منی مردم زندگ مان اَنت۔ لیلہ ھالد ءِ سر گْوست (بنداتی بھر)
منی مردم زندگ مان اَنت۔ لیلہ ھالد ءِ سر گْوست (بنداتی بھر)
رجانکار: سرباز وپاؔ
من ھیپا ءِ جاھمنندے آں، بلے من ءَ وتی ودی بیگ ءِ جاہ باز کم یاد کیت۔ من ءَ ھما جاہ شرے ءَ یات اِنت کہ آ اُود ءَ من کسانیں زھگے ءِ بستارءَ گوازی کرتگ، گس ءُ جاہ منءَ کلھے یات اَنت۔ من وھدے چار سال ءِ بوتگ آں منءَ چہ ھیپا ءَ ڈنّ اِش کش اِتگ، داں سالاں پہ وتی پس ءُ پیروکی شھر ءِ گندگ ءَ تلوس اِتگ آں۔ گڈی ءَ من 21 سال ءَ پد 29 اگست 1969 ءَ دوبر ھیپا دیستگ، ھما وھد ءَ کہ من ءُ کامریڈ سلیم ایساوی ءَ زورگر ءِ گُرابے دستیگ کرت ءُ پلستین ءَ آتک اِیں، دانکہ دُژمن ءِ دست ءَ زورگیپتیں ڈیھ ءَ ستک شانی ندْر بہ کن این ءُ اے ھم پیش بہ دار ایں کہ ما وتی ماتیں سرڈگار نہ شموشتگ۔ چیریں زوراکی ھمیش اِنت کہ نزوریں اسرائیلی دُژمن ءَ مارا امریکی ءُ پرانیسیسی گُرابانی میان ءَ داشتگ ءُ مئے سرڈگار ءَ ایر کرتگ۔
ھیپا ءِ باروءَ من چہ وتی ھبملاں، مات ءُ پت ءُ کتابانی رد ءَ سرپد بوتگ آں۔ نوں من چہ سربرءَ وتی سرڈگارءِ زیبائی ماراِتگ ءُ وتی ڈیھءَ ماں سسا دیست کن آں۔ ھیپا ءِ کوھانی زیبائی، کورانی نِدارگ ءُ دراجیں پٹانی ایوکا درد بھر بوتگ اَنت۔ روچ ءِ بے دروریں رُژنائی اے سرڈگار ءِ سرءَ وتی زیبائیءَ پیشدار اِیت۔ بلے منءَ اے روچ ءِ رُژنائی ءِ گندگ، گوں اے گْواتءَ روگ ءُ گوں مردماں دم کشگ ءِ واک نیست۔
یورپی یھودی ءُ آیانی ھمبل گوں سلاھاں ءَ مئے سرڈگار ءِ سر ءَ زورگر اَنت ءُ مارا چہ ڈیھءَ کش اِتگ اش۔ ما پھوال اِیں، درانڈیھ اِیں ءُ آ زورگر اَنت کہ ڈیھ اِش دستیگ کرتگ۔ آ پمیشکا مئے شھر ءَ نشتگ اَنت کہ یکے و ایش کہ آ یھودی اَنت ءُ دومی زوراک اَنت، ما پلستینی ارب کودک ءُ دست ءُ گْوش اِیں۔ بلے جنگل ءَ نشتگیں مئے بامرد، گوں ھمے ارداہ ءَ زندگ اَنت کہ ما توانمند بہ اِین ءُ پلستین ءَ پد ءَ پہ اَرباں مردمانی بھشت ءُ آجوئی ءِ وتواکیں سرڈگارے کن اِیں۔
منءَ وتی کھول ءُ درسیں پلستینیانی وڑ ءَ ھیپا دوست بیت۔ بندات ءَ پہ ھیپا ءَ منی مھر باھندی بیتگ۔ انچوش کہ پہ وابجاھیں سرڈگار ءَ زھگے ھل ءُ واھگ دار ایت۔ انچوش کہ من مزن بوتگ آں وتی بارو ءَ جیڑ اِتگ ءُ ونتگ من سرپد بوتگ آں کہ من گوں گْوستانکے ءَ بندوک آن ءُ چہ مئے مردمانی کوشست ءَ گْوستانکے سر ریچ اِنت ءُ منی راج، اگاں چہ آدگہ راجاں مزن نہ اِنت بلے بستارے الم دار اِیت۔
منی اِرادہ مھکم بوتگ کہ منی بھرگ ءِ مردم ءُ کارکن، بےکار، باھوٹ ءُ زُوراکی ءِ آماچ بوتگیں مردماں راجے ءِ بنیاد ءَ چہ ایردستی ءَ کش اِت ءُ آجو کِرت کن اَنت۔ منءَ وانگجاہ ءَ ھرچی کہ وانینگ بوتگ منءَ آ بئے کنگ ءُ دیمءَ جنزگی اَت۔ وانینگ ھمے بوتگ کہ مارا ھچ گْوستانک نیست کہ ما پلستینی ھچ وڑیں راجے نہ اِین ءُ اَرب ھم بنکی مردم نہ اَنت۔ سرپدی ءِ جست ءُ پرس ءَ منءَ ھما جاہءَ آؤرتگ کہ آ اودءَ من سرپد بوتگ آں، وتساچیں نبشتہ کاراں چون مئے کرد، مئے بودیگی ستا، شھیدی ءُ کارپد مٹ کرتگ ءُ گوں ما دروگ بستگ۔
من اے گپءَ سرپد بوتگ آں کہ منءَ گْوستانک ءِ تہ ءَ جْوانیں کردے پیلو کنگی اِنت۔ من زانتگ کہ منی نابودیں کرد زوراک ءُ ایردست ءِ میان ءَ پہ جنگ ءَ بودناکیں راھے درگیج ایت۔ من پہ وتی مردم ءُ وتی جند ءِ آجو کنگ ءَ آشوبی بوتگ آں۔
من چوناھیگا چہ 1930ءَ یک پلستینی آشوبی یےءَ سانمند بوتگ آں۔ ازدیں کسم کہ آئیءَ اَرب ءِ تہءَ درستاں پیش بنداتی جھد، جْوان ءُ مھکمیں وڑےءَ پہ مزور ءُ دھکانانی آشوب ءِ دیمءَ آرگءَ کرتگ۔ اے دْرچءَ آ داں دیراں چیراندری کارءَ بوتگ۔ 1935 ءَ مردمان ءَ مدام راجدْروھی ءُ ردیں کارءَ دیستگ گڑا آئیءَ سلاھبندیں جھد بندات کرتگ۔ اِے جھد انگریزیں زورگر، یھودی ءُ اَرب ءِ کْوھنگ دوست ءِ بگیری ءَ بوتگ۔ آشوبْیانی تہءَ مزور، دھکان ءُ نودربر ءُ آدگہ دیمروئی دوستیں مردم ھوار بوتگ اَنت۔
برجاہ اِنت ۔۔۔۔۔۔۔۔۔۔