سوبمَنْدی ءِ وئیل ءِ درشان کنگ ءُ آئی ناھکّی ءُ کنجوسی ءِ بارو ءَ گپّ کُرت۔ مات ءَ منی دُرسیں گپّ گوں مزنیں تھمبلے ءَ گوشداشت اَنت، منی پونڈ ءِ دات ءُ گْوشت ئِے اے تئی ناکو ءَ داتگ، تو چے پیم بِہ لوٹ ئِے چیز کرت کن ئِے۔ من آ پونڈ زْرت ءُ پہ وتی اُستاد ءَ سوگات ءُ پہ زھگاں شرینی گپت۔
1959 ءِ تاکریچ ءِ موسم اَت پہ پلستینیاں برجاھیں ابونجیلیکل چرچز وانگجاہ بنداتی کلاس ءَ منی نام زُورگ بوت۔ اے سال ءِ تیرماہ ءَ من وتی گْوھار کُران ءِ وانگ ءِ گوں مزنیں دلگوشے ءَ گوشداشتگ اَنت، ھمے وڑ ءَ من کُران گُوشداراں کرتگ آیانی اکس منی چمانی دیم ءَ بوتگ۔ من ذپیہ ءِ گون ءَ یکجاہ بوتگاں آئی ءَ چے کہ کرتگ گڑا من ھما وڑ کرتگ۔ چے کہ آئی ءَ یاد بوتگ آ من ءَ ھم یاد بوتگ اَنت۔ آ چارمی تبکّ ءَ اَت من ھما تبک ءَ روگ لوٹ اِتگ۔ پد ءَ من آ تبک ءِ روگ ءَ پمشکا زِدّ کرتگ کہ بنداتی دو تبکّ پچیں اَنت ءُ ڈگار ءَ نندگی بوتگ۔ بلے اُستاد ءَ من ءَ پد ءَ ھما بنداتی تبکّ ءَ دیم دات۔ من سک ءَ زھر ءَ بوت آں ءُ کوکار کرت کہ منی چکاس ءَ بگر ءُ پد ءَ گپ کن۔ من چارمی گریڈ ءِ اَربی ابید ردی ءَ ونت کرتگ۔ اُستاد ءَ منی میتھ چکاس اِت ایشی ءَ پہ سوبین بیگ ءَ من لائِک اِت آں۔ بزاں انگریزی منی بے سوبی ءِ سوب جوڑ بوت۔ من ءَ انگیزی ءِ بُنیادی اَرپ ءُ دگہ لھتیں لبز یاد آتکگ اَت کہ آ منی گْوھار ءَ یاد بوتگ اَنت۔
وھدے اُستاد ءَ سْیاھیں بورڈ ءِ سر ءَ انگریزی “0” نبیس اِت منی آئی ءَ اربی پنچ سرپد بوتگ آں۔ اُستاد ءَ کند اِت ءُ گْوشت کہ تو راستے زھینداریں جنکے ئِے۔ بزاں تئی زانت انوں دو گریڈ ءِ کَچ ءَ نہ اِنت، منی تئی زانت دیستگ ءُ بنداتی تبکّ ءَ تئی نام ءَ دیاں۔ من ءَ یک نیمگے ءَ وتی سوبین بیگ ءِ کمو مارِشت ءُ دومی نیمگ ءَ زھر پیداک اَت کہ من ءَ پد ءَ ھما پچیں جاہ ءَ زمین ءِ سر ءَ نندگی ئیں تبکّ ءَ روگ لوٹ اِیت۔ بزاں نوں من سنگینیں نودربرے بوت آں کہ چہ اربی ءَ اَبید انگریزی، ھساب، لیب، سوت ءُ آدگراں دربرگ ءَ اِت آں۔ نوں من سلیٹ ءِ سر ءَ نبشتہ کنگ زانتگ، مات ءَ وتی کْوھنیں گُد دِرتگ ءُ پمّن وانگی بیگے جوڑ کُرت من وتی وانگی سامان مان کرتگ اَنت۔
وانگ ءِ اے دوئیں سالانی تہ ءَ من وتی دْرانڈیھی ءِ زندگی ءَ ھیل کرتگ اَت۔ اے دوئیں سالانی تہ ءَ یک زھرشانی یے بوتگ کہ آئی ءَ پلستین ءِ یاتانی ٹپّ پد ءَ تاچگ کرت اَنت۔ ھمک وھد ءَ پلستین ءِ کسہ ءَ نوں من شر سرپد اِت آں۔ بلے من ءَ انچوش سما بوت کہ 5 مئی 1951 ءَ بوتگیں زھرشانی پہ منی وانگ ءِ درچ ءَ اڑاندے ءِ وڑ ءَ اَت۔ وانگجاہ ءَ اے وھد ءَ موکل اَت۔ بلے اے درچ ءَ من ھچ وڑیں زھرشانیاں جْوانی ءَ بھر نہ زرتگ۔
من وتی ماس ءَ را زھرشانیانی باروا ءُ مول ءِ جُست گپتگ، من ءَ اے ھم سما بوتگ کہ من وتی ھم کچیں زھگانی تہ ءَ تھنائیں جنکے آں کہ زھرشانیاں ھوار نہ آں۔ منی ماس منی سر ءَ زھر ءَ بوتگ کہ ترا وتی گْوھارانی گون ءَ پلستین ءِ سر ءَ یھودیانی زوریں دستیگ ءِ بگیری ءَ زھرشانیاں بھر زورگ لوٹ اِیت۔ من اے گپّ ءَ رازیگ بوت آں کہ زھرشانی شر اِنت، بلے اے ھم گْوشتگ کہ وانگجاہ ءِ کار چہ ایشی ءَ گیش ارزِشت دار اِیت۔ ماس ءَ را چہ منی اے گپّاں راجدروھی ءِ بوہ بوت ءُ آئی ءَ من ءَ سے گچینیں راجدروھی ءِ روچانی یاد دل ءَ دات اَنت پہ ایشانی یاد کنگ ءَ ھمُک پلستینی جنین ءُ مرد ءَ را کمیں زندگ بیگ لوٹ اِیت۔ اوّلی بالگو ءِ جار 2 نومبر 1917، دومی 29 نومبر 1947 ءَ پلستین ءِ بھر ءُ بانگ ءُ سیمی 5 مئی 1948 ءَ اسرائیل ءِ دیم ءَ آھگ۔ چہ ھما روچ ءَ اے سے ئیں گْوَستانک منی زندگی ءِ تہ ءَ ارزشت دار اَنت۔
1952 ءَ منی زندمان نوکیں نیمگے ءَ بُرت، اے وھد ءَ منی اُمر ھشت سال اِت بلے جاوراں زُوراکی ءُ دْرانڈیھی ءِ درداں من ءَ سیاسی سرپدی بکش اِت۔ منی بْراس ءَ پیسر ءَ من ءَ سْیاست ءِ تہ ءَ آؤرتگ اَت، من ءَ وتی بْراس مھمد ءُ ابا ءِ درمیان ءَ سْیاسی گپّ ءُ تران شر یاد اَنت۔ اے وھد ءَ مھمد ءِ اُمر ھبدہ سال اَت ءُ آ تیوگیں کھول ءَ گْوشگ ءَ اَت کہ کُجام وڑ ءَ ورنا ءُ جوشیلے لشکریانی کسانیں ٹولی ءَ مِسر ءِ وھد ءِ بنّامیں شاہ پاروک ءِ بادشاھی ءِ تھت چپّی کُرتگ۔ ابا اے وھد ءَ اے آشوب ءِ چہ بگیری کنوکیں مردمان اَت، آئی ءَ گْوشت کہ اے لشکری ٹولی ناسرپدیں اَنت۔ آیان ءَ سْیاست ءِ بارو ءَ سرپدی نیست۔ آئی ءَ آ مرد ءِ بادشاھی تھت چپّی کُرت کہ آئی پلستین ءِ دیمپانی ءَ 1948 ءَ جنگ کُرتگ اَت۔ مھمد ءَ گیشتِر زَھر اَت۔آئی وتی پِت ءَ یات دات کہ بادشاہ زُورگِریں برتانیہ ءِ کارمند بیتگ کہ آئی پلستین ءَ جنگ ءَ پُروش وارتگ ءُ داں چار سال ءَ پد ءَ پلستین ءِ گِرگ ھچ جُھد نہ کُرتگ۔ ایشی ءَ ابید بادشاہ، آئی ءِ کھول ءُ ھمکاراں چہ مردماں گیش گوں مسر ءِ مال ءُ دولتاں مھر بوتگ۔
روان اِنت۔۔۔۔۔۔۔۔