مصر۔ دومی بَھر۔ انجنئیر الطاف حسین بلوچ
مصر۔ دومی بَھر
انجنئیر الطاف حسین بلوچ
پاسپورٹ ئے کار بوتگ اتاں، من وتی کنسلٹنٹ ٹینجینٹ ھال داتگ ات کہ پانزدہ روچ پکار انت دانکہ پاسپورٹ جوڈ ببیت۔
دانکہ پاسپورٹ مبیت اچ نہ بیت۔
گڑا شال ءَ نندگی انت یا کراچی ءَ یا تربت؟
گڑسرا شال ءَ منا داشت، موسم ءَ منا کید کُت۔
فروری سک سارت ات بلے ھوراں شھر ءُ برپاں کوہ دگے وڈے زیبا کتگ ات۔
شال ءَ گندے پھٹان مہ بوتیں سک وش ات، منی دلا مدام ہمیں گپ اتکگ۔
انچو گشاں کہ آ دوراں کہ شال وتی دوراں بوتگ لٹل پیرس گشگ بوتگ نوں پیرس سک دیما شتگ ءُ شال عاجز بوتگ ءُ ہمینکس پشت ءَ۔
نوں وا گشے افگانستان ببیت، نہ دگ ءُ روڈ نہ انفراسٹیکچر ءُ نہ سرکاری پلاننگے کہ شھرے چھرگ ءَ بجنت۔
سہ ٹیری رکشہ انت، پروشتگیں بس انت ھر گاڈی انت کہ لگت دینت ءُ پھٹان انت۔
بلے انگت سک وش انت۔
منا یات بیت اولی براں بی ایس او ئے سیشن ئے ءَ من گوں وتی کماش ءَ شال ءَ اتکگ اتوں، مارا ڈگری کالج ءَ داشتگ اتے، ڈگری کالج ءُ یونیورسٹی ءِ گلاب ئے پُل انگت منی زانشت ءَ ایر انت۔
من داں مزن بوتوں ءُ دوار شال ءَ نہ اتکوں منی گمان ءّ ات کہ شال ءَ ہمک نیمگ ءَ اشکیں گلابے پُل بباں۔
گلاب نیست ات سہ ٹیری رکشھانی ٹَیر ءُ ٹار، کٹارا بسانی جنگل ءُ پھٹاناں ابید شال وتی زیبائی ئے مٹ وت انت، انچیں شھرے کہ گوں وتی موسماں سِھر ءُ جاتو کنت۔
دو ہفتگ چوں گوست منا اچ سما نہ بوت۔
منی مشونکی پاسپورٹ منا رستگ ات، من کاپی ئے ٹینجیٹ والہانی سرا راہ دات ءُ ٹکٹ کُت دیم پہ ھاکمانی شھر اسلام آباد ءَ کہ مصرے ایمبیسی ہمود ات۔
روان انت۔