دستونک

مبارک کازی
من گشت تئی چم شراب انت ھبر تاب داتگ ئے
من گشت تئی لنٹ گلاب انت ھبر تاب داتگ ئے

من گشت منءَ ھمک ھبرءِ پسوءَ بدئے
تئی جست تئی جواب انت ھبر تاب داتگ ئے

من گشت تو چو چاردھی ماہءَ پرآتکگ ئے
گشت ئے اے ٹہل و داب انت ھبر تاب داتگ ئے

من گشت زندگانی نہ ماتے نہ ماتوے
گشت ئے تئی گپ ھراب انت ھبر تاب داتگ ئے

من گشت پل و بلبلءِ کسہ چے کسھے
گشت ئے دوئیں عذاب انت ھبر تاب داتگ ئے

من گشت بابا آدم و بی بی حوا کئے انت
گشت ئے کہ بلئے واب انت ھبر تاب داتگ ئے

من گشت گوادرءَ دگے دنیاے جوڑ بیت
گشت ئے مئے دو تیاب انت ھبر تاب داتگ ئے

من گشت قاضی جنت و دوزہ کجا رسنت
بل ونتگیں کتاب انت ھبر تاب داتگ ئے