دستونک
شائر: مبارک قاضی

نگرھیں دیم ءَ درا کن یک برے
بیا دلءِ درداں دوا کن یک برے

کپتگ ئے ماں اشکءِ نیل بومیں زِرءَ
ناهدا هوش ءَ سرا کن یک برے

من پدا تئی بنده باریں باں نباں
تو منءَ زیر ءُ خدا کن یک برے

بلّے رسم دود یکّے ءِ پرشنت
ناکنءَ گوشتءَ جدا کن یک برے

من هزار رندا پتو کولیگ باں
تو وتءَ پمن پدا کن یک برے

یا منءَ همراه وتی پاداں ببر
یا وتی چکّءَ پدءَ کن یک برے

رَندءَ استالاں پدانک بندئے بہ بند
اے دلءَ دستءِ دلءَ کن یک برے

تو اگاں قاضی چہ دنیا ءَ روئے
دوستیءِ هکّءَ ادا کن یک برے