دستونک
مبارک قاضی

ادلسے گؤرءَ بیت اِنت، بُرکھے سرءَ بیت اِنت، چنچو زندگی وش ات
روچ برکتءَ ساری، مردمے درا بیت اِنت، چنچو زندگی وش ات

چندے انچیں اسرار اَنت، چیزے انچیں چاچ ءُ چینک، گوں منءَ نہ بنت مانا
زندگی ءِ مرگءَ پد مرگ ھم پدا بیت اِنت چنچو زندگی وش اَت

چار راہ ءُ ھشت چوکاں ما در آتگیں جند ءِ رندپدانی شوھازءَ
وت شناسی ءِ منزل دمکےءِ تَھا بیت اِنت، چنچو زندگی وش ات

بے گناھیں ڈوھانی، دیم و پشت چے مطلب، ما داں زند بندیگوں
ناروائی ءِ دستاں، ناروا روا بیت اِنت، چنچو زندگی وش ات

قاضی کْدرتءِ دستاں، مردمانی بازارءَ مھر متلبی چیزے تو فھم اتگ بلکیں،
زند ھر کجا بیت اِنت، مرگ ھر کجا بیت اِنت، چنچو زندگی وش ات